Te tauturura’a a te mau tuahine i te haʼaputuputuraʼa ia ’Īserāʼela
Nā te peresideni Russell M. Nelson
Tē tu’u atu nei au i te hō’ē tāparura’a peropheta ia ’outou, te mau vahine o te ’Ēkālesia, ’ia hāmani i te ananahi nā roto i te tauturura’a i te ha’aputuputu ia ’Īserā’ela i purara.
E mea au roa ’ia ti’a i rotopū ia ’outou e au mau tuahine here ’e te tao’a rahi. Penei a’e i teie ’ohipa i tupu ’aita i maoro a’enei ’outou e ’ite ri’i mai ai i tō’u mana’o nō ’outou ’e i te ’aravihi rahi roa tei hōro’ahia ’outou.
I te hō’ē mahana, tē paraparau ra vau i te hō’ē ’āmuira’a i Amerika ’Apato’a, tē haere ’ana’anatae roa ra vau i ta’u tumu parau, ’e i te taime rahi o tā’u a’ora’a ’ua nā ’ō atu vau : « ’O vau te metua vahine e 10 tamari’i, e ti’a iā’u ’ia parau ē… » ’e ’ua fa’aoti a’era vau i tā’u a’ora’a.
’Aita vau i ha’apa’o atu ē, e metua vahine tā’u i parau. ’Ua mana’o iho ā te ta’ata huri parau ē, ’ua hape te parau, ’e ’ua taui ’oia i te parau metua vahine ’ei metua tāne, ’aita ïa te ’āmuira’a i ’ite ē, ’ua parau vau iā’u ’ei metua vahine. ’Ua fa’aro’o rā ta’u vahine ’o Wendy, ’e ’ua au roa ïa ’ōna i teie hape iti nō’u.
I terā taime, ’ua māpiha mai te hina’aro rahi o tō’u ’ā’au e fa’atupu i te tahi ’ohipa ta’a ’ē i roto i te ao—mai te hō’ē noa metua vahine e nehenehe e rave. I te roara’a o tō’u orara’a, ’ia anihia mai iā’u nō te aha vau i mā’iti ’ia riro ’ei taote, ’o teie noa tā’u pāhonora’a : « E’ita pa’i tā’u e nehenehe e mā’iti ’ia riro ’ei metua vahine ».
’Ia ta’a maita’i ia ’outou ē, ’ia fa’a’ohipa vau i te parau metua vahine, ’aita vau e parau noa nei nō te mau vahine i fānau ’aore rā i fa’a’amu i te tamari’i i roto i teie orara’a. Tē parau ra vau nō te tā’āto’ara’a o te mau tamāhine pa’ari a tō tātou nā Metua i te ra’i. Pauroa te mau vahine e mau metua vahine rātou, maoti tō rātou hope’a hanahana mure ’ore.
Nō reira, i teie pō, ’o vau te metua tāne e 10 tamari’i—e iva tamāhine ’e hō’ē tamaiti—’e te Peresideni o te ’Ēkālesia, tē pure nei au ’ia ’ite mai ’outou i tō’u mana’o hōhonu nō ’outou—’o vai ’outou ’e te maita’i ato’a tā ’outou e nehenehe e rave. ’Aita e ta’ata e nehenehe e rave i tā te hō’ē vahine parau ti’a e nehenehe e rave. ’Aita e ta’ata e nehenehe e tāhōho’a i te mana ha’amaita’i a te hō’ē metua vahine.
E ti’a i te mau tāne, ’e e mea pinepine ho’i rātou, i te fa’a’ite i te here o te Metua i te Ao ra ’e o te Fa’aora nō vetahi ’ē. E hōro’a ta’a ’ē rā tā te mau vahine—e hōro’a hanahana. Tē vai nei tō ’outou ’aravihi nō te ’ite i te mea e tītauhia nō te hō’ē ta’ata—’e te taime ato’a ’ua hina’aro ’oia i te reira. E ti’a ia ’outou ’ia toro i te rima, ’ia tāmarū, ’ia ha’api’i ’e ’ia ha’apūai i te ta’ata i te taime iho e tītauhia te reira.
E mea ta’a ’ē te hi’ora’a a te mau vahine ’e te mau tāne, ’auē rā tō mātou hina’aro i tā ’outou hi’ora’a ! Maoti tō ’outou nātura, e feruri nā mua ’outou ia vetahi ’ē, e feruri ’outou i te maita’i o te hō’ē ’ōpuara’a i ni’a ia vetahi ’ē, ta’a ’ē noa atu te reira.
Mai tā te peresideni Eyring i parau, ’o tō tātou metua vahine hanahana ra ’o ’Eva—’e tāna hi’ora’a ātea roa i te fa’anahora’a a tō tātou Metua i te Ao ra—i ’ōmua i tā tātou e parau nei « te Hi’ara’a ». Maoti tāna mā’itira’a pa’ari ’e te itoito, nā reira ato’a tō ’Adamu fa’aotira’a e turu i te reira, i haere ai te fa’anahora’a ’oa’oa a te Atua i mua. Maoti rāua i noa’a ai ia tātou tāta’itahi ’ia haere mai i ni’a i te fenua nei, ’ia fāri’i i te hō’ē tino ’e ’ia fa’a’ite ē, e mā’iti tātou ’ia ti’a nō Iesu Mesia i’ō nei, mai tā tātou i rave hou te tāhuti nei.
E au mau tuahine here ē, e mau hōro’a pae vārua ta’a ’ē tō ’outou, ’e te au ho’i nō te reira. I teie pō, tē a’o nei au ia ’outou, ma tō’u ’ā’au ato’a, ’ia pure nō te māramarama i tā ’outou mau hōro’a pae vārua—’ia ’atu’atu i te reira, ’ia fa’a’ohipa ’e ’ia fa’a’ā’ano atu ā, ’ia ’ā’ano atu ā i tā ’outou i rave a’enei. E taui te ao ia ’outou ’ia nā reira ’outou.
’Outou te mau vahine, tē fa’auru nei ’outou i te ta’ata ’e tē ha’amau nei ’outou i te fāito hi’ora’a ti’a e pe’e. E parau tuatāpapa atu vau ia ’outou i nā fa’aarara’a rahi e piti i ravehia i tā tātou ’āmuira’a rahi i ma’iri. ’O ’outou, e au mau tuahine, te tāviri.
’A tahi, te aupurura’a. Te fāito rahi hau ’ē nō te aupurura’a, ’o tō tātou ïa Fa’aora, ’o Iesu Mesia. ’Ia hi’ohia, e mea fātata a’e, ’e i fātata noa na, te mau vahine i terā fāito, hau atu i te tāne. ’Ia aupuru mau ’outou, e pe’e ’outou i tō ’outou mau mana’o nō te tauturu ia vetahi ’ē ’ia ’ite rahi atu ā i te here o te Fa’aora. Terā pae nō te aupurura’a, tei roto ïa i te mau vahine parau ti’a. ’Ua mātau vau i te mau vahine e pure i te mau mahana ato’a ē : « ’O vai tā ’oe i fa’ata’a e tauturu atu vau ? »
Nā mua a’e i te fa’aarara’a nō ’Ēperēra 2018 nō ni’a i te rāve’a teitei a’e ’e te mo’a a’e nō te ha’apa’o ia vetahi ’ē, e huru tāpa’o noa ana te mau tāne i tā rātou hāhaerera’a ’utuāfare i te parau « ’ua ravehia » ’ei reira rātou e vaiiho atu ai.
’Outou rā, ’ia ’ite ’outou ē, tē hina’aro ra te hō’ē tuahine tā ’outou i hāhaere i te tauturu, e pāhono atu ’outou i terā iho taime ’e i te roara’a ato’a o te ’āva’e. Nō reira, nā tā ’outou huru ravera’a i te hāhaerera’a i fa’auru i te haerera’a i ni’a i te fāito o te aupurura’a.
Te piti, i te ’āmuira’a rahi i ma’iri, ’ua taui-ato’a-hia te fa’anahora’a o te mau pupu autahu’ara’a a Melehizedeka. ’Ia taputō mātou i te ’imira’a nāhea i te tauturu i te mau tāne o te ’Ēkālesia ’ia amo rahi atu ā i tā rātou mau hōpoi’a, e feruri māite mātou i te hi’ora’a o te Sōtaiete Tauturu.
I roto i te Sōtaiete Tauturu, e ruru ’āmui te mau vahine matahiti rau nā reira ato’a te mau vahine i tae i terā ’e terā taime rau o te orara’a. Tē vai nei te mau tāmatara’a hō’ē roa i terā tau ’e terā tau o te orara’a, noa atu rā, teie ’outou nei, i terā hepetoma ’e terā hepetoma, tē ’āmui noa nei ’outou, tē pa’ari nei ’e tē ha’api’i ’āmui nei i te ’evanelia, ma te fa’atupu i te tahi ’ohipa ta’a ’ē i roto i teie nei ao.
I teienei, nō te pe’e i tō ’outou hi’ora’a, e mau melo te mau taea’e tei mau i te autahu’ara’a a Melehizedeka nō te pupu peresibutero. Tō rātou matahiti, mai te 18 ïa i te 98 (’e hau atu paha), ’ua rau ato’a tō rātou fāito ’ite nō ni’a i te autahu’ara’a ’e te ’Ēkālesia. I teienei, e ti’a ia rātou ’ia fa’atupu i te tā’amura’a taea’e pūai a’e, ’ia ha’api’i ’āmui ’e ’ia manuia a’e i te ha’amaita’i i te ta’ata.
Tē ha’amana’o nei ’outou, i te ’āva’e Tiunu i ma’iri, ’ua paraparau māua te tuahine Nelson i te feiā ’āpī o te ’Ēkālesia. ’Ua ani māua ia rātou ’ia fa’aō mai i roto i te nu’u feiā ’āpī a te Fatu nō te ha’aputuputu ia ’Īserā’ela i nā pae e piti o te pāruru. Teie ha’aputuputura’a, ’o « te tītaura’a fa’ahiahia roa a’e ïa, te ’ōpuara’a fa’ahiahia roa a’e ’e te ’ohipa fa’ahiahia roa a’e i ni’a i te fenua nei » !1
E ’ōpuara’a te reira e hina’aro roa nei i te mau vahine, nō te mea nā te vahine e hāmani i te ananahi. Nō reira i teie pō, tē tu’u atu nei au i te hō’ē tāparura’a peropheta ia ’outou, te mau vahine o te ’Ēkālesia, ’ia hāmani i te ananahi nā roto i te tauturura’a i te ha’aputuputu ia ’Īserā’ela i purara.
I hea e ha’amata ai ?
Teie e maha anira’a :
’A tahi, tē ani nei au ia ’outou ’ia rave i te hō’ē ha’apaera’a te mau rāve’a tūreiara’a sōtiare, e 10 mahana, ha’apae i te mau rāve’a ha’apararera’a ato’a e fa’atae i te mana’o ’ino ’e te vi’ivi’i i tō ’outou nei ferurira’a. ’A pure ’ia ’ite mai ’outou e aha terā mau mea e vaiiho atu i roto i tā ’outou ha’apaera’a. E hitimahuta ’outou i te maita’i o terā 10 mahana ha’apaera’a. E aha te mea tā ’outou e ’ite ra i muri mai i te ha’apaera’a i te mau hi’ora’a o te ao tei ha’apēpē noa na i tō ’outou vārua ? Tē vai ra ānei te tauira’a i teienei i roto i te mea tā ’outou e hina’aro e tu’u i tō ’outou taime ’e tō ’outou pūai ? ’Ua taui ānei tā ’outou mau ’ohipa e rave mātāmua roa—noa atu e tauira’a na’ina’i ? Tē a’o nei au ia ’outou ’ia pāpa’i i te mau mana’o e tae mai ’e ’ia rave i te reira.
