ʻEletā Hans T. Boom
Fitungofulu Taki Māʻolunga
ʻI he taʻu valu ʻa ʻEletā Hanisi T. Pumú, naʻe hiki hono fāmilí mei ʻAmisitetami ki he kolo ko Peletá, ʻa ia ʻoku tuʻu ʻi he tafaʻaki fakatonga ʻo e ʻOtu Netalení. Naʻe ongoʻi heʻene tamaí, ko ha tangata Netalani naʻá ne tupu hake ʻi ʻInitonēsia pea ko ha papi ului ki he Siasí, naʻe fie maʻu ke mavahe hono fāmilí mei he kolo lahí ʻo foki ki he kolo tupuʻanga ʻo ʻene ngaahi kuí.
Ne hoko e taimi naʻe nofo ai ʻa ʻEletā Pumu mo hono fāmilí ʻi he kiʻi kolo ko ia ʻa ia ne hoko ko ha akoʻanga ʻo e ngāue ʻi he Siasí—ʻa e ngāue kuó ne fai ʻi he kotoa ʻo ʻene moʻuí pea te ne hokohoko atu ai pē ke fai pehē ʻi hono uiuiʻi foʻou ko ha Fitungofulu Taki Māʻolungá.
ʻOkú ne pehē, “Ko e meʻa kotoa pē kuó u aʻusiá mo ia ʻoku ou maʻú, ne ʻikai mei ʻaʻaku ia ka naʻe taʻe ʻoua e ʻEikí mo e ngaahi faingamālie kuó Ne ʻomi maʻaku ke u ako mo tupulaki aí.”
Naʻe fāʻeleʻi ʻa Hanisi Tiotolusi Pumu ʻi he ʻaho 13 ʻo Siulai, 1963, ʻi ʻAmisitetami kia Hanisi mo ʻAniki Pumu, ko e fika ua ia ʻi he fānau ʻe toko fā ʻa e fāmili Pumú. Naʻe akoʻi heʻene ongomātuʻá ʻa e ongoongoleleí ʻi honau ʻapí pea naʻá na poupouʻi ʻena fānaú ke nau ngāue mālohi.
ʻI he taʻu 18 ʻa ʻEletā Pumú, naʻá ne ngāue ʻi he Misiona Lonitoni Hahake ʻIngilaní. Hili ha ngaahi māhina siʻi ʻo ʻene ʻosi mei he ngāue fakafaifekaú, naʻá ne fetaulaki mo hono uaifi he kahaʻú, ʻAliena Soana “Masani” Poloekisita, ʻi ha konifelenisi ʻa e Siasí maʻá e kakai lalahi kei talavoú. Naʻe mali ʻa e ongomeʻá ʻi he ʻaho 27 ʻo Siulai, 1984 ʻi Luni, Netaleni pea naʻe silaʻi kinaua hili ha ʻaho ʻe tolu mei ai ʻi he Temipale London England. ʻOkú na maʻu ha ngaahi foha ʻe toko tolu.
Naʻe ngāue ʻa ʻEletā Pumu ko ha sekelitali ki he pule ako ʻo e Kolisi Mākenihasé pea mo ha tokotaha ke ne kumi mai ha kau ngāue maʻá e Franchise Development Benelux. ʻI he taimi naʻe uiuiʻi ai ia ke ne hoko ko ha Taki Māʻolungá, naʻá ne hoko ko ha pule faifakatau ki he ngaahi Kautaha Makiliní.
Kuo hoko ʻa ʻEletā Pumu ko ha Fitungofulu Fakaʻēlia, tokoni ʻi ha kau palesitenisī fakasiteiki, palesiteni Kau Talavou ʻi he siteikí, palesiteni fakakolo, mo ha tokoni ʻi ha kau palesitenisī fakakolo. ʻI he taimi naʻe uiuiʻi ai iá, naʻá ne hoko ko ha faiako ʻinisititiuti mo ha tokotaha ngāue temipale ʻi he Temipale Hague Netherlands.