2019
Kōkkar Revelesōn an Juon Make
Eprōļ 2019


Rūm̧m̧an Ded ro

Kōm̧m̧an Ekkar N̄an Revelesōn an Juon Make

Elemen am̧ kwaļo̧k oktak eo ikōtaan revelesōn im ļōm̧ņak ko am̧ make?

Pija
woman reading book

Jin̄a jān Brian Kershisnik

Jej mour ilo juon laļ eo eobrak kōn iien ko em̧m̧an. Elōn̄ ad anemkwoj n̄an kāālet jerbal ko ad make, jikuuļ, eo pāleed, ia eo jekōņaan mour ie, im bar elōn̄. Ej lukkuun juon jeraam̧m̧an an epepen in ad. Bōtaab ilo bar juon wāween, ej kom̧m̧an bwe aolep kālet kein rej penļo̧k kōnke epen n̄an kōm̧m̧ane jokālet ko n̄e ekanooj lōn̄ iaļ ko im iien ko rem̧m̧an me renaaj tōlļo̧k kōj n̄an men ko rem̧m̧an. Ekōjkan ad kāālet jim̧we eo n̄e ekanooj lōn̄ļo̧k wōt iien ko rem̧m̧an me rem̧m̧an? N̄e kwoj en̄jake am̧ jōbwābwe im pok ilo lan̄ in jokālet ko, jeļā bwe Jemedwōj Ilan̄ ekōņaan tōl eok. Komaron̄ kālet iaļ eo ejim̧we im bōk uwaak ko kwoj pukōti eļan̄n̄e kwoj ļoor Ainikien. Kile wāween An kōnono n̄an eok, lōke E, ļoor rikanaan eo, kijenmej, im kōļapļo̧k am̧ kije, im tōmak, im āliktata kwonaaj bōk tōl ilo iaļ eo ejimwe.

—Vira Vashchenko, Kyiv, Ukraine

Ilo aolepān mour eo aō em̧ōj aō loe wāween an Irooj kar tōl eō, im n̄aij kile bwe aolep men ikar būki ej kam̧oolol n̄an E im An tōl. Jekdo̧o̧n ilo iien ko n̄e n̄aij ļōmņak ij etetal make iaaō, ilo jem̧ļo̧kin, Ej kōtļo̧k bwe in jeļā im en̄jake bwe Ej pād ippa aolep iien. En̄in ej etke em̧ōj aō kōm̧m̧ane jokāālet eo n̄an wōnm̧aanļo̧k kōn tōmak, mekarta n̄e ij en̄jake bwe n̄aij make iaaō. N̄an n̄a, iaļ eo aō ejjab aolep iien alikar jet iien, im ijjab maron̄ aolep iien lo ta ej kōttar n̄a iliju im jakļaj, bōtaab aolep iien ij kōm̧m̧ane bun̄tōn ko an tōmak, innām ij jino lo meram eo im kile pein Anij ilo mour eo aō. Ijeļā bwe Jemedwōj Ilan̄ im Nejin, Jisōs Kraist, rej iakwe kōj im bwe Rej m̧ōņōņō in tōl kōj, bōtaap Rej barāinwōt kōtmene kōj n̄an likut ad tōmak ilo Er im jerbal n̄e jej bōk im̧we ko jān Jetōb eo.—

Indhira Mejia, Dominican Republic

Ilo aō rūttoļo̧k, Iaar aikuj in katak kajin eo an Jetōb. Jetōb eo ej kōnono n̄an eō kōn ļōmņak ko reļem waan. Eaar bōk jet kaminene ko n̄an iminene kake, bōtaab ekkā an Jetōb eo itok n̄an ippa ilo jikin ko reluur, āinwōt kattōrļo̧k n̄an jerbal ilo wa eo waaō. Ijeļā ejjab aō ļōmņak ko kōnke Jetōb eo enaaj ekkā an letok im̧we ko n̄e ijjab ļōmņak kōn unin kōnono eo.

