’Āmui i te mau mea ato’a i te Mesia ra
Nā Elder David A. Bednar
Nō te pupu nō te Tino ’Ahuru Ma Piti ’āpōsetolo
E mani’i mai te mana o te ’evanelia a te Fa’aora nō te taui ’e nō te ha’amaita’i ia tātou maoti te hāro’aro’ara’a ’e te fa’a’ohipara’a i te tū’ati’atira’a o tō te reira ha’api’ira’a tumu ’e te mau parau tumu ’e te mau ravera’a.
E mauiha’a faufa’a rahi te taura, e tao’a tā tātou pā’āto’a i mātau. E hāmanihia te taura i te mau fenu ’ahu, te nape, te niuniu ’e te tahi atu mātēria, tei tāviriviri-hō’ē-hō’ē-hia ’aore rā tei firi-’āmui-hia. Te mea fa’ahiahia rā, e ti’a i te tahi mātēria iti e firi-’āmui-hia ’e ’ua riro mai ’ei mātēria pa’ari mau. ’E nō reira, ’ia fa’atū’ati-maita’i-hia ’e ’ua tā’amu-maita’i-hia te mau mātēria ri’i noa, e nehenehe e noa’a mai te tahi mauiha’a fa’ahiahia mau.
Mai te taura e pa’ari i te mau fenu tāta’itahi e rave rahi tei firihia, e hōro’a mai te ’evanelia a Iesu Mesia i te hi’ora’a rahi roa a’e nō te parau mau nā reira ato’a te mau ha’amaita’ira’a tao’a rahi, ’ia ha’apa’o maoti rā tātou i te a’o a Paulo ’ia « ’āmui… i te mau mea ato’a i te Mesia ra, tō te ra’i, ’e tō te ao nei ; ’ei iāna ».1 Te mea faufa’a rā, ’ua fa’atumuhia ’e ’ua rōtahihia te reira ’āmuira’a tumu o te parau mau i ni’a i te Fatu ra Iesu Mesia, ʼo ʼoia hoʼi « te ’ēʼa, te parau mau, ʼe te ora ».2
Tē pure nei au ’ia ha’amāramarama te Vārua Maita’i ia tātou tāta’itahi ’a feruri ai tātou nāhea te parau tumu nō te ’āmuira’a i te mau mea ato’a i te Mesia ra e tano i tō tātou orara’a tāmahana, nō te ha’api’i ’e nō te ora i tāna ’evanelia i fa’aho’ihia mai.
E tau heheura’a
Tē ora nei tātou i te hō’ē tau fa’ahiahia, e tau heheura’a nō te ’Ēkālesia a Iesu Mesia i fa’aho’i-fa’ahou-hia mai. Te mau fa’atanora’a rarahi i fa’aarahia i teie mahana, nō te hō’ē noa ïa fā rahi roa : e ha’apūai i te fa’aroo i te Metua i te Ao ra ’e i tāna fa’anahora’a ’e i tāna Tamaiti Iesu Mesia ’e tāna tāra’ehara. ’Aita te mau hora o te sābati i ha’apoto-noa-hia. ’Aita ! I teienei rā, tei ia tātou te rāve’a ’e te hōpoi’a rahi atu ā, ’ei ta’ata hō’ē ’e ’ei ’utuāfare, ’ia fa’a’ohipa i tō tātou taime nō te ha’amaita’i atu ā i te fa’arirora’a i te sābati ’ei mahana hina’arohia i te fare ’e i te purera’a.
I ’Ēperēra ra, e ’ere te fa’anahora’a ana’e o te mau pupu autahu’ara’a tei taui. ’Ua tūra’i-pūai-ato’a-hia te parau nō te rāve’a teitei a’e ’e te mo’a a’e nō te tāvinira’a i tō tātou mau taea’e ’e mau tuahine.
Mai te mau fenu firi o te taura e hāmani nei i te tahi mauiha’a pa’ari maita’i ’e te vai maoro, e mau tuha’a tū’ati’ati teie mau ’ohipa ato’a nō te hō’ē tauto’ora’a tāhō’ē nō tē fa’atano maita’i a’e i te rōtahira’a, i te mau mātēria ’e i te ’ohipa a te ’Ēkālesia a te Fa’aora i fa’aho’ihia mai i ni’a i tāna misiōni tumu : ’oia ho’i, tauturu i te Atua i roto i tāna ’ohipa e fa’atupu i te fa’aorara’a ’e te fa’ateiteira’a o tāna mau tamari’i. ’Eiaha na e rōtahi nā mua roa i ni’a i te fa’anahonahora’a o te mea i fa’aarahia. ’Eiaha tātou e vaiiho i te mau terera’a ’ohipa e ha’apōiri i te mau tumu pae vārua rahi roa e ravehia nei teie mau tauira’a.
