ʻOku Fakahaaʻi ʻe he Fakatapuí ha “Kahaʻu Taʻe-hano-tatau”
Naʻe pehē ʻe Palesiteni Lāsolo M. Nalesoni ʻi hono fakatapui ʻo e Temipale Rome Italy ʻi Māʻasi 2019, “ʻE maʻu ʻe he Siasí ha kahaʻu taʻe-hano-tatau. Ko ʻetau fokotuʻu pē ʻeni ha fakavaʻe ki he meʻa ʻe hoko ʻi he kahaʻú.”
Naʻe fakataha kotoa mai e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ki he fakatapuí, ko e fuofua taimi ia ke nau fakatahataha mai ai ki ha feituʻu pē ʻe taha ʻi tuʻa mei he ʻIunaiteti Siteití. Naʻe pehē ʻe Palesiteni Nalesoni, “ʻI heʻemau hoko ko e kau ʻAposetolo ʻo Sīsū Kalaisi ʻi he ngaahi ʻaho kimui ní, ʻoku mau vahevahe he ʻahó ni ʻa e pōpoaki tatau mo ia ne vahevahe ʻe he kau ʻAposetoló ʻi he kuonga muʻá—ʻoku moʻui ʻa e ʻOtuá pea ko Sīsū ʻa e Kalaisí.”
Naʻe ʻikai ngata pē ʻi hono fakatapui ʻo e temipalé, ka naʻe lea foki ʻa Palesiteni Nalesoni ki he toʻu tupu ʻi he vahefonua ʻo e temipalé pea naʻá ne feʻiloaki mo Tuʻi Tapu Falanisisi, ko e toki fuofua taimi ia ke feʻiloaki mata-ki-he-mata ai ha Palesiteni ʻo e Siasí mo e ʻulu ʻo e Siasi Katolika Lomá.