“En̄iin ej Men eo!”
Richard J. Anderson
Utah, USA
Pija jān John Kachik
Iaar tōpar tok m̧weo ilo juon bon̄ōn winter ālkin aō kar kōm̧m̧ani jet intōrpiu ko āinwōt juon bisop. Iaar lukkuun m̧ōk. Jerbal eaar kanooj pen ilo ium̧win wiik ko, im eddo ko an baam̧le im ilo Kabun̄ in rekōm̧m̧an bwe en tōrjān jon̄an maron̄ ko aō.
Ilo joteen eo, iaar aikuj kōm̧m̧ane wa eo waaō bwe in maron̄ etal n̄an jikin jerbal ilo jibon̄ōn̄ eo juon. Ke iaar kōņak coverall ko aō, iaar ukot eddo ko aō jān juon bisop n̄an juon rikōm̧m̧an wa. Iaar babu ioon būļoor eo em̧ōļo ālkin kōm̧m̧an wa eo ium̧win juon wa im jino jerbal. Etke iaar aikuj in piiō, lukkuun m̧ōk, im kakkure pā ko peiū ālkin aō kar lukkuun jerbal raan eo? Iaar luuji kijenmej eo aō im ikar jino ellotaan, akweļap n̄an Jemedwōj Ilan̄ ilo jar.
“Epidodo ke am̧ maron̄ jipan̄ eō jidik?” Iaar ba. “N̄aij kajjieon̄ ijo em̧m̧an tata ippa n̄an juon baba em̧m̧an, ļeo pālele, im bisop eo em̧m̧an im n̄an mour kōn kien ko. Enaaj ke kar em̧m̧anļo̧k aō jerbal eļan̄n̄e imaron̄ in kar kakkije jidik? Jouj im jipan̄ eō kam̧ōj jerbal in bwe in maron̄ etal n̄an peet.”
Ilo jidimkij, jilu naan, ralikkar im makeļo̧k kar itok n̄an ļōmņak eo aō: “En̄in ej men eo!”
“Ta eo?” Iaar uwaak.
Naan ko raar bar itok: “En̄in ej men eo!”
Meļeļe eaar jino kobrak kōļmenļo̧kjeņ eo aō im būruō ke naan ko raar bar itok alen jilu: “En̄in ej men eo!” Naan kein raar bōktok juon ennaan n̄an jetōb eo aō. ”Eaar“ mour wabanban, im iaar en̄jake juon iien eddokļo̧k n̄an jipan̄ eō erom ta eo Jemedwōj Ilan̄ ekōņaan bwe in erom. Eaar āinwōt eļan̄n̄e Jetōb eo eaar ba n̄an eō, “Kwar ke kōtmene bwe iaļ eo ilo laļ in ejjab aikuj wōr kapan̄pan̄ ko?” Ke iaar jerkak jān ioon būļo̧o̧r jimāān eo em̧ōļo, iaar jab āinwōt m̧okta.
Pedped ioon ekōjkan ad būki, māllejon̄ ko remaron̄ watōki āinwōt mennin letok ko jān Jemed ilo Ilan̄ eo ej iakwe koj. Ej letok n̄an kōj iien em̧m̧an n̄an jelm̧ae māllijon̄ ko bwe jen maron̄ ekkatak n̄an oktakļo̧k n̄an E. N̄e jej kōm̧m̧ane, jej jeraam̧m̧an kōn katak im eddokļo̧k eo ilo jetōb.
Naan ko jilu me raar itok n̄an kōļmenļo̧kjeņ eo aō ilo bon̄ōn eo me eaar m̧ōļo ioon būļo̧o̧r jimāāņ an jikin kōm̧m̧an wa aō raar kōjeraam̧m̧an eō elōn̄ļo̧k jān 35 iiō ko. Ij kajjieon̄ n̄an lale bwe en ejjeļo̧k māllijon̄ en waan. N̄aij lo mālijjon̄ ko āinwōt iien ko rem̧m̧an n̄an katak men ko me imaron̄ jab katak ilo wāween ko jet.