Tē hina’aro ra ’oe i te ora ?
Nā Elder Matthew L. Carpenter
Nō te Hitu ’Ahuru
’Aua’a a’e te tāra’ehara a Iesu Mesia, ’ia mā’iti tātou i te tātarahapa ’e i te fāriu hope i tō tātou ’ā’au i ni’a i te Fa’aora, e fa’aora ïa ’oia i tō tātou māuiui pae vārua.
Tau ’āva’e noa i roto i tāna misiōni, i te hope’a o tā rāua tuatāpapara’a, ’ua māuiui roa te upo’o o tā māua tamaiti. E mea ’ē roa terā ’ohipa ; nā mua roa e’ita e nehenehe e ha’uti i te rima ’aui ; i muri iho ’ua mōtu’utu’u te arero. ’Ua ha’amata a’era te pae ’aui o tōna hōho’a mata i te tautau. ’Ua fifi ’oia i te paraparau. Tē ’ite ra ’oia e ’ohipa ino ā teie. ’Aita rā ’oia i ’ite ē, ’ua ro’ohia ’oia i te ’ati uaua roro (avc) i ni’a e toru tuha’a o tōna roro. Mata’u ihora ’oia i te ha’aparuparura’a hō’ē pae o tōna tino. Nō te ’ati uaua roro, ’ia vitiviti te ravera’a e vitiviti ato’a te ta’ata ma’i i te ora mai. ’Ua rave rū tōna hoa misiōnare ha’apa’o maita’i i te hō’ē mea. ’Ua pi’i ’oia i te ma’i rū 911, ’ua hōro’a i te hō’ē ha’amaita’ira’a. ’Aua’a a’e, tei pae minuti noa te pere’o’o uta ma’i ia rāua.
I te rūra’ahia tā māua tamaiti i te fare ma’i, ’ua hi’opo’a ’oi’oi te feiā i te fare ma’i iāna ’e ’ua fa’aoti ihora e fa’atere i te hō’ē rā’au i ni’a iāna ’o tē nehenehe ’āraua’e e fa’a’āfaro i te ma’i ha’aparuparura’a tino i tupu nō terā ’ati.1 Mai te mea rā, e ’ere teie ’ohipa i te ’ati uaua roro, e riro ïa teie rā’au i te fa’arahi i te ’ino mai te tahera’a toto i roto i te roro. Nā tā māua tamaiti e mā’iti. ’Ua mā’iti ’oia e rave i terā rā’au. Noa atu ā pa’i ’ua tītauhia te tahi mau tāpūra’a ’e te mau ’āva’e rāpa’aura’a, ’ua ho’i roa tā māua tamaiti e fa’aoti i tāna misiōni i te fa’a’āfaro-roa-ra’a-hia te fifi i tupu nō te ’ati uaua roro.
Tei tō tātou Metua i te Ao ra te mau mana ato’a ’e te mau ’ite ato’a. ’Ua ’ite ’oia i tō tātou mau fifi pae tino. ’Ua ta’a iāna tō tātou mau māuiui pae tino, nō te ma’ima’i ānei, te ma’i, te matahiti pa’ari, te mau ’ati ’aore rā te mau ma’i tupuna. ’Ua ta’a iāna te ’āehuehu o te manava, nō te ahoaho ānei, te vai-’ōtahi-noa-ra’a, te fa’aturuma ’aore rā te ma’i roro. ’Ua ’ite ’oia i te mau ta’ata tāta’itahi tei fa’aruru i te ’ohipa parau ti’a ’ore ’aore rā tei hāmani-’ino-hia. ’Ua ’ite ’oia i te mau paruparu, te mau ’ōpaepaera’a ’e te mau fa’ahemara’a tā tātou e fa’aruru nei.
I te tāhuti nei, e tāmatahia tātou nō te hi’o ē, e mā’iti ānei tātou i te maita’i i ni’a i te ’ino. Inaha te feiā e ha’apa’o i tāna mau fa’auera’a, e ora ïa rātou « i roto i te ’oa’oa hope ’ore ra ».2 Nō te tauturu ia tātou ’ia haere i mua nō te riro mai iāna te huru, ’ua hōro’a te Metua i te Ao ra i te tā’āto’ara’a o te mana ’e te ’ite i tāna Tamaiti, ’o Iesu Mesia. ’Aita e ma’i tino, e ma’i manava, e ma’i vārua e’ita e ti’a i te Mesia ’ia fa’aora.3
I te tāvinira’a te Fa’aora i te tāhuti nei, tē fa’ati’a ra te mau pāpa’ira’a mo’a i te mau semeio e rave rahi i reira Iesu i te fa’a’ohipara’a i tōna mana hanahana nō te fa’aora i te ta’ata i māuiui i te pae tino.
