Ilo aolepān mour eo an ioon laļ in, Rilo̧mo̧o̧r eaar depļo̧ki elōn̄ iaļ ko—Iaļ eo An jān Bethlehem n̄an Ijipt ke ej juon nin̄nin̄, 40 raan in an etal ilo iaļ eo An ilo āne jemaden, iaļ ko An n̄an bukwon ko, weto, im mōko n̄an katakin, kōmour, im kōjeraam̧m̧an ilo iien An kwaļo̧k naan, im elōn̄ ko jet. Ak ewōr juon iaļ Rilo̧mo̧o̧r eaar make jelm̧aeiki, im ekar juon iaļ eo me E make enaaj niknik n̄an jemļo̧kiņ.
Ilo Jabōt in Ijtō in jej m̧ōņōņō kōn m̧akūtkūt eo eto ad kōttare im eaiboojoj ilo bwebwenato in laļ in.
“Ej raan eo ekar ukōt men otemjej.
“Ilo raan ņe, mour e aō ekar oktak.
“Mour eo am̧ ekar oktak.
“Mejān kajjik eo an aolep ajri ro nejin Anij ekar oktak.
Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon, “Menin Letok an Tūriamo̧,” Liaona, Māe 2015, 107.
En̄taan Eļapļo̧k Jān Maron̄ Keidi
Pija
Jesus in Gethsemane
O My Father, jān Simon Dewey
“Ejjeļo̧k juon kōļmenļo̧kjeņ emaron̄ bwine jon̄an aorōk in ta eo Kraist ekar kōm̧m̧ane ilo Gethesemane.
Jejeļā Eaar menokadu eļap kōn bōtōktōk jān aolepān ānbwiniin ilo An idaak lūm in kap emeo̧ Jemān eaar leļo̧k n̄an E.
Jejeļā Eaar en̄taan, jim̧or ilo ānbwiin im jetōb, eļapļo̧k jān an juon armej maron̄ en̄taan, ijello̧kin en kar n̄an mej.
“Jejeļā bwe ilo jet wāween, ejjab maron̄ keidi tok n̄an kōj, en̄taan eo An ekar Kakūrm̧ool ta eo emenin aikuj, ņa o̧ņāān jetōb ko rej ukweļo̧k jān metak ko im kaje ko an jerawiwi, im kar kōm̧m̧an bwe tūriamo̧ en pād n̄an ro me rej tōmak ilo etan Ekwojarjar.
“Jejeļā bwe Eaar pedo ioon bwidej āinwōt an metak ko im en̄taan ko kaddoiki ilo ejjeļo̧k jem̧ļo̧kin bwe en wūdiddid im kōm̧m̧an bwe En maron̄ jab idaak jān kab eo emeo̧.”
Elder Bruce R. McConkie (1915–85) jān Doulul eo an Jon̄oulruo Rijilōk ro, “The Purifying Power of Gethsemane,” Ensign, Māe 1985, 9.
Am Make Ļūn̄ūri ilo Buruōm: Men̄e jejjab kile iien otemjej, Rilo̧mo̧o̧r eaar en̄taan ilo aolep kain jekjek in metak ko ilo iien Pinmuur eo. Emeļeļe kōn aolep metak ko ilo ānbwin, jān di eo ejorrāān n̄an nan̄inmej ko rekāen̄taanan. Ekar en̄jake marok im būromōj ko an en̄taan in kōļmenļo̧kjeņ āinwōt inepata eļap, ikūmkūm, an̄ūr, ajimakeke, im būromōj eļap. Im Ekar en̄jake ikinejnej in jetōb kōnke eaar bōk ioon aolep jerawiwi ko an armej.
Elder David A. Bednar jān Doulul eo an Jon̄oulruo Rijilōk ro eaar katakin, “Ilo iien ko reppen jemaron̄ jan̄ im ba, ‘Ejjeļo̧k juon emeļeļe en̄jake in aō. Ejjeļo̧k juon emeļeļe.’ Ak Nejin Anij ejeļā im emeļeļe, kōnke eaar en̄jake im ineek eddo ko ad kajjojo” (“Kōmeraikļo̧k Eddo Ko Aer,” Liaona, Māe 2014, 90).
E Wōt Juon Emaron̄e
Pija
carrying the cross
Procession to Calvary, jān Bernardo Cavallino, Chrysler Museum of Art
“Men eo Eaar kōm̧m̧ane emaron̄ dedeļo̧k wōt ippān Anij. Āinwōt Nejin Jemān Eo Emake ilo kanniōk, Jisōs eaar jolete m̧wil ko m̧wilin rekwojarjar. E wōt eaar ļotak tok bwe en maron̄ kōm̧m̧ani jerbal in eļap an aorōk im em̧m̧an. Ilo an make wōt juon Em̧m̧aan eo ejjeļo̧k an jerawiwi ioon laļ in, Eaar jab maron̄ mej ilo jetōb. Kōnke E bar Anij, barāinwōt E wōr an kajoor ioon mej ilo kanniōk. Kōn menin Eaar kōm̧m̧ane menin n̄an kōj kōn ta eo me jeban maron̄ kōm̧m̧ane n̄an kōj make. Eaar rube to ko an mej. Ekar barāinwōt kōm̧m̧an bwe jen maron̄ bōk aenōm̧m̧an eļap im ellur jān menin letok eo an Jetōb Kwojarjar.”
Būreejtōn James E. Faust (1920–2007), Rikakpilōklōk eo Kein Karuo ilo Būreejtōnji eo Kein Kajuon, “The Atonement: Our Greatest Hope,” Liahona, Jan. 2002, 20.
Am Make Ļūn̄ūri ilo Buruōm: Kōn Pinmuur eo An, Rilo̧mo̧o̧r eaar jaļat to ko an mej im lo̧mo̧ren kōj aolep jān jerawiwi ko ad bwe kajjojo armej ren maron̄ bōk mour indeeo. Ekar E eo wōt emaron̄ kadedeikļo̧k juon jerbal eo epen im kaamijak. N̄e jej jelm̧ae apan̄ ko reļļap, jemaron̄ bōk aenōm̧m̧an ilo ad jeļā bwe Rilo̧mo̧o̧r emaron̄ kōm̧m̧ani men ko reppen.
Ekar Jab Reilikļo̧k
Pija
the burial
Thomas Ripere Eo, jān Carl Heinrich Bloch
“Ilo tōļ eo etan Calvary, ke rikaļoor ro rej kalimjōkļo̧k, Ānbwinin eo eaar ikinejnej rekar dilaiki ioon debwāāl eo. Ilo ejjeļo̧k tūriamo̧ rekar kajirere kake E im kaliaiki im kajejtokjen.
“Awa in en̄taan ko an raar eļļā im E eaar mej. Naan ko raar diwōjtok jān lon̄iin, ‘Jema, Ij lewōj Aō ilo peim̧: im ke em̧ōj An ba men in E mej.
“Ilo tōre eo āliktata, Maajta eo emaron̄ kar oktak liktak. Bōtaab Eaar jab. E eaar depļo̧ki aolep men otemjej bwe En maron̄ lo̧mo̧o̧ren aolep men ko otemjej. Rekar mōkaj kake ānbwinin im kōm̧anm̧an aer likūt ilo lōb eo kar kōjerbale.
Būreejtōn Thomas S. Monson (1927–2018), “Em̧ōj an Jerkakpeje!” Liaona, , Māe 2010, 89.
Am Make Ļūn̄ūri ilo Buruōm: Eaar en̄taan kōn metak , ajimakeke, im buromōj, ak jekