M̧ool Em̧m̧an
Rijeje eo ej jokwe ilo Colorado, USA.
“Kōm̧m̧ane ta eo ejim̧we” (2 Korint 13:7).
“Ij aikuj am̧ lale ļaddik eo jatūm̧,” Jinen eaar ba. “Kōm̧ro jemam̧ ej etal n̄an jipan̄ juon eo enan̄inmej.”
Iaar reilōn̄ļo̧k jān aō būruum̧i lowaan em jidikdik eo imōm̧ im kōm̧ajidjid bōra. M̧am̧a eaar būreejtōn an Doulul eo an Kōrā ro, im ekkutkut an kar etal n̄an loļo̧k kōrā ro ilo ward eo am.
“Kom̧m̧ool, Arlyn,” M̧am̧a eaar ba, im um̧m̧aik dōm̧a. “John ekiki. Im ewōr pilawe ej kauwe ioon kauntōr eņ. Jouj im jab jibwe.”
Ij lale ilo kōjām eo ke e im Baba raar iuweļo̧k ilo wākōn eo ilo iaļ eo am me ebūn̄aln̄al. Ekar utiej buruō bwe Mama ej lōke eō.
Ke ij būruum̧ ilo jikin kōmat eo, iaar bōjrak im kalimjōkļo̧k pilawe eo. Ijjab kar maron̄ kōttar an M̧am̧a itōn kar iiōke ilo joten eo. Ekkā am kijon̄ m̧ōn̄ā pilawe kāāl ippān jaam̧ kōmij make kōm̧m̧ane. Bōtaab ekar maat kijem jaam̧ jilu allōn̄ ko remootļo̧k.
Jaam̧! Juon ļōmņak eaar kōm̧m̧an aō kwōle kōn juon men etōn̄al. Iaar reilōn̄ļo̧k n̄an nien juka eo, eutiej ilōn̄ ioon rā eo. Iaar jeļā M̧am̧a eaar kakoņe n̄an bar kōm̧m̧an elōn̄ļo̧k jaam̧.
Ak an ļapļo̧k aō kar ļōmņake juka eo, iaar en̄jake aō kwoleļo̧k wōt. Āliktata, iaar kanōktok juon jea n̄an kauntōr eo im ejjōb lōn̄ļo̧k. Adiin peiū rekar jidik wōt aer jibwe nien juka eo. Iaar kanōkļo̧k n̄an tōrerein rā eo. …
Innām nine eo eaar wōtlo̧k jān rā eo! Iaar kajjieon̄ bauri, bōtaap eaar wōtlo̧k kōn im kōm̧m̧ane juon ainikien eļļaaj ilo ioļapļap in wōt pilawe eo. Juka eo eaar lutōk ioon aolepān pilawe eo im kauntōr eo im n̄an ioon laļ.
“O jaab!” Iaar lam̧ōj. Men eo eaar karuj ļaddik eo jatū. Eaar jino jan̄. Iaar kōņaan jan̄ barāinwōt. Ta eo M̧am̧a enaaj kar ba kōn pok in?
Ālkin aō kar kaenōm̧m̧an John, iaar kajjieon̄ jon̄an aō maron̄ karreoiki juka ko. Iaar kanōktok nine eo jān pilawe eo im kwaļe. Iaar kanneoikļo̧k juka ko jān kauntōr eo im laļ. Bōtaap ejjeļo̧k men imaron̄ kar bōk juka ko jān lowaan pilawe eo.
Iaar ļōmņak in bar kōro̧o̧lļo̧k nine eo n̄an ioon rā eo. Bōlen M̧am̧a eban kile bwe ejjeļo̧k kobban. Bōtaab iaar jeļā bwe ejjab jim̧we men eo. Kōn menin iaar likūt nine eo ioon tebōļ eo im kōttar an M̧am̧a im Baba itok n̄an m̧weo.
Ke rekar tōpartok m̧weo, M̧am̧a eaar kile ke nien juka eo ilo iien eo em̧ōkaj tata.
Iaar bōk kūtuwō. “Iaar kōņaan wōt nemake juka eo. Bōtaab iaar kauwōtlo̧ke nine eo jān rā eo. Iaar kajjieon̄ karreoki, bōtaab iaar jab maron̄ bōke jān pilawe eo.” Iaar kōmeraik aō kōnono ke iaar kalimjōk laļ.
M̧am̧a eaar jab keroro ilo juon minit.
“Lukkuun joļo̧k aō bōd,” Iaar unoojdikdik.
M̧am̧a eaar kōtļo̧k kūtuwōn. “Ekwe, Ij ļōmņak pilawe eo enaaj ļapļo̧k jidik an tōn̄al bun̄nin,” eaar ba. Iaar reilōn̄ļo̧k. Eaar ettōn̄ dikdik n̄an eō. “Kom̧m̧ool kōn am̧ kar ba n̄an kōm ta eo eaar waļo̧k.”
Ilo am kar mōn̄ā pilawe juka eo bon̄ōn eo, M̧am̧a im Baba im n̄a kar kōnono kōn m̧ool.
“Jej aolep kōm̧m̧an elōn̄ bōd ko ilo mour,” Baba eaar ba. “Bōtaab n̄e jej m̧ool im kajjieon̄ ukweļo̧k, Jemedwōj Ilan̄ im Jisōs rej m̧ōņōņō. Jenaaj iien otemjej jeraam̧m̧an kōn ad m̧ool—jekdo̧o̧n n̄e enaaj pen ilo jino in.”
Ilakkar inepata wōt bwe iaar lutōke juka eo. Iaar jeļā ke eban kar lukkuun lōn̄ kijem jaam̧ ilo iiō in kōnke kōn bōd eo aō. Bōtaab iaar m̧ōņōņō bwe iaar kwaļo̧k m̧ool eo. Eaar juon en̄jake em̧m̧an ejjeļo̧k jon̄an juka emaron̄ kar letok.