Tō mātou nei hina’aro, ’oia ho’i, ’ia pūai mai te fa’aroo i ni’a i te fenua nei i te fa’anahora’a a te Metua ’e i te misiōni tāra’ehara a te Fa’aora, ’e ’ia ha’amauhia te fafaura’a mure ’ore a te Atua.3 Tā mātou noa fā, ’o te fa’a’ōhiera’a ïa i te fa’afāriura’a tāmau i te Fatu ’e ’ia here hope a’e ’e ’ia tāvini manuia a’e i tō tātou mau taea’e ’e mau tuahine.
Te tātuha’ara’a ’e te fa’ata’ara’a
I te tahi taime, e tātuha’a tātou, te mau melo o te ’Ēkālesia, ma te fa’ata’a ’e ma te fa’a’ohipa i te ’evanelia i roto i tō tātou orara’a nā roto i te ha’amaura’a i te mau tāpura hope’a ’ore nō te mau tumu parau e tuatāpapa ’e te mau ’ohipa e rave. E nehenehe rā te reira huru arata’ira’a e fa’a’ōpiripiri i tō tātou māramaramara’a ’e tā tātou hi’ora’a ātea. ’E hi’o maita’i tātou ē, ’o tē fa’ahahi ’ē tā tātou fa’atumura’a pharisea i ni’a i te mau tāpura ’ohipa, i tā tātou ha’afātatara’a atu i te Fatu.
Te tapitapi ’ore ’e te tāmāra’a, te pōpou ’e te ’oa’oa, te fa’afāriura’a ’e te pāruru e tae mai nō te « [rirora’a tō tātou] ’ā’au i te Atua »4 ’e nō te « [roa’ara’a] tōna ra hōho’a i tō [tātou nei] mata »5 e’ita ïa e noa’a nā roto noa i te ravera’a ’e te tāpa’opa’ora’a i te mau ’ohipa pae vārua ato’a tei tītauhia ia tātou ’ia rave. E mani’i mai rā te mana o te ’evanelia a te Fa’aora nō te taui ’e nō te ha’amaita’i ia tātou maoti te hāro’aro’ara’a ’e te fa’a’ohipara’a i te tū’ati’atira’a o tō te reira ha’api’ira’a tumu ’e tō te reira mau parau tumu ’e mau ravera’a. I te taime noa tātou e ’āmui ai i te mau mea ato’a i te Mesia ra, ma te rōtahi pāpū i ni’a iāna, e ti’a ai i te mau parau mau o te ’evanelia ’ia ’āno’i nō tē fa’ariro ia tātou i te huru ta’ata tā te Atua i hina’aro ia tātou ’ia riro6 ma te fa’aitoito ’e te fa’a’oroma’i ē tae noa atu i te hope’a.7
Ha’api’i ’e nati i te mau parau mau o te ’evanelia
Te ’evanelia a Iesu Mesia, e hōho’a ha’une rahi ïa nō te parau mau « i te ’ati-maita’i-ra’a iāna »8 ’e tei firi-’āmui-hia. ’A ha’api’i ’e ’a nati ’āmui ai tātou i te mau parau mau o te ’evanelia, e ha’amaita’ihia tātou i te hi’ora’a faufa’a rahi ’e i te ’aravihi pae vārua rahi a’e, ma te mata ’ite i te mana o te Fatu i roto i tō tātou orara’a ’e te tari’a fa’aroo i tōna reo.9 ’E nā te parau tumu nō te ’āmuira’a i te mau mea ato’a—’ei iāna—e tauturu ia tātou ’ia taui i te mau tāpura tāpa’opa’ora’a mātaro ’ei hō’ē mea tāhō’ēhia ’e tei pāpū-roa-hia ’e te hope ato’a. E fa’a’ite atu vau i te hi’ora’a nō te mea tā’u e parau nei, hō’ē nō ni’a i te ha’api’ira’a tumu ’e hō’ē nō ni’a i te ’Ēkālesia.
