Jan E. Newman
Tokoni Ua ʻi he Kau Palesitenisī Lahi ʻo e Lautohi Faka-Sāpaté
ʻI he taimi naʻe hoko ai ʻa Sani E. Niumani ko ha faifekau kei talavou ʻi Sitasipoki, Falaniseé, naʻá ne maʻu ha aʻusia fakalaumālie makehe naʻe fakamālohia ai ʻene fakamoʻoní peá ne malava ai ke ongoʻi e ʻofa ʻa e Tamai Hēvaní. Naʻe hoko e aʻusia ko ʻení lolotonga ʻene lau e ngaahi lea ʻa e palōfita ko ʻAlamaá ʻi he Tohi ʻa Molomoná fekauʻaki mo hono tō e tenga ʻo e ongoongoleleí ʻi hotau lotó (vakai, ʻAlamā 32:28; 33:22–23).
Naʻe pehē ʻe Brother Niumani, “Naʻá ku lau, kapau te ke fakaʻataʻatā ha potu maʻá e tenga ko iá ʻi ho lotó, ʻe tupu ia, pea te ke ongoʻi moʻoni ʻa e tupu māʻuiʻui ko ʻení. Naʻá ku manatuʻi ʻeku laukonga ko iá pea naʻe fakamoʻoniʻi mālohi mai ʻe he Laumālié kiate au naʻe moʻoni ia. Naʻá ku ongoʻi ʻa e tupu māʻuiʻui ko iá. He ʻikai toe ngalo ia ʻi heʻeku moʻuí.”
Naʻe tokoni ʻeni mo ha ngaahi aʻusia kehe ke fakamālohia e fakamoʻoni ʻa Misa Niumani ki he ongoongoleleí mo teuteuʻi ia ke ne ngāue he kotoa ʻo ʻene moʻuí ke ne hoko ko ha husepāniti, tamai, mo ha ākonga ʻa Sīsū Kalaisi.
Naʻe fāʻeleʻi ʻa Sani ʻEliki Niumani ʻi he ʻaho 16 ʻo ʻEpeleli, 1960 ʻi Selome, ʻAitahō, USA kia Siaosi Leimoni mo Toula Uoka Niumani. Naʻe ohi hake ia ʻi ʻOvatoni, Nevata, USA. Naʻe papi ului ʻa ʻene tamaí, pea ko ʻene faʻeé naʻe [tupu ʻi ha fāmili] kuo laui toʻu tangata ʻenau kau ki he Siasí.
Naʻá ne maʻu ha fakamoʻoni ʻi heʻene kei siʻí pea naʻá ne ngāue fakafaifekau taimi kakato ʻi Falanisē mo Pelisiume. Hili e ngāue fakafaifekau ʻa Misa Niumaní, naʻá ne maʻu ha mataʻitohi BA ʻi he lea faka-Falaniseé mei he ʻUnivēsiti Pilikihami ʻIongí. Naʻá ne mātuʻaki saiʻia ʻi hono mataʻitohí peá ne fakakaukau ai ke hoko ko ha faiako lea faka-Falanisē, ka naʻá ne fili ke ngāue ʻi ha kautaha polokalama fakakomipiuta. ʻI ha taʻu ʻe tolungofulu tupu, naʻá ne hoko ai ko ha tokotaha fokotuʻu pisinisi foʻou, pea kuó ne lavameʻa ʻi hono fokotuʻu ha ngaahi kautaha polokalama fakakomipiuta lahi. ʻI he lolotonga ní, ʻokú ne hoko ko ha hoangāue ʻi he SageCreek Partners, ko ha kautaha faifaleʻi fakatekinolosia ʻi ʻAlapaini, ʻIutā.
Naʻe mali ʻa Misa Niumani mo Lūsia Palaisi ʻi he Temipale ʻOkalani Kalefōniá ʻi he ʻaho 18 ʻo ʻAokosi, 1984. ʻOkú na hoko ko ha mātuʻa ki ha fānau ʻe toko ono pea ʻokú na nofo ʻi he Moʻunga Tiá (Elk Ridge) ʻi ʻIutā.
Kuo hoko ʻa Misa Niumani ko ha palesiteni siteiki, pīsope, palesiteni Talavou fakauooti, Taki ʻi he Sikautí, pea mo ha tokotaha ngāue temipale. Naʻá ne ngāue ko e palesiteni ʻo e Misiona ʻOmahā Nepulasikaá mei he 2006 ki he 2009.