Rijilōk Elder Gary E. Stevenson ej loļo̧k South Pacific
Vanuatu
An Kabun̄ in jino pād ilo laļ en an Vanuatu enan̄in 40 iiō rem̧ootļo̧k. Iien eo āliktata in an juon membōr in Būreejtōnji eo Kein Kajuon im Doulul eo an Jon̄oulruo Rijilōk ro kar loļo̧k ijeņ ekar ilo 2003, ke Būreejtōn Gordon B. Hinckley (1910–2008) eaar kōm̧m̧ane juon kweilo̧k ippān membōr ro. Rainin, laļ en ewōr juon stake im jilu district ko kōn enan̄in 8,000 membōr ro an Kabun̄ in.
“Ilo jok ļo̧k eo, kar karuwaineneik kōm̧ kōn juon m̧anit eo ekabwilōn̄lōn̄, karuwainene eo ekobain juon kumi in kōjan̄jan̄ im eeb. … Ekar aiboojoj im em̧m̧an n̄an lo em̧m̧aan rein … elōn̄ iaer raar ritōl ro an priesthood, kōm̧m̧ane juon historical im ‘eeb in ritariņae ro.’”
Ilo bar kweilo̧k ippān membōr ro, mijenede ro im jodikdik ro ilo Vanuatu, Elder Stevenson eaar ioon ruo iaan ritōl ro an kien—His Excellency Tallis Obed Moses, būreejtōn eo an Republic eo an Vanuatu, im Hon, Charlot Salwai Tabimasmas, prime minister eo an Vanuatu. Elder Stevenson eaar kam̧m̧oolol ritōl rein bwe remaron̄ kōtļo̧k an membōr ro kōjerbal tōmak eo aer.
Eaar ba, “eaar juon iien em̧m̧an n̄an ioon ritōl ro an kien. Raar aolep jim̧or m̧ōņōņō kōn membōr ro ad ilo Vanuatu im ad jipan̄ n̄an laļ en aer.”
Ilo kweilo̧k eo ippān Būreejtōn Obed, raar kōnono kōn eddo eo eaorōk me ro jinen im jemen ewōr n̄an kōkajjriri im karūttoļo̧k ro nejier n̄an erom̧ citizen ro rem̧m̧an im ritōl ro ilju im jeklaj.
Būreejtōn Obed eaar ba, “kien eo emaron̄ errā ilo jikin pepe eo n̄an an tōl ak kadikļo̧k jorrāān ko ak kien ko reban kabōjrak an ļapļo̧k jorrāān ko ilo laļ en. Kabun̄ ko ewōr juon aer jerbal eaorōk n̄an maron̄ jipan̄ armej ro am̧ n̄an erom̧ armej in mijak Anij.”
Prime Minister Salwai eaar kwaļo̧k ruo pedped in tōmak eo me ej ejake pedped in jemne eo an Vanuatu: m̧anit ko raorōk im tōmak ilo Anij.
Australia
Elder im Sister Stevenson raar joļo̧k jilu raan ko m̧okta ilo Adelaide, Australia. Ilo loļo̧k in ejenoļo̧k ekar kweilo̧k ippān jodikdik ro ilo juon nokon in jota elōn̄ jān juon stake. Ekar kapilōk im rōjan̄ er n̄an m̧ōņōņō kōn kōjeraam̧m̧an ko an juon bisop, mour lowaan gospel in im mour in jetōb ilo mour ko aer, n̄an keememej bwe Irooj enaaj jipan̄ er kōn “kein jipan̄ ko” n̄an tariņae elōn̄ m̧oņ ko an Setan.
Eaar ba “kein jipan̄ ko āinwōt riiti Bok in Mormon, m̧am̧a im baba ro, rikanaan ro, jar, pād ilo Jemenere, bok eo an Kokajoorļo̧k Jodikdik ro, im erreeo n̄an kabwijer juon peba in mālim n̄an deļōn̄e tampeļ.”
Tōre in rekar pād ijin, eaar barāinwōt tōl im kōnono ilo juon nokon in jota an ro rūm̧m̧an ded, kweilo̧k an mijen, kweilo̧k an ritōl priesthood ro im juon kweilo̧k eo eļap an stake ejenoļo̧k. Kōn wōt an ettoļo̧k n̄an jet mijenede im ritōl ro an priesthood n̄an kobatok, raar maron̄ alooje ilo satellite.
New Zealand
Ilo bōjrak eo an ekadu ilo Auckland, Elder Stevenson eaar loļo̧k Tampeļ View complex eo ej kab m̧ōj aje, barāinwōt Missionary Training Center eo ilo New Zealand.
Elder Stevenson eaar ba, “Eaar juon iaan kurup eo eļap uwaer n̄an pād ilo New Zealand kōn jon̄an in 80 mijenede.” “Ekar menin bwilōn̄ n̄an loļo̧k Temple View im lo m̧oko kiiō me Būreejtōn Eyring eaar aji. Ke iaar jerbal āinwōt Bisop eo Eutiej ej tōl, bisoprik eo eaar wōr aer eddo n̄an ļōme im kalōk site kein, kōn menin eaar aiboojoj n̄an lo wāween an m̧ōkein me kar m̧okta Church College of New Zealand em̧ōj ukoti n̄an juon jibadbad ekāāl. Juon iaan m̧ōkein ej make wōt kar aje an Church History Museum ilkin Salt Lake City.”
Tahiti
Eaar ba, “Kabun̄ in ekajoor ilo Tahiti.” Kabun̄ in elōn̄ ļo̧k jān 25,000 membōr ro ilo ratimjuon stake im jilu district ko ilo French Polynesia.
Eaar ba, “Mijenede ro jinointata raar tōkeak ļo̧k French Polynesia ilo 1843. Armej raņ ijeņ rejeļā kōn Kabun̄ in, im ej kabun̄ eo kein karuo eļap ilo laļ en. Eļan̄n̄e kwonaaj ito-itak ilo aolep laļ en epād m̧ōn jar ko ad jabdewōt jikin.”
Ilo loļo̧k in an ejenoļo̧k n̄an Tahiti ekoba juon m̧antin kemeem ijo 2,000 armej raar kōm̧m̧an eeb im m̧ōn̄ā.
Elder Stevenson eaar bar ioon Archbisop Jean-Pierre Edmond Cottanceau, archbisop eo an Papeete, French Polynesia. Kweilo̧k in eaar kam̧ool juon “ippān doon in kam̧m̧oolol” kōn jerbal ko rej dedeļo̧k ilo eria in jen kabun̄ kein jim̧or.
“Eaar laudin̄din̄ im m̧ōņōņō, im kar kile elōn̄ jikin ko n̄e ej itok n̄an kake aikuj ko n̄an rijeram̧ōļ im riaikuj ro n̄an kwaļo̧k m̧wiļ āinwōt Kraist” Elder Stevenson eaar ba ilo loļo̧k eo an. “Kōm̧ij errā ilo aorōk eo n̄an katakin armej ro n̄an kwaļo̧k m̧wiļ ko raorōk im n̄an kile em̧m̧an im nana.”
Āinwōt an laļ ko ilo Pacific Eria oktak, rej ro uwaan eria būreejtōnji eo: Elder Haleck jān American Samoa, Elder Ardern jān New Zealand, im Elder Cordon jān Arizona. Elder Stevenson eaar kwaļo̧k, “Rej bōktok juon kobain kadkad im m̧anit eo ej likwoj er ippān doon ilo juon wōt im m̧anit ko an armej ro rej jerbal ippaer. Eaar juon menin m̧ōņōņō n̄an pād ippaer im lo jerbal eo em̧m̧an rej kōm̧m̧ane ilo eria in eaiboojoj ilo laļin.