Hiʼoraʼa 1. ’O te hīro’a fa’aroo maha te hō’ē fa’ahōho’ara’a rahi nō te ’āmuira’a i te mau mea ato’a i te Mesia ra : « Tē ti’aturi nei matou ē, ’o teie te mau parau tumu mātāmua ’e te mau ’ōro’a mātāmua o te ’Evanelia : te mātāmua ra, ’o te fa’aroo ïa i te Fatu ra ia Iesu Mesia ; te piti ra, ’o te tatarahapara’a ïa ; te toru ra, ’o te bāpetizo-utuhi-ra’a ïa ’ia matara te hara ; te maha ra, ’o te tu’ura’a rima ïa nō te hōro’ara’a a te Varua Maitai ».10
Te fa’aroo mau, tei te Fatu Iesu Mesia ïa ’e tei roto iāna—iāna ’ei Tamaiti hanahana ’e te fānau tahi a te Metua ’e i roto iāna ’e tāna misiōni i rave fa’aoti. « ’Ua pe’e ho’i iāna tei tītauhia e te ture ra ; ’e tē rave-ani-hia ra e ana tei fa’aroo iāna ra, ’e ’o tē fa’aro’o iāna ra, ’o tē ta’ata ïa rātou e mau i te mau mea maitata’i ato’a ra ; nō reira tē ārai ra ’oia i te parau a te tamari’i a te ta’ata nei ».11 Te fa’aro’o i te Mesia, ’o te ti’aturira’a ïa iāna ’e te tu’ura’a i tō tātou ti’aturi i ni’a iāna ’ei Fa’aora, i ni’a i tōna i’oa ’e i ni’a i tāna i parau mai.
Te fa’ahōpe’ara’a mātāmua ’e te ’ōhie o te ti’aturira’a i te Fa’aora, ’o te tātarahapa ïa ’e te fāriu-’ē-ra’a i te ’ino. ’A fa’a’ohipa ai tātou i te fa’aro’o i te Fatu, ’e i roto iāna, e fāriu ’ōhie tātou i ni’a iāna, e haere tātou iāna ra ’e e tīa’i tātou iāna. Nō reira, te tātarahapa, ’o te ti’aturira’a ïa ’e te tūru’ira’a i ni’a i te Tāra’ehara nō te rave nō tātou i te mea e’ita e noa’a ia tātou i te rave nō tātou iho. Tītauhia ia tātou ’ia « [tūru’i hope i ni’a] i te maita’i nōna, nō tei pūai ’ia fa’aora »12 inaha e mea nā roto ana’e « i te mana, ’e te aroha ’e te maita’i ho’i nō te Mesia mo’a »13 tātou e riro mai ai ’ei ta’ata ’āpī14 ’e e ho’i ai i te hope’a e pārahi i mua i te aro o te Atua.
Te ’ōro’a nō te bāpetizora’a utuhi ’ia matara te hara, tē tītau nei ïa ia tātou ’ia ti’aturi iāna, ’ia tūru’i i ni’a iāna ’e ’ia pe’e iāna. ’Ua fa’a’ite Nephi : « ’Ua ’ite au ē, ’ia pe’e mai ’outou i te Tamaiti, ma te ’ā’au ato’a, ’eiaha ma te paieti ’ore ’e te ha’avare, ma te ’ā’au tae rā, i te tātarahapara’a i tā ’outou na mau hara, i te fa’a’itera’a atu i te Metua ē, ’ua ti’a ia ’outou i te rave i ni’a iho ia ’outou i te i’oa o te Mesia i roto i te bāpetizora’a ; ’oia ïa, i te pe’era’a atu i tō ’outou Fatu ’e tō ’outou Fa’aora i raro i te pape, mai tei au i tāna ra parau ; inaha, ’ei reira ’outou e noa’a ai te Vārua Maita’i ; ’oia ïa, ’ei reira e tae mai ai te bāpetizora’a i te auahi ’e te Vārua Maita’i ».15
Te ’ōro’a nō te tu’ura’a rima nō te hōro’ara’a i te Vārua Maita’i, tē tītau nei ïa ’ia ti’aturi iāna, ’ia tūru’i i ni’a iāna, ’ia pe’e iāna ’e ’ia haere ti’a atu i mua iāna ra ma te tauturu a te Vārua Mo’a ra. Mai tā Nephi i parau : « ’E tenāna… ’ua ’ite au ē, ’ia ’ore te ta’ata e mau pāpū ē tae noa atu i te hope’a, i te onoonora’a atu i te hi’ora’a o te Tamaiti a te Atua ora, e ’ore roa ïa e ora ».16
’Aita te hīro’a fa’aro’o maha e fa’a’ite noa nei i te mau parau tumu ’e te mau ’ōro’a tumu o te ’evanelia i fa’aho’ihia mai. Tē ’āmui ato’a nei rā teie mau parau ti’aturira’a fa’auru i te mau mea ato’a i te Mesia ra : ti’aturi iāna ’e i roto iāna, tūru’i i ni’a iāna, pe’e iāna ’e haere ti’a atu i mua iāna ra—’ei iāna ïa.