Tē fa’ati’a nei te ’Evanelia a Ioane i te ’ā’amu nō te hō’ē ta’ata i ro’ohia i te ma’i ha’aparuparu, 38 matahiti te maoro.
« ’Ia hi’o atura Iesu iāna i te ta’oto-noa-ra’a, ’e ’ua ’ite ’ē na ’oia ē, e pohera’a roa tōna, ’ua parau atura ’oia iāna, Tē hina’aro na ’oe i te ora ? »
’Ua pāhono a’era taua ta’ata ma’i ra ē, ’aita e ta’ata ’ati a’e iāna e tauturu nei i te taime hina’arohia.
« ’Ua parau atura Iesu iāna, ’A ti’a, ’a rave i tō ro’i ’a haere.
« Ora a’era taua ta’ata ra i reira ra, rave ihora i tāna ro’i, haere atura ».4
’A hi’o maita’i na ’ia fa’aauhia te roara’a teie ta’ata i māuiui i tōna pae—38 matahiti—’e te vitiviti ’oia i te orara’a i te taera’a mai te Fa’aora. ’Ua ora mai ’oia « i reira ra ».
I te tahi atu taime, e vahine tei ro’ohia i te tapahi, 12 matahiti, ’e « ’ua pau roa āna pu’e tao’a tei te rapa’au… ’Ia fa’ati’a’ia maira i tāna hiti ’ahu, [fa’aea] ihora taua tapahi nōna ra i reira…
« ’Ua nā ’ō maira Iesu, ’ua fa’ati’a’ia mai te hō’ē iā’u : ’ua ’ite ho’i au ē, e mana tei reva atu nā nō ’ō nei atu iā’u nei.
« E ’ite a’era taua vahine ra ē ’aita ’oia i mo’e, ’ua… fa’a’ite maira iāna i mua i te aro o te ta’ata ato’a… ē ’ua ora roa ’oia i reira ra ».5
I roto i tāna tāvinira’a, ’ua ha’api’i te Mesia ē, e mana tōna i ni’a i te tino tāhuti. E’ita tā tātou e nehenehe e fa’aoti i te taime e fa’aora ai te Mesia i tō tātou mau fifi pae tino. E ora mai te ma’i ’ia au i tōna hina’aro ’e tōna pa’ari. Tē fa’a’ite ra te mau pāpa’ira’a mo’a i te mau ta’ata i māuiui e rave rahi ’ahuru matahiti; tē vai ra, nō te tā’āto’ara’a o te orara’a tāhuti nei. E ti’a i te mau paruparu tāhuti nei e ha’amaita’i ia tātou ’e e fa’ahōhonu ho’i i tō tātou tūru’ira’a i ni’a i te Atua. ’Ia vaiiho ana’e rā tātou i te Mesia ’ia tauturu mai, e ha’apūai iho ā ’oia ia tātou i te pae vārua, ’ia rahi a’e tō tātou ’aravihi nō te fa’a’oroma’i i tā tātou mau hōpoi’a.
I te hope’a, ’ua ’ite tātou ē, e fa’aorahia tō tātou mau fifi pae tino, te ma’i ’e te mau hapehape i te Ti’a-fa’ahou-ra’a. E hōro’a teie nō te mau ta’ata ato’a maoti i te tāra’ehara a Iesu Mesia.6
E nehenehe Iesu Mesia e fa’aora hau atu i tō tātou noa tino tāhuti nei. E ti’a iāna ’ia fa’aora i tō tātou nei vārua. Tē ha’api’i nei tātou i roto i te mau pāpa’ira’a mo’a i te huru tō te Mesia tauturura’a ’e fa’aorara’a i te feiā i paruparu i te pae vārua.7 ’Ia feruri tātou i teie mau ’ohipa i tupu, e rahi mai tō tātou tīa’ira’a ’e te fa’aro’o i te mana ha’amaita’i o te Fa’aora. E ti’a ia Iesu Mesia ’ia taui i tō tātou ’ā’au, ’ia fa’aora ia tātou i te ’ino o te parau ti’a ’ore ’e te hāmani-’ino-ra’a e tupu i ni’a ia tātou, ’ia ha’apūai ato’a ia tātou i mua i te mo’era’a te feiā herehia ’e i te māuiui o te ’ā’au, ma te fa’atae mai i te hau e tauturu ia tātou ’ia fa’a’oroma’i i te mau tāmatara’a o te orara’a, ma te fa’aora i tō tātou ’ā’au.