Te piti, tē ani nei au ia ’outou ’ia tai’o i te Buka a Moromona mai teie atu taime ē tae atu i te hope’a o te matahiti. Fifi noa atu ā tō ’outou ferurira’a e rave i te reira nō te mau mea ato’a tā ’outou e tāmata noa nei i te fa’anahonaho i roto i te orara’a, mai te peu rā e fāri’i ’outou i teie anira’a ma te ’ā’au tae roa, e tauturu mai te Fatu ia ’outou ’ia ’ite i te rāve’a nō te rave i te reira. ’E mai te mea e tuatāpapa ’outou nā roto i te pure, tē parau fafau atu nei au ē, e matara mai te ra’i nō ’outou. E ha’amaita’i te Fatu ia ’outou i te fa’aurura’a rahi a’e ’e i te heheura’a rahi a’e.
’Ia tai’o ’outou, tē fa’aitoito nei au ia ’outou ’ia tāpa’o i te ’īrava tāta’itahi e paraparau ’e e fa’atoro i ni’a i te Fa’aora. ’Ei reira, ’ia vai te mana’o pāpū e paraparau nō te Mesia, e ’oa’oa i te Mesia ’e e poro i te Mesia i tō ’outou ’utuāfare ’e te mau hoa.2 E ha’afātata atu ā ’outou ’e rātou i te Fa’aora nā roto i terā ’ohipa. ’E e ha’amata te mau tauira’a ’e tae noa atu i te mau semeio i te tupu mai.
I teie po’ipo’i, ’ua fa’aarahia nō ni’a i te mau hora ’āpī i te sābati ’e te fa’anahora’a ha’api’ira’a tei fa’atumuhia i ni’a i te ’utuāfare, turuhia e te ’Ēkālesia. ’O ’outou, e au mau tuahine here, te tāviri nō te manuiara’a te reira tauto’ora’a ’āpī ’e te ’aifāito maita’i ’e te au i te pae nō te ha’api’ira’a ’evanelia. ’A ha’api’i na ia rātou tā ’outou e here ē, e mea ua nā ’outou i te mea tā ’outou e ’apo nei i roto i te mau pāpa’ira’a mo’a. ’A ha’api’i ia rātou nāhea i te fāriu i ni’a i te Fa’aora nō te tītau i tōna mana fa’aora ’e te tāmā i te taime e hara rātou. ’E ’a ha’api’i ia rātou nāhea i te tītau i tōna mana ha’apūai i te mau mahana ato’a o te orara’a.
Te toru, ha’amau i te hō’ē tārena nō te haere pinepine i te hiero. E tītau paha te reira i te tahi atu ā fa’atusiara’a i roto i tō ’outou orara’a. Maoti te haere-pinepine-ra’a i te hiero e ti’a ai i te Fatu ’ia ha’api’i ia ’outou nāhea i te tītau i te mana autahu’ara’a tei hōro’ahia ia ’outou i roto i tōna hiero. ’Outou tei ātea i te hiero, tē ani nei au ia ’outou ’ia tuatāpapa nō ni’a i te hiero nā roto i te pure, i roto i te mau pāpa’ira’a mo’a ’e i roto i te mau parau a te mau peropheta ora. ’A ’imi ’ia ’ite rahi atu ā, ’ia māramarama rahi atu ā, ’ia putapū rahi atu ā nō ni’a i te hiero, hau atu i te nā mua a’enei.
I roto i tā māua purera’a nō te feiā ’āpī ’ati a’e i te ao i Tiunu ra, ’ua paraparau vau nō te hō’ē taure’are’a tamāroa tei taui roa tōna orara’a i te tauira’a tōna nā metua i tāna niuniu roro uira ’ei niuniu pitopito noa. E vahine taiā ’ore ’e te fa’aro’o te metua vahine o teie taure’are’a. ’Ua hi’o ’oia i tāna tamaiti tē hahi ’ē ra i ni’a i te mau mā’itira’a ’aita e tāvinira’a misiōnare i te hope’a. ’Ua ’āfa’i ’oia i tāna mau tāparura’a i te hiero nō te ’ite mai nāhea i te tauturu maita’i a’e i tāna tamaiti. ’Ua pe’e atura ’oia i te mau mana’o ato’a i tae mai.