Hiʼoraʼa 2. I teienei, tē hina’aro nei au e fa’a’ite nāhea te mau fa’anahora’a ato’a ’e te mau ’ōpuara’a a te ’Ēkālesia e ’āmui nei i te Mesia ra. E rave rahi atu ā mau fa’ahōho’ara’a e nehenehe e rave ; e fa’a’ite noa atu vau i te tahi.
I te matahiti 1978, ’ua fa’aue te peresideni Spencer W. Kimball i te mau melo o te ’Ēkālesia ’ia patu i te pūai o Ziona nā te ao tā’āto’a nei. ’Ua parau ’oia i te feiā mo’a ’ia fa’aea i tō rātou fenua ’āi’a ’e ’ia ha’amau i te mau titi pūai nā roto i te putuputura’a i te ’utuāfare o te Atua ’e te ha’api’ira’a ia rātou i te mau haere’a o te Fatu. ’Ua fa’a’ite ’oia i muri iho ē, e rahi atu ā te mau hiero e patuhia ’e ’ua parau ’oia i te mau ha’amaita’ira’a i ni’a i te feiā mo’a i te vāhi ato’a o te ao rātou e ora ra.17
’A rahi noa ai te mau titi, pūai noa ato’a te hina’aro nō te fare o te mau melo « ’ia riro [’ei vāhi] e [au mai] te mau melo o te ’utuāfare ’ia pārahi, ’ei vāhi e ’āpī tō rātou orara’a ’e e ’ite rātou i te here te tahi i te tahi, te pāturura’a, te māuruuru ’e te fa’aitoitora’a ».18 Nō reira, i te matahiti 1980 ra, ’ua ’āmuihia te mau purera’a o te sābati ’ei toru hora ’ei « tūra’i-fa’ahou-ra’a i te parau nō te hōpoi’a a te ta’ata hō’ē ’e a te ’utuāfare ’ia ha’api’i mai i te ’evanelia, ’ia ora i te ’evanelia ’e ’ia ha’api’i atu i te ’evanelia ».19 ’Ua ha’apāpūhia te reira i roto i « Te ’utuāfare : E Poro’i i tō te Ao nei », tei vauvauhia e te peresideni Gordon B. Hinckley i te matahiti 1995 ra.20
I te ’āva’e ’Ēperēra 1998, ’ua fa’aara te peresideni Hinckley i te patura’a o te mau hiero na’ina’i e rave rahi, mea nā reira te mau ’ōro’a mo’a o te fare o te Fatu i fātata ai i te mau ta’ata ’e i te mau ’utuāfare o te ’Ēkālesia nā te ao nei.21 ’Ua pa’epa’ehia a’era te reira rāve’a fa’atupura’a ’e te ha’amaita’ira’a pae vārua e te tahi ’ohipa pae tino e au i te fa’arava’ira’a iāna iho, maoti te ’āfata moni tāmau nō te ha’api’ira’a i te matahiti 2001 ra.22
I roto i tāna tau fa’aterera’a, ’ua tāmau noa te peresideni Thomas S. Monson i te a’o i te feiā mo’a ’ia haere « e fa’aora » ma te tūra’i i te parau nō te aupurura’a i te feiā veve ’e tei nava’i ’ore ’ei hōpoi’a hanahana i ni’a i te ’Ēkālesia. Ma te tāmau noa i te tūra’i i te fa’aineinera’a pae tino, ’ua ha’amata te ’ōpuara’a a te Piha ’ohipa nō te fa’arava’ira’a iāna iho i te matahiti 2012 ra.
