Kajjitōk ko im Uwaak ko
“Eļan̄n̄e ij en̄jake āinwōt ij jerwane tōmak eo aō, ta eo imaron̄ kōm̧m̧ane n̄an bar bōke?”
Ilo̧k n̄an Jeje Ko Rekwojarjar
Eļan̄n̄e ewōr iien epen ippa n̄an en̄jake Jetōb eo, ej jipan̄ eō etal n̄an jeje ko rekwojarjar im lo tōmak eo ewōr ippān aolep. Ej letok n̄an eō tōmak. Bōlen jar ko ami relukkuun in kadu. Kajjieon̄ kōm̧m̧ani bwe en ļapļo̧k m̧ool im Jemedwōj Ilan̄ enaaj jipan̄ eok bar bōk tōmak eo am̧.
Chris B., 14 iiō dettan, Oregon, USA
Naajdik Ine in Tōmak eo
Ijeļā bwe imaron̄ jar n̄an Jema im kajjitōk Ippān n̄an jipan̄ eō dāpij wōt jon̄an tōmak eo iaar kōļapļo̧k m̧ae tōre in. Ij aikuj kōm̧m̧ane men ko remenin aikuj n̄an naajdiki, āinwōt riiti jeje ko rekwojarjar, pukōt en̄jake ko ilo jetōb, ļōmņak kōn kōjeraam̧m̧an ko aō, im kajjitōk kōn jipan̄ jān baam̧le eo aō. Ilo jejkej in, tōmak eo aō emaron̄ jino bar eddōkļo̧k. Eban waļo̧k jān juon raan n̄an eo juon—ej juon jon̄ak me ebōk iien. Ej aikuj wōr aō kijenmej im lōke ilo Irooj.
Elías B., 18 iiō dettan, Mendoza, Argentina
Kappukōte Ippān Doon
N̄e ij en̄ajke āinwōt ij jerwane tōmak eo aō, ij kōnono n̄an m̧am̧a im baba, im kōmij kappukōt men ko ippān doon. Jet iien kōmij al juon al ekōbōkakkak ālkin bwe kōmin maron̄ en̄jake Jetōb eo.
Emmalie C., 15 iiō dettan, Colorado, USA
Kajjitōk Ippān Jinōm̧ im Jemam̧
Ilo kakobaba n̄an jar kajju n̄an Jemedwōj Ilan̄, jemaron̄ kajjitōk ippān ro jined im jemed ekōjkan ad maron̄ bar ro̧o̧l n̄an E im bar lo tōmak eo ad.
Elías S., 12 iiō dettan, Paysandú, Uruguay
Jar, Kappukōt, im Riit
Āinwōt juon armej eo me edik ilo tōmak, ewōr jilu men ko iaar kōm̧m̧ani n̄an bar loe. M̧oktata, iaar jar. Jar kōn kōkajoorļo̧k im n̄an jeļā ta eo ij aikuj in kōm̧m̧ane em̧m̧an an jerbal. Ruo, iaar jiron̄ ro m̧ōtta repaake eō, im eaar ļap aer jipan̄ eō ke iaar aikuj. Jilu, iaar riiti jeje ko rekwojarjar. Elōn̄ iaer rej iookļo̧k tōmak im maron̄ jipan̄ kōj bar bōke.
Jack J., 14 iiō dettan, Florida, USA