—Clarissa Mae Taylor, Utah, USA

Ij ļōmņak bwe juon iaan kōļ ko rem̧m̧an tata jej aikuj tijem̧ļo̧k kake ej maron̄ eo n̄an kile unoojdikdik ko remera an Jetōb Kwojarjar. Niknik ilo ekkatak jeje ko rekwojarjar ekar iuun m̧aanļo̧k n̄a n̄an tijem̧ļo̧k kake. Ikar iien otemjej tōmak bwe eo ej pukōt ilo niknik naaj loe; im aolep menin ittiņo ko an Anij renaaj waļo̧k im̧aan mejān kōn kajoor eo an Jetōb Kwojarjar (lale 1 Nipai 10:19). Ilo bar juon wāween ba, eļan̄n̄e ij kōnaan kile Jetōb eo, ijjab aikuj kōtļo̧k eō make n̄an ļōmņak ko rewaan ak abņōņō ko an kajjojo raan an mour, bōtaab ijello̧kin ij aikuj bōk kuņaō ilo jerbal eo im meļo̧kļo̧k eō make. Ēn̄in ej iien eo enaaj em̧m̧anļo̧k aō maron̄ kile Jetōb eo kōnke ij pojak n̄an e! Ilo ejja wāween eo juon wa ejjab maron̄ jerak ilo juon ļan̄, jejjab maron̄ ron̄ ainikien Jetōb eo eļan̄n̄e jej kalimjōk wōt kea ko an mour me rej pād ilikin maron̄ ko ad.—

Emmanuel Borngreat Dogbey, Accra, Ghana

Pija
couple

Baam̧le jidikdik eo am, kōmij kile Jetōb eo kōnke kōn aenōm̧m̧an eo kōmij en̄jake, eļaptata ļeo pāleeō im n̄a ippān doon āinwōt ripālele. N̄e ej ļōmņak ko am make, kōmij jāmin en̄jake bwe ej lukkuun men eo ejim̧we eo—aolep iien ej wōr pere ak mijak. Bōtaab n̄e ej revelesōn, kōmij en̄jake aenōm̧m̧an aolep iien, jekdo̧o̧n n̄e kōmij kajjieon̄ kappukōt jet bar meļeļe im men kein rejjap lukkuun alikar ilo jinoun. N̄e ejejjet am ļoor revelesōn eo, aolep iien kōmij lo an men ko wōnm̧aanļo̧k ilo ejjeļo̧k kōlaaborbor. En̄in ej iien eo kōmij kalimjōk doon im ba, “O, emeļeļe kiiō!”

—Maryana Wright, Utah, USA

Men̄e jemaron̄ aolep bōk revelesōn an juon make ilo wāween ko roktak, juon men em̧ool ejjeļo̧k pere: Emakijkij an Anij kōnono n̄an kōj. Jej aikuj wōt in m̧ōņōņō n̄an kwaļo̧k kijejeto n̄an kōļapļok maron̄ eo ad n̄an kile im ron̄jake Ainikien. Āinwōt an kar Būreejtōn Russell M. Nelson rōjan̄: “Jar ilo etan Jisōs Kraist kōn inepata ko am̧, am̧ mijak, m̧ōjņo̧ ko am̧—aaet, jan̄uwaade ko an būruwōm̧. Innām ron̄jake! Je ļōmņak ko me rej itok n̄an kōļmenļo̧kjeņ eo am̧. Ļo̧o̧ke en̄jake ko am̧ im wōnm̧aanļo̧k wōt kōn m̧akūtkūt ko me kwoj bōk im̧we n̄an kōm̧m̧ani. Ilo am āliji jekjek in raan n̄an raan, allōn̄ n̄an allōn̄, iiō n̄an iiō, kwonaaj ‘eddok lok ilo katak in reveleson’” (“Revelesōn n̄an Kabun̄, Revelesōn n̄an Mour ko Ad,” Kweilo̧k eo Eļap, Māe 2018, 95).