Kopā eo Ejako
Rijeje eo ej jokwe ilo Iowa, USA.
“N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd” (Katak im Bujen ko 64:10).
“M̧am̧a, ejako kopā eo aō!” Brad eaar ba. Ekar iien ro̧o̧l n̄an m̧weo jān m̧ōn jar eo, ak Brad eaar jab maron̄ loe kopā eo an ilo jikin katoto kopā eo.
“Kwoj lukkuun m̧ool ej ijo kwaar katotoik ie ke?” M̧am̧a eaar kajjitōk.
“Aaet. Ekar pād ije.” Kopā eo an Brad ekar būļu ebbōl im būrōrō. Ekar pen n̄an jab loe.
”Bōlen em̧ōj kōm̧akūti. Jen reito reitak ibeļaakin m̧wiin,” Baba eaar ba.
M̧am̧a, Baba, im Brad rekar jepeļļo̧k jān doon n̄an lali ruum̧ ko kajjojo. Raar lale bo̧o̧k in lost-and-found eo, ilo jikin jar eo, ilo ruum̧ in Jabōt Jikuuļ eo an Brad, ilo ruum̧ eo an Būraimere, im aolep jikin katoto kopā ko. Raar bar lale m̧ōn kepojak ko, ak rekar jablo kopā eo.
“Bōlen juon in ebōke ilo an jab jeļā. Ijeļa ke renaaj kōro̧o̧ltok wiik in laļ ilo iien eo rej jeļā ejjab aer,” Baba eaar ba.
“Ilo kōtaan in, komaron̄ kōņak kopā m̧ōr en am̧,” M̧am̧a eaar ba.
Brad ekar kajememe. Eaar dike kopā m̧ōr eo an. Eaar māni, mej mejān, im dik jān e. Eaar iakwe kōn wāween an kopā kāāl būļu im būrōrō eo an kōm̧m̧an bwe en āinwōt juon ribun̄bun̄.
“Juon eo bōlen eļak lo wāween an em̧m̧an kopā eo aō ekar ko̧o̧te,” Brad eaar lļōmņak. Ewi wāween an waļo̧k menin ilo m̧ōn jar? Aolep armej ro ijōņ rej aikuj in kar m̧ool. Brad eaar jab maron̄ kōtļo̧k bwe riko̧o̧t eo en kōm̧m̧an aindein. Eaar wōr juon an pepe. Jabōt in tok, enaaj lukkuun lalej wōn eaar kōņak kopā eo an. Innām enaaj bōke im lam̧ōj, “Bōjrak, riko̧o̧t!” Renaaj būrōm̧ōj kōn aer kar boke.
Brad eaar kijooror n̄an Jabōt eo bwe en kōm̧m̧ane pepe eo an. Bōtaab Jabōt tok juon eaar lukkuun māāņāņ n̄an kōņak juon kopā, im kōn menin Jabōt in tok.
Jabōt eo ālik, Brad eaar reitok reitak ilo Būraimere n̄an aolep ļaddik ro, ļōmņak wōn eo eaar ko̧o̧te kopā eo an. Emaroō ke kar ļaddik aitoktok eņ? Ak emaron̄ kar juon leddik. Eaar en̄jake āinwōt ejjab maron̄ lōke jabdewōt. Eaar jab em̧m̧an en̄jake jab eo ippān Brad.
Ālkin jar Brad eaar ekkairir jepooļ m̧ōn jar eo, lali an baam̧le ko kōņak kopā ko aer. Bōtaab eaar jab lo kopā eo an aolep jikin. Em̧ool eaar etale lost-and-found bo̧o̧k eo bar juon alen … ak ejjeļo̧k kopā. Ia eo enaaaj pād ie?
Ilo iaļ eo ļo̧k n̄an m̧weo, Brad eaar ļōmņak kōn juon pepe kāāl. Enaaj jar. Eaar jeļā ke Jemedwōj Ilan̄ emaron̄ kar loe men ko rejako. Bon̄ōn eo Brad eaar jar im ba, “Jema Ilan̄, jouj im ba n̄an n̄a wōn eaar bōk kopā eo aō. Ikōņaan bwe en jepļaaktok.”
Brad eaar kōtar an etan ak mejān riko̧o̧t eo itok n̄an ļōmņak. Bōtaab ijello̧kin eaar jino ļōmņak kōn eo m̧ōttan Carl. Brad ekutkut an kijon̄ jijet turin Carl ilo Būraimere. Eļap aerro kōm̧m̧an kōjak im ettōn̄ ippān doon Ak Carl ejan̄in itok im jar ium̧win jejjo wiik kio. Brad eaar o̧o̧n̄ kōn e.
Ta eļan̄n̄e Carl eaar bōk kopā eo aō? Bōlen Carl eaar mijak in itok n̄an jar kiiō kōnke eaar ļōmņak Brad ejjāmin naaj kar bar m̧ōttan. Brad ekōņaan bwe Carl en bar itok im jar. Eļan̄n̄e Carl eo eaar bōk kopā eo an, Brad eaar jōk ippān, eban lamōje n̄an e. Enaaj kar jeorļo̧k an bōd.
Brad eaar tallōn̄ļo̧k n̄an jikin an kiki, emm̧anļo̧k an en̄jake.
Jabōt eo tok juon ilo Būraemere, Carl eaar jako, ak juon ļaddik kāāl eaar pād. Ej kōņak juon tae būrōrō-im-būļu ļōļainiin.
“Em̧m̧an tae ņe,” Brad eaar ba, jijōt iturinļaddik kāāl eo. “Ekōm̧m̧an bwe kwon āinwōt ribun̄bun̄.”
Ļaddik eo ekar ettōn̄ dikdik.
Brad eaar bar ettōn̄ dikdik. Eaar jako an kappukōot rikoot ro, Eaar kappok m̧ōttan.