Anij eaar letok n̄an eō An jouj n̄an kaenōm̧m̧an aō inepata.
Jet iien ejjab pidodo n̄an jerbale juon mijen, ak ewōr tokjān.
Ke iaar ro̧o̧ltok jān mijen eo aō, iaar atbokwoj baam̧le eo aō ālkin 18 allōn̄ ko āinwōt juon mijenede. Ilo mijen eo aō, iaar lukkuun jeraam̧m̧an bwe Jemedwōj Ilan̄ eaar epaake eō.
Ilo transfer ko aō ruo m̧oktata, iaar inepata, men̄e iaar jeļā kajin French. Iaar jook in kōbōjrak an armej ro kōnono kōn Jisōs Kraist. Eo m̧ōtta jinointata eaar jipan̄ eō kōn waanjon̄ok eo an.
Iaar aolep iien bōk juon Bok in Mormon ippa n̄an kwaļo̧k ennaan eo em̧m̧an kōn Jepļaaktok eo kōn Josep Smith.
Juon raan, iaar kōm̧m̧ani ekkatak ko aō make kōn bōk juon mijen eo eaar letok n̄an n̄a n̄an ekkatak kōn jerbal in mijenede. Iaar lo juon kajjitōk kōn Bok in Mormon. Ej ba, ewōr ke juon am̧ en̄jake kōn Bok in Mormon? Kwomaron̄ ke kwaļo̧k n̄an eo m̧ōttam̧?”
Iaar ļōmņak, “ejjeļo̧k juon aō en̄jake.” Iaar ļōmņak in jar n̄an Jemedwōj Ilan̄ ilo jemļo̧k in ļo̧k ekkatak eo aō, im kajjitōk eļan̄n̄e Bok in Mormon eaar m̧ool (Moronai 10:4). Iaar jab m̧ōkaj in bōk juon uwaak. Iaar kajjitōk ippān Anij ejja kajjitōk eo wōt kajjojo iien ij jar im iaar baj wōt ebbeer.
Ilo iien in, kōm̧ ar katak ippān juon rikatak eo me eaar katak 30 iiō ippān mijenede ro. Āinwōt mijenede, kōm̧ij aolep iien kajjitōk ippān Anij n̄an jipan̄ kōm̧ jeļā ta jorrāān eo, im elmen am̧ maron̄ jipan̄ rikatak ro am̧ bōk juon naan in kam̧ool.
Āliktata kōm̧ ar karōk juon iien peptaij ak m̧okta jen raan in peptaij eo an eaar kūr tok kōm̧ im ba ke ejjab kōņaan peptaij. Kōm̧ ar ekaktak ippān im kōm̧ kar karuwaineneik tok missionary couple ro n̄an katak eo am̧. Jibadbad eo am̧ eaar n̄an jeļā men ko me rej kabōjrak e bwe en jab ļoor Jisōs Kraist.
Kōm ar kajjitōk elōn̄ kajjitōk ko kōn Bok in Mormon, im kōm ar jeļā bwe ekar jab bōk juon naan in kam̧ool bwe Anij eaar letok bar juon bok n̄an kam̧ool kōn Jisōs Kraist.
Ilo katak in, iaar en̄jake ilo būruwō me eaar jiron̄ eō, “Ij aikuj kajjitōk ippān rikatak eo eļan̄n̄e kōm̧ maron̄ jar im kajjitōk eļan̄n̄e Bok in Mormon ej m̧ool.” Ikar kōņaan kōjekdo̧o̧n ļōmņak in kōnke eaar jab ļap peran ippān n̄an kōm̧m̧ane ta eo Anij ekar kakien eō bwe in kōm̧m̧ane.
Iaar keememej eoon eo ilo Katak im Bujen ko jekjen 9:8–9:
“Ak, lo, Ij ba n̄an eok, bwe kwōj aikuj ekkatak kake ilo ļōmņak eo am; innām kwōj aikuj kajjitōk Ippa eļan̄n̄e e jim̧we, im eļan̄n̄e e jim̧we Inaaj kōm̧m̧an bwe en māāņāņ būruōm̧ iloam̧; kōn menin, kwo naaj en̄jake bwe e jim̧we.
Ak eļan̄n̄e ej jab jim̧we eban wōr am ejaake rot kein, ak enaaj wōr pok ilo am ļōmņak eo enaaj kōm̧m̧an bwe kwōn meļo̧kļo̧k men eo ebōd; kōn menin, kwōj jab maron̄ je men eo ekwōjarjar ijello̧kun wōt lewōj e n̄an eok jān Eō.”
Iaar en̄jake an jino māāņāņ būruō, iaar baj wōt etal jen ruum̧ eo n̄an etal im idaak. Ijoke, Iaar kile bwe en̄jake in eaar jipan̄ eō bwe in bōk eļap ļo̧k peran n̄an kōppeļo̧k lon̄iu n̄an kajjitōk ippān rikatak eo am̧ eļan̄n̄e kōm maron̄ jar iien eo wōt im kajjitōk ippān Anij eļan̄n̄e Bok in Mormon ej m̧ool.
Mokta jen aō jar, Iaar jeļā bwe Bok in Mormon ej m̧ool kōnke iaar en̄jake an būruwō māāņāņ, im āinwōt an eoon eo ba: “kwo naaj en̄jake bwe e jim̧we”.
Ilo iien jar eo, eaar ļap aō jan̄ kōnke iaar lukkuun būrom̧ōj kōn pen in būruwōn rikatak eo am̧ me ekōm̧m̧an bwe en jab en̄jake Jetōb. Ijoke, iaar kam̧m̧oolol kōnke Anij eaar uwake kajjitōk eo aō juon allōn̄ m̧okta ļo̧k ilo kejokļo̧kjeņ kōn kajjitōk in, “ewōr ke en̄jake kōn Bon in Mormon?” Āliktata eaar wōr juon aō naan in kam̧ool kōn Bok in Mormon.
Ijjab jeļā ewōr jete Bok in Mormon ko ij leļo̧k ilo aolepen mijen eo aō ak ij jeļā bwe bok in ekar ukōt mour eo aō. Mour eo aō make eaar oktak, ejjab m̧okta jen mijen eo aō ak ilo mijen eo aō. Iaar kile elmen aō maron̄ kar jerbal ippān Jetōb n̄an uwaake kajjitōk ko an armej.
Ij kam̧ool bwe Bok in Mormon ej dilepen kabun̄ in ad. Ijeļā Anij ej uwaaki kajjitōk ko ad. Emaron̄ wōr An make kaļenta ak aolep iien ej uwaak. Jet iien, jej ļōmņak kōnke ewōr ad apan̄, ej bwe Anij ejjab iakwe kōj. Ejjab m̧ool. Ijeļā Anij ej letok n̄an kōj apan̄ ko, kōnke ejjab iakwe kōj, ak kōnke ejjab kōkm̧anm̧anļo̧k kōj āinwōt juon diamond kōnke jej lukkuun aorōk Ippān. Ej kōņaan bwe jen peran, jeļāļo̧kjeņ, tiljek im bōk kajoor n̄an jum̧ae kapo ko an Setan.
Ij jeļā jej pād ilo Kabun̄ eo an Jisōs Kraist im ejjab kabun̄ eo an armej. Anij ej juon Anij in kabwilōn̄lōn̄ ko. Ij kūr kōj kajjojo n̄an jar emakijkij n̄an Jemedwōj Ilan̄ im kajjitōk eļan̄n̄e Bok in Mormon ej m̧ool. Men̄e em̧ōj am̧ jeļā ke em̧ool, āinwōt Būreejtōn Henry B. Eyring eaar ba, “Iaar kajjitōk ippān Anij eļan̄n̄e Bok in Mormon ej m̧ool, ejjab kōnke ejjeļo̧k juon aō naan in kam̧ool, ak kōnke ikōņaan en̄jake ejja en̄jake ko wōt kajjojo iien me ejipan̄ eō en̄jake iakwe eo an Anij”.
Bok in Mormon ej kam̧ool iakwe eo an Anij n̄an ro nejin.
Amandine Liard kar jerbal ilo France Paris Mijen jān Maaj 2016–Okwōj 2017. Ej pād ilo Toahotu ward, Tahiti.