E ti’a ato’a i te Mesia ’ia fa’aora ia tātou i te taime e hara tātou. E hara tātou mai te mea ē ’ua ’ite tātou tē ’ōfati ra tātou i te mau ture a te Atua.8 ’Ia hara tātou, e vi’ivi’i tō tātou vārua. E ’ore te mea vi’ivi’i e pārahi i pīha’i iho i te Atua.9 « ’Ia tāmāhia tātou i te hara, ’ua fa’aorahia [ïa] tātou i te pae vārua ».10
’Ua ’ite te Atua te Metua ē, e hara tātou, ’ua fa’aineine rā ’oia i te hō’ē rāve’a ’ia fa’aorahia tātou. ’Ua ha’api’i Elder Lynn G. Robbins : « E ’ere te tātarahapara’a i te fa’anahora’a piti [a te Atua] mai te peu e manuia ’ore tātou. Te tātarahapara’a, ’o tāna ïa fa’anahora’a, i tōna ’itera’a e nā reira tātou ».11 ’Ia hara tātou, tē vai nei tā tātou rāve’a nō te mā’iti i roto i te maita’i ’e te ’ino. E mā’iti tātou i te maita’i ’ia tātarahapa ana’e tātou i muri iho i te hara. Nā roto ia Iesu Mesia ’e tāna tusia tāra’ehara, e nehenehe tātou e fa’aorahia i tā tātou mau hara ’e e fa’aho’ihia i mua i te aro o te Atua te Metua, mai te peu e tātarahapa tātou. ’Aita te fa’aorara’a pae vārua i te hō’ē noa pae—e tītau te reira i te mana ora o te Fa’aora ’e tae noa atu i te tātarahapara’a pāpū i te pae o te ta’ata hara. Te feiā e mā’iti ’eiaha e tātarahapa, tē ha’apae nei ïa rātou i te ora tā te Mesia e pūpū nei. Nō rātou nei, e au ra ïa ē, ’aita e fa’aorara’a i ha’apa’ohia.12
I te tauturura’a vau i te ta’ata ’ia tātarahapa, ’ua māere roa vau ia rātou i roto i te hara, e mea fifi nō rātou ’ia rave i te mau fa’aotira’a tano. E fa’aru’e te Vārua Maita’i ia rātou, ’e pinepine rātou i te tāfifi nō te rave i te mau mā’itira’a e ha’afātata atu ā ia rātou i te Atua. E taputō noa rātou e rave rahi ’āva’e ’e matahiti atu, ma te ha’amā ’e te mata’u i te mau fa’ahope’ara’a o tā rātou mau hara. Pinepine rātou i te mana’o ē, e’ita roa e nehenehe e taui ’aore rā e fa’a’orehia te hara. Pinepine au i te fa’aro’o mai i tō rātou mata’u ē, ’ia ’ite noa atu te feiā i here ia rātou i tā rātou i rave, e’ita fa’ahou rātou e here mai ’aore rā e fa’aru’e mai rātōu ia rātou. ’Ia pe’e rātou i teie huru ferurira’a, e fa’aoti rātou e fa’aea noa ’e e fa’ataere i tā rātou tātarahapara’a. E mana’o hape rātou ē, e mea maita’i a’e ’eiaha e tātarahapa i teienei, e’ita ïa rātou e ha’amāuiui atu ā i te feiā tā rātou i here. I roto i tō rātou ferurira’a, e mea maita’i a’e te māuiui i muri mai i teie orara’a, i te haerera’a nā roto i te tātarahapara’a i teienei. Te mau taea’e ’e te mau tuahine, e ’ere roa atu i te mana’o maita’i ’ia fa’ataime i te tātarahapara’a. Tē fa’a’ohipa pinepine nei te ’enemi i te mata’u ’ia ’ore tātou ’ia fa’a’ohipa vave i tō tātou fa’aro’o ia Iesu Mesia.
’Ia fa’aruru tei herehia i te parau mau nō te hara i ravehia, noa atu tō rātou pēpē rahi, e mea pinepine rātou i te hina’aro e tauturu mai i te ta’ata tātarahapa mau, ’ia taui ’e ’ia fa’afaite ’e te Atua. ’Oia mau, e vitiviti te fa’aorara’a pae vārua ’ia fā’i te ta’ata hara ’e ’ia hā’atihia ’oia e rātou tei here iāna ’e tei tauturu iāna ’ia fa’aru’e i tāna mau hara. E ha’amana’o ato’a ē, e mea pūai ato’a Iesu Mesia nō te fa’aora i te māuiui o te feiā hara ’ore tei fāriu iāna ra.13
’Ua nā ’ō te peresideni Boyd K. Packer : « E mamae tō tātou vārua ’ia rave ana’e tātou i te mau hape ’e ’ia rave ana’e tātou i te hara. ’Eiaha mai tō tātou mau tino tāhuti, ’ia hope ana’e te rāve’a nō te tātarahapara’a, ’aita ïa e rifa e toe mai maoti te tāra’ehara a Iesu Mesia. Te fafaura’a : ‘Inaha, ’o ’oia ’o tei tātarahapa i tāna ra mau hara, ’ua fa’a’orehia ïa te reira, ’e e ’ore ho’i au, ’o te Fatu e ha’amana’o fa’ahou ā i te reira’ [Te Parau Ha’api’ira’a ’e te mau Parau Fafau 58:42] ».14
’Ia tātarahapa tātou « ma te ’ā’au hina’aro hō’ē »,15 « e faʼatupu-vave-hia te rāveʼa rahi o te ora » i roto i tō tātou orara’a.16 E ora tō tātou māuiui i te Fa’aora.
Te hoa misiōnare ’e te feiā i te fare ma’i tei rave i tā māua tamaiti tei ro’ohia i te ’ati uaua roro i roto i tāna misiōni, ’ua ha’a vave rātou. ’Ua fāri’i tā māua tamaiti i te rā’au nō te fa’a’āfaro i taua ’ati ra. ’Ua fa’a’āfarohia te ha’aparuparura’a tino e vai noa i ni’a iāna i tōna orara’a tāhuti tā’āto’a, ’āhani ’aita. Nā reira ato’a, vitiviti noa atu tātou i te tātarahapa ’e i te fa’atae mai i te tāra’ehara a Iesu Mesia i roto i tō tātou orara’a, vitiviti noa ato’a atu tātou i te ora i te ’ino o te hara.
’Ua pūpū te peresideni Russell M. Nelson i teie anira’a : « ’Outou… tei haere ’ē… tē ani nei au ia ’outou ’ia ho’i mai. Ta’a ’ē noa atu te māna’ona’ora’a ’e te fifi, tē vai nei te pārahira’a nō ’outou i roto i teie ’Ēkālesia, te ’Ēkālesia a te Fatu. E ha’amaita’ihia ’outou ’e te mau u’i i muri mai nā roto i tā ’outou mau ’ohipa i teie taime nō te ho’i i ni’a i te ’ē’a nō te fafaura’a ».17
E tītau tō tātou fa’aorara’a pae vārua ’ia auraro tātou i te mau ture i tu’uhia mai e te Fa’aora. ’Eiaha tātou e fa’ataere ! ’Ia ’ohipa tātou i teiera’a ra mahana e ti’a ai ! ’A ’ohipa i teienei ’ia ’ore te ha’aparuparura’a vārua e ārai i tō ’outou haerera’a mure ’ore i mua. Nā roto i tā’u mau parau, mai te peu ’ua tae mai te mana’o ē, tītauhia ’ia ani i te hō’ē ta’ata ’ia fa’a’ore mai i te hapa, tē ani nei au ia ’outou ’ia haere. ’A parau ia rātou i te mea tā ’outou i rave. ’A ani i te fa’a’orera’a hapa. Mai te mea ’ua rave ’outou i te hō’ē hara e ha’afifi i tō ’outou ti’amāra’a nō te hiero, tē ani nei au ia ’outou ’ia fārerei i tō ’outou ’episekōpo—i teiera’a ra mahana. ’Eiaha e fa’ataere.
Tō’u mau taea’e ’e mau tuahine, e Metua i te Ra’i te Atua nō tātou. ’Ua tu’u ’oia i te mana ato’a ’e te ’ite i tāna Tamaiti here, ’o Iesu Mesia. ’Aua’a a’e ’oia, e fa’aorahia te fifi pae tino o te mau ta’ata ato’a ’ia tae i te hō’ē mahana. ’Aua’a a’e te tāra’ehara a Iesu Mesia, ’ia mā’iti tātou i te tātarahapa ’e i te fāriu hope i tō tātou ’ā’au i ni’a i te Fa’aora, e fa’aora ïa ’oia i tō tātou māuiui pae vārua. E nehenehe te reira fa’aorara’a e ha’amata i reira ra. Nā tātou e mā’iti. Tē hina’aro ra ānei tātou i te ora ?
Tē fa’a’ite pāpū nei au ē, ’ua ’aufau Iesu Mesia i te ho’o ’ia ora tātou. Tītauhia rā ’ia mā’iti tātou ’ia rave i te rā’au fa’aora tāna e pūpū nei. ’A rave i teiera’a ra mahana. ’Eiaha e fa’ataere. I te i’oa o Iesu Mesia, ’āmene.