I te mau matahiti i ma’iri, ’ua tūra’ihia ’e ’ua ha’apāpūhia te mau parau tumu rahi nō ni’a i te fa’arirora’a i te Sābati ’ei mahana hina’arohia, i te fare ’e i te purera’a,23 e fa’aineinera’a ïa ia tātou nō te fa’atanora’a o te mau hora purera’a o te sābati tei fa’aarahia i roto i teie tuha’a purera’a o te ’āmuira’a rahi.
’E ’a ono ’āva’e i teienei, ’ua ha’apūaihia ’e ’ua fa’atano-rahi-atu-ā-hia te mau pupu autahu’ara’a a Melehizedeka i ni’a i te mau pupu tauturu nō te fa’atupu i te arata’ira’a teitei a’e ’e te mo’a a’e o te aupurura’a.
Tē ti’aturi nei au ē, ’ia hi’o tātou i te ’āpapara’ahia ’e te tārenara’ahia teie mau ’ohipa i nau ahurura’a matahiti ma’iri, e ti’a ia tātou ’ia ’ite i te hō’ē ’ohipa tāhō’ē ’e te ’āmui ’eiaha rā te tahi noa ’āpapara’a ’opuara’a ta’a ’ē i terā vāhi ’e terā vāhi. « ’Ua heheu mai te Atua i te hōho’a nō te haerera’a i mua i te pae vārua o te ta’ata hō’ē ’e te ’utuāfare, nā roto i te mau ’ōro’a, te ha’api’ira’a, te mau fa’anahora’a ’e te mau fa’a’oa’oara’a tei fa’atumuhia i ni’a i te ’utuāfare, turuhia e te ’Ēkālesia. Tē vai nei te mau pupu ’e te mau fa’anahora’a a te ’Ēkālesia nō te ha’amaita’i i te ta’ata hō’ē ’e te ’utuāfare, e ’ere nō te riro iho ’ei fā ».24
Tē pure nei au ’ia ti’a ia tātou ’ia hi’o i te ’ohipa a te Fatu mai te hō’ē ’ohipa rahi ’ati a’e i te ao nei, ’o tē rahi noa atu i te fa’atumuhia i ni’a i te ’utuāfare ma te turuhia e te ’Ēkālesia. ’Ua ’ite au ē ’e tē fa’a’ite pāpū nei au ē, tē heheu nei te Fatu ’e e heheu fa’ahou mai ’oia « e rave rahi atu ā mau mea rahi ’e te faufa’a nō ni’a i te bāsileia o te Atua ».25
Parau fafau ’e te ’itera’a pāpū
’Ua ha’amata vau i tā’u poro’i ma te fa’ahiti i te pūai e roa’a mai ’ia tāvirivirihia ’aore rā ’ia firi-’āmui-hia te mau fenu mātēria ’ei taura. Nā reira ato’a, tē parau fafau atu nei au ē, e noa’a pāpū mai te hi’ora’a ātea, te tapitapi ’ore ’e te mana i roto i tā tātou ’apora’a ’evanelia a Iesu Mesia tei fa’aho’ihia mai ’e te orara’a i te reira ’ia ’āmui tātou i te mau mea ato’a i te Mesia ra—’ei iāna.
Te mau fāna’ora’a ato’a ’e te mau ha’amaita’ira’a ato’a nō te tau mure ’ore, nō ’ō mai ïa, ’e e noa’a mai ’e e ’ōpuara’a ho’i, ’e e vai noa ho’i, maoti te Fatu Iesu Mesia. Mai tā Alama i parau : « ’Aita atu e rāve’a e fa’aorahia ai te ta’ata, maori rā nā roto i te Mesia. Inaha, ’o te ora ’oia ’e te māramarama o te ao nei ».26
Tē fa’a’ite ’oa’oa nei au i tō’u ’ite nō te hanahana ’e te pāpū ’e te ora o te Metua mure ’ore ’e o tāna Tamaiti here, ’o Iesu Mesia. I roto i te Fa’aora tātou e ’ite ai i te ’oa’oa. Iāna tātou e ’ite ai i te pāpūra’a o « te mana’o hau i roto i teie nei ao, ’e te ora mure ’ore i roto i te ao a muri atu ».27 ’O tā’u ïa e fa’a’ite pāpū nei i te i’oa mo’a o te Fatu Iesu Mesia, ’āmene.