Tē nā ’ō ra ’oia : « ’Ua ’ite au i te Vārua i te arata’ira’a iā’u nō te hi’opo’a i te niuniu a ta’u tamaiti, i te taime e noa’a mai te tahi mau mea ta’a ’ē. ’Aita vau i ’ite nāhea i te haere nā roto i terā mau niuniu roro uira, ’ua arata’i rā te Vārua iā’u nā rotoroto i te mau rāve’a tūreiara’a sōtiare ato’a, ’o tā’u ho’i ’aita e fa’a’ohipa nei ! ’Ua ’ite au e tauturu te Vārua i te mau metua e ’imi i te arata’ira’a nō te pāruru i tā rātou mau tamari’i. [Nā mua roa] ’ua riri roa mai ta’u tamaiti iā’u… E toru noa ra mahana i muri mai, ’ua ha’amāuruuru mai ’oia iā’u ! ’Ua ’itehia iāna te ’ohipa ta’a ’ē ».
’Ua taui roa ’ino te peu ’e te huru o tāna tamaiti. ’Ua tauturu rahi a’e ’oia i te fare, e mata ’ata’ata a’e ’e ’ua fa’aro’o maita’i a’e ’oia i te purera’a. ’Ua au roa ’oia i te tāvinira’a i te tahi taime i te vāhi bāpetizora’a o te hiero ’e te fa’aineinera’a nō tāna misiōni.
Te maha o te anira’a, nō ’outou tei ti’a te matahiti, ’a ha’a hope roa i roto i te Sōtaiete Tauturu. Tē a’o nei au ia ’outou ’ia tuatāpapa i te fa’ahitira’a fā a te Sōtaiete Tauturu. E mea fa’auru mau. Penei a’e e arata’i te reira i te hāmanira’a i tā ’outou iho fa’ahitira’a fā nō tō ’outou iho orara’a. Tē ha’apehapeha (supplier) ato’a nei au ia ’outou ’ia au roa i te mau parau mau e vai nei i roto i te fa’ahitira’a a te Sōtaiete Tauturu tei pūharahia ’a 20 matahiti i teienei.3 Tē vai nei te hōho’a nō te reira fa’ahitira’a tē tautau ra i roto i te piha tōro’a o te Peresidenira’a Mātāmua. E ’ana’anatae noa vau i te mau taime ato’a e tai’o vau i te reira. Tē fa’ata’a nei te reira ’o vai ’outou ’e ’o vai tā te Fatu i hina’aro ia ’outou ’ia riro i teie iho taime nei ’a rave ai ’outou i tā ’outou tuha’a nō te ha’aputuputu ia ’Īserā’ela i purara.
E au mau tuahine, tē tītau nei mātou ia ’outou ! « Tē tītau nei mātou i tō ’outou pūai, tō ’outou fa’afāriura’a, tō ’outou ti’aturi pūai, tō ’outou ’aravihi ’ia fa’atere, tō ’outou pa’ari, ’e tō ’outou reo ».4 E’ita e roa’a ia mātou ’ia ha’aputuputu ia ’Īserā’ela mai te mea ’aita ’outou.
’Ua here au ia ’outou ’e tē ha’amāuruuru nei au ia ’outou ’e tē ha’amaita’i nei au ia ’outou i te ’aravihi nō te vaiiho i te ao i muri ia ’outou ’a tauturu ai i teie ’ohipa faufa’a hau a’e ’e te rū. E ’āmui tātou e ti’a ai ia tātou ’ia rave i te mau mea ato’a e tītau te Metua i te Ao ra ia tātou nō te fa’aineine i te ao nō te Tae-piti-ra’a mai o tāna Tamaiti here.
’O Iesu te Mesia. ’O teie tāna ’Ēkālesia. ’O tā’u ïa e fa’a’ite pāpū nei i te i’oa o Iesu Mesia, ’āmene.