ʻEletā Peter M. Johnson
Fitungofulu Taki Māʻolunga
Hili hono tali ʻe Pita M. Sionisoni, ko e foha ʻo ha supavaisa falengāue mo ha fakaʻuli tekisī, ʻa e sikolasipi pasiketipolo ki he ʻUnivēsiti ʻo Pilikihami ʻIongi–Hauaiʻí, naʻá ne talanoa mo ha faiako ʻinisitiuti.
Naʻe tomuʻa talaange ʻe he faiakó, “Te ke kau ki he Siasí ʻi he vave tahá, ka ʻikai ʻe kiʻi fuoloa.”
Naʻe tonu pē ʻa e faiakó. Ne laka hake ha taʻu ʻe taha mei ai, “naʻe ʻaukai mo lotu [ʻa Pita] peá ne maʻu ha tali.” Naʻe papitaiso ia ʻi he ʻaho 16 ʻo ʻAokosi, 1986.
Naʻe fāʻeleʻi ʻa Pita Mātiu Sionisoni, ko e fika fā ʻi ha fānau ʻe toko nima, kia Makinili Sionisoni mo Siniva Pālesi Longi ʻi he ʻaho 29 ʻo Nōvema, 1966 ʻi Kuini, Niu ʻIoke, USA.
Naʻe māvae ʻene mātuʻá ʻi hono taʻu 11 pea hiki ʻene faʻeé ki Hauaiʻi. Hili ha taʻu e taha mei ai, naʻe kau ʻa Pita ki he Puleʻanga ʻo ʻIsilamí peá ne hoko ai ko ha Mosilemi. Naʻe hoko e kautahá ni ko ha tataki mo ha tokoni pea teuteuʻi ai ia ke ne tali e ongoongolelei ʻo Sīsū Kalaisí.
ʻI he taʻu 15 ʻa Pitá, naʻá ne hiki ki Hauaiʻi ke nofo mo ʻene faʻeé. Naʻá ne ʻiloʻi ai ʻa e sipotí—tautautefito ki he pasiketipoló—peá ne kamata ngāueʻi ʻene ako ʻunivēsití, mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ngāue fakafaifekau ʻi he Misiona Alabama Birmingham, pea mali temipale mo Sitefanī Lini Setiuiki ʻi he 1990. Naʻe fetaulaki ʻa e ongomeʻa malí lolotonga haʻana vaʻinga pasiketipolo ʻi he ʻUnivēsiti ʻIutā Tongá, pea ʻoku ʻi ai haʻana fānau ʻe toko fā.
ʻOku pehē ʻe ʻEletā Sionisoni fekauʻaki mo hono uiuiʻi ki he Kau Fitungofulú, “ʻOku ou ʻi hení ke ngāue maʻá e ʻEikí. Neongo pe ko e hā e fonua pe tukufakaholo pe ko e feituʻu ʻoku ou haʻu mei aí, ko hoku fatongiá ke ngāue maʻá e ʻEikí ʻaki hoku lotó, ʻatamaí mo e iví kotoa pea mo fakafofongaʻi e ʻEikí ki Hono kakaí. ʻOku ʻofa ʻa e Fakamoʻuí ʻiate kitautolu hono kotoa. Ko e ngaahi foha mo e ʻofefine kitautolu ʻo e ʻOtuá.”
Naʻe maʻu ʻe ʻEletā Sionisoni ʻa hono mataʻitohi BA mo e MA ʻi he tauhitohí mei he ʻUnivēsiti ʻIutā Tongá pea mo ha PhD ʻi he tauhitohí mei he ʻUnivēsiti ʻo e Vahefonua ʻAlesoná. Kuó ne ngāue ko ha tokoni palōfesa ʻi BYU-Hauaiʻi, tokoni palōfesa ʻi he ʻUnivēsiti Pilikihami ʻIongí, pea tokoni palōfesa ʻi he ʻUnivēsiti ʻo ʻAlapamá. Kuó ne hoko ko ha Fitungofulu Fakaʻēlia, palesiteni siteiki, kalake fakapaʻanga ʻa e siteikí, mo ha taki ngāue fakafaifekau ʻi he uōtí.