M̧are, Jāān, im Tōmak
Rijeje eo ej jokwe ilo Ashanti Region, Ghana.
Ļeddik eo jera im n̄an eaar dik am̧ro iien ippān doon m̧okta jān m̧are eo am, im em̧ool kar kanooj dik am jāān, bōtaab eaar wōr juon men ippām em̧ool eļapļo̧k an aorōk: tōmak.
Iaar pād ilo juon kweilo̧k an rūm̧m̧an ded ilo Kumasi, Ghana, ejjab kōnke iaar aikuj juon jera leddik—Iaar pojak in kar m̧are—ak kōnke iaar en̄jake bwe iaar aikuj eļapļo̧k kareel im bwe kweilo̧k eo enaaj kar jikin eo ejejjet n̄an leo. Em̧ool, jar ko aō raar uwaak ilo kweilo̧k eo ālkin an Sister Call, juon mijenede erūtto kar jitōn̄e n̄an jerbal ippān rūm̧m̧ad ded ejjeļo̧k rejetaer, kar kōnono kōn aorōk eo an m̧are ilo tampeļ.
Epaakeļo̧k jem̧ļo̧k in ekōnono eo, turin mejān eaar m̧ōkaj an oktak im liien eaar ba, “Kwojjab aikuj jāān n̄an am̧ m̧are—men eo de eo kwoj aikuji ej tōmak.” Iaar en̄jake āinwōt liin eaar kanooj kōnono n̄an n̄a, bōtaab iaar ļōmņak emaron̄ kar lukkuun jerbal n̄an n̄a kōnke kōm kar aikuj in wiaik jet men ko ilo kōppopo n̄an m̧are eo. Iaar ba n̄an eō make, “Ekōjkan aō maron̄ jab aikuj jāān bōtaab tōmak wōt?”
Iaar ļōmņak im bar ļōmņak kōn menin ilo aolepān wiik eo. Ilo jekjek eo iaar kajjitikin eō make, “Ewōr ke jon̄an ippān Anij ilo ta eo Emaron̄ kōm̧m̧ane? Ilo jino in, iaar ļōmņak jaab, bōtaab ālkin iaar ļōmņak aaet. Ak innām kar itok juon bar kajjitōk, “Ekōjkan an wōr jon̄an Ippān eļan̄n̄e E ekajoor bōtata?” Jetōb eo eaar katakin eō uwaak eo: Kōjeraam̧m̧an ko an Anij rej pedped ioon pokake eo ad n̄an E. E ejjeļo̧k jon̄an ilo maron̄ eo An n̄an kōjeraam̧m̧an kōj, bōtaab jej aikuj karuwaineneik tok kōjeraam̧m̧an ko kōn kōjerbal tōmak n̄an kōm̧m̧ane ta eo E ekōņaan bwe jān kōm̧m̧ane.
Tokālik, iaar ko̧o̧leļo̧k leddik eo jera, Priscilla, n̄an ekōnono kōn karōk ko an m̧are eo am. Kōjekdo̧o̧n an dik am̧ro jāān, kōm kar jōk n̄an kālet juon raan n̄an m̧are eo am̧, bōtaab kōm kar jab maron̄ kālet lukkuun raan eo. Kōm kar errā bwe lio aikuj kar kajjitōk ippān bisop eo an ewi wōt raan ko raar peļļo̧k ilo kōļōnta eo an ward im stake eo. Jān raan ko ruo eaar litok, kōm kar kālet Jeptōm̧ba 27, 2014—eo kar meļeļe in bwe eaar wōr wōt am jiljilimjuon wiik ko n̄an raan in m̧are eo!
Priscilla eaar kajjitōk, “Obim [meļeļe in “būruwō” ilo kajin Igbo], ewōr ke jet am̧ jāān? Iien in ekadu.”
Iaar uwaak, “Ejjeļo̧k, bōtaab ewōr jet tōmak.”
Liin eaar ettōn̄ im ba, “Ej Em̧m̧an Wōt. Jen jitlo̧k im jar.” Ba ilo juon wāween 1 Nipai 3:7, liin eaar wōnm̧aanļo̧k wōt, “Irooj enaaj kōpeļļo̧k juon iaļ n̄an kōj kōnke Eaar kakiene kōj n̄an m̧are.”
Ilowaan wōt wiik eo kar kōļļāik eō kōn juon jerbal iaar kōm̧m̧ane allōn̄ ko im̧aanļo̧k. Innām Priscilla eaar jiron̄ eō bwe eaar kōņaan jino juon pejnej n̄an bōk eļapļo̧k jāān. Kōn jāān eo iaar kōm̧mane, liin eaar wiaik pāāk ko kar kōjerbali im bar wia kaki. Ālkin wiaik jet m̧weiuk ko ilo ļaajrak in men ko kar menin aikuj, eaar wōr ruo alen an ļapļo̧k jāān eo ippān jān jāān eo iaar leļo̧k n̄an e.
Ilo tōre in, eaar ejjeļo̧k jerbal iaar kōm̧m̧ane. Aolep jerbal ko kar kallim̧uri eō n̄an kaki raar jab itok. Eaar wōr wōt am ruo wiik ko im eaar wōr wōt men ko kōm kar aikuj in wiaiki. Ļeo jera eaar ļōmņak bwe raan eo en to̧rto̧r likļo̧k. Men eo iaar ba, “Juon kabwilōn̄lōn̄ ej itok ilo iaļ eo an tok.”
Ruo raan m̧okta jān raan in m̧are eo am, kabwilōn̄lōn̄ eaar waļo̧k: kar kōļļāik eō kōn juon jerbal iaar kōm̧m̧ane ruo wiik ko m̧oktaļo̧k. Iaar barāinwōt katak bwe kōn tōmak im niknik jerbal, Irooj enaaj kar kōjeram̧m̧an kōm n̄an kadedeļo̧k kōttōbar ko am̧ rejim̧we.
Kōm kar etal n̄an bank eo im jāniji jāāk eo im jān ijo n̄an im̧ōn wia eo n̄an wiaiki likjab in ta eo kar aikuji ibulōn wōt leplep eo, eo kōm kar lo an lan̄ kōmālim jerbal in tōmak eo am.
Edikļo̧k jān 24 awa ko tokālik, kōm kar m̧are. Ke kar kajjitōk ippām n̄an kwaļo̧k kōkaļļe in m̧ool im iakwe n̄an doon, en̄jake eo eaar jab āinwōt jabdewōt men inan̄in kar en̄jake m̧okta ilo mour eo aō. Iaar en̄jake eļap tōprak jon̄an iaar tōmak inaaj kar kōm̧m̧ane aolep men ko kōn tōmak jān tōre eo m̧aanļo̧k. Tokālik kōm kar liāp ilo Accra Ghana Tampeļ eo.
Men̄e komaron̄ aikuj jet jāān ko n̄an kōpopo n̄an m̧are, men eo eļap tata kwoj aikuj ej tōmak.