Jon̄ak ko an Gospel
Jibbon̄ in Jabōt eo Eaibojooj
Jān enaan eo ilo kweilo̧k eo eļap an Oktoba 1997.
Ilo raan eo, Irooj eaar jerkakpeje im rube to ko an mej. Ekar weaak jān lōb im anjo̧ ilo aibojooj āinwōt Rilo̧mo̧o̧r an aolep armej.
Jejeļā ta in Jerkakpeje—kobain jetōb im ānbwin ilo jekjek eo ewāppen. …
Komaron̄ ke antoone ļo̧k? Ej ke juon iien em̧m̧antata ilo mour ko ad? Ejjeļo̧k nan̄inmej, ejjeļo̧k metak, ejjeļo̧k eddodo kōn nan̄inmej me ekkā an jelōt kōj ilo mour in?
Jerkakpeje ej ioļapļap in tōmak ko ad āinwōt jet Rikūrijin ro. …
… Ke Rilo̧mo̧o̧r eaar jerkak jān lōb eo, … Ekar kōm̧m̧ane juon men eo me ejjeļo̧k emaron̄ kar kōm̧m̧ane. Ekar rube to ko an mej, ejjab n̄an Emake ak n̄an aolep ro raar mour m̧oktaļo̧k—ro rem̧m̧an im ro renana. …
… Eaar kōpooj menin letok in n̄an aolep. Im kōn kōm̧m̧an in em̧m̧an, Eaar kaenōm̧m̧an ro rej buromōj, eļap wōt buromōj eaar kakkure buruōn ro me ejako ro rejitōnbōro ippāer.
Ij ļōmņak kōn wāween an marok Bōļaide eo ke Kraist ej toto ioon debwāāl. …
… Laļ iņ eaar emakūtkūt im ekar ļap an marok. …
Armej ro renana me raar pukōt n̄an bōk mour eo an raar lan̄lōn̄. …
Ilo raan eo ran̄ōl nuknuk eo ilo tampeļ eaar potak.
Meri Magdalene im Meri, jinen Jisōs, raar lukkun obrak kōn būromōj. … Maan eo ejitōn bōro ippāer im eļap aer kautiej e em̧ōj katotoik ioon debwāāl ilo ejjeļo̧k ruōn. …
… Rijilōk ro raar lukkuun buromōj. Jisōs, aer Rilo̧mo̧o̧r—em̧m̧aan eo eaar etetal ioon dān im kōjerkak ro remej—ekar Make Būromōj kōn armej ro renana. …
Ekar juon bōļaide eobrak kōn inepata im ļap buromōj. …
Ij ļōmņak bwe aolepān raan ko jān jinoin ilo bwebwenato in laļ in, Bōļaide eo ekar lukkuun marok.
[Ak] būromōj eaar jab pād wōt bwe kōnke ilo Jabōt, Irooj eaar jerkakpeje im rube to ko an mej. Ekar weaak jān lōb im anjo̧ ilo aibojooj āinwōt Rilo̧mo̧o̧r an aolep armej.
Im ilo iien eo wōt māj ko me raar obrak kōn dān in kōmjalaļ raar mōre. Jar in būromōj im inepata ko aer kiiō raar oktak im obrak kōn nōbar aibojooj, kōn Jisōs RiKraist, Nejin Anij eo emour, raar jutak imaer āinwōt … kam̧ool bwe mej ej jinoin juon diwōjļo̧k eo ekāāl im aibojooj.
Kōj kajjojo enaaj wōr make ad Bōļaide—raan ko me laļ ilo ad kalimjōkļo̧k erub im tipdikdik im pedjaak ipeļaakid. …
Ak ij kam̧ool n̄an kom ilo etan Eo eaar anjo̧ ioon mej—Jabōt enaaj itok. Ilo iien marok in būromōj, Jabōt enaaj itok.
… Jekdoon būromōj ko ad, Jabōt enaaj itok. Ilo mour ak mour eo tok juon, Jabōt enaaj itok.
Ij kam̧ool n̄an kom bwe Jerkakpeje ejjab juon bwebwenato bajjōk. Ewōr ad kajjojo naan in kam̧ool kōn ro raar lo E. Taujin rikam̧ool ro ilo laļ eo m̧okta im laļ eo ekāāl kōn Rilo̧mo̧o̧r eo emōj an jerkakpeje. Raar en̄jake kinej ko ilo Pein, im ilo katin. …
Ālkin Jerkakpeje eo, rikaļoor ro raar oktak. Raar etal n̄an aolep laļ iņ … kwaļo̧k ilo peran kōn Jisōs RiKraist eo, Nejin Anij emour.
Elōn̄ iaer … raar mej kōn aer kar maņ er, naan in kam̧ool ko aer kōn Kraist eo emōj an jerkakpeje eaar lukkuun kajoor ke rej maņ er.
Jerkakpeje eo eaar ukōt mour ko an ro raar kam̧ool kake. Etke eban maron̄ ukōt mour ko ad?
Jenaaj aolep jerkakpeje jān lōb. …
Kōnke mour im pinmuur eo an Rilo̧mo̧o̧r an laļ, jenaaj bar ioon doon ippān ro rejitōn bōro ippād.
… Ilo raan en jenaaj lan̄lōn̄ bwe Messaia eaar anjo̧ jān men otemjej bwe jen maron̄ bar mour indeeo.
Kōn kain̄i ko rekwojarjar jej bōki ilo tampeļ, ad em̧m̧akūt jān mour in eban to kitien ad jepel jen doon bwe emōj kapene im liābe n̄an indeeo.
Ej aō naan in kam̧ool bwe Mej ejjab jem̧ļo̧k in mour. …
Jen meļeļe im mour ilo kam̧m̧olool kōn menin letok eo ejjeļo̧k wōņeen me kar letok n̄an kōj maan im kōrā ro nejin Jemedwōj Ilan̄ im kōn kalim̧m̧ur eo kōn raan eo eaibojooj n̄e jenaaj bar jekakpeje im anjo̧ jān lōb.
… Jekdoon ewi jon̄an an marok Bōļaide ko ad, Jabōt enaaj itok.