Tē huti nei te peresideni Nelson i te ’ē’a
’Ua parau a’o te peresideni Russell M. Nelson ia tātou tāta’itahi ’ia hāmani maita’i atu ā, ’ia riro rahi atu ā mai te Mesia ’e ’ia pūai atu ā i te pae vārua ’a aupuru ai tātou i te mau ta’ata, ’e ’ua hōro’a mai ’oia i te hi’ora’a nō te reira nā roto i te huru o tāna tāvinira’a, mai te ’āmuira’a rahi hope’a mai ā.
I muri noa mai i te ’āmuira’a rahi nō ’Ēperēra 2018, ’ua reva te peresideni Nelson nō te hō’ē tere, ’ōna ’e tāna vahine, ’o Wendy, ’e ’o Elder Jeffrey R. Holland nō te pupu nō te Tino ’Ahuru Ma Piti ’āpōsetolo ’e tāna vahine ’o Patricia, i Peretāne, i ’Īserā’ela, i Kenya, i Zimbabwe, i Inidia, i Thailand, i Taina ’e i Vaihī (Marite).
I roto i te tahi tere i muri iho, ’ua fārerei te peresideni Nelson i te mau melo, te mau misiōnare, te feiā fa’atere ’e te mau hoa o te ’Ēkālesia i te tō’o’a o te rā, i rōpū ’e i te hiti’a o te rā nō Canada ; i Seattle, Washington (Marite) ; ’e i Rēpupirita Tominita—i reira ’oia i te paraparaura’a nā roto i te reo pāniora nō te hō’ē taime roa, ’o te taime mātāmua te hō’ē Peresideni o te ’Ēkālesia i hōro’a ai i te hō’ē a’ora’a nā roto i te hō’ē reo ’ē i te reo peretāne.
I roto i te mau rurura’a ’e te mau purera’a, ’ua ha’api’i te peresideni Nelson nō ni’a i te i’oa ti’a o te ’Ēkālesia ; te fa’a’itera’a i te ’evanelia ia vetahi ’ē ; te poiherera’a i te Buka a Moromona ; te huru nō te orara’a i te ’evanelia e ha’amaita’ihia ai i te orara’a ; te huru o te ’ē’a o te Mesia, ’o te ’ē’a ïa nō te ’oa’oa ’e te pōpou ; i teienei ’e i te mau tau mure ’ore ; te pure ; te fa’arirora’a i te ’utuāfare ’ei vāhi mo’a nō te mau tamari’i ; te fa’a’ohipara’a i te ti’amāra’a ’ia mā’iti nō te upo’oti’a i ni’a i te mau fa’ahemara’a ’e nō te pe’e i te Fa’aora ; te ha’apa’ora’a ia vetahi ’ē ’e te fa’aineinera’a nō te hiero ’e te fāri’ira’a i te mau ha’amaita’ira’a e tae mai nā roto i te hiero.
’Ua paraparau ato’a te peresideni ’e te tuahine Nelson i roto i te hō’ē purera’a nō te feiā ’āpī ’ati a’e i te ao i te 3 nō Tiunu 2018, i reira tō te peresideni Nelson paraura’a ē, te feiā ’āpī e tāpūra iāna i roto i te « nu’u a te Fatu » ’e e tauturu i te ha’aputuputu ia ’Īserā’ela, e rāve’a tā rātou nō te riro « ’ei tufaʼa rahi nō te tahi mea rahi, te tahi mea faʼahiahia ! » ’Ua fa’aitoito ’oia i te feiā ’āpī ’ia fa’aea i te tūru’i tāmau noa i ni’a i te mau rāve’a tūreiara’a sōtiare, ’ia fa’atusia i te tahi taime nō te Fatu, ’ia rave i te hō’ē hi’opo’ara’a pāpū o tō rātou orara’a ’e te Fatu, ’ia pure i te mahana tāta’itahi ’ia fāri’i te mau tamari’i ato’a a te Atua i te ’evanelia, ’e ’ia riro ’ei māramarama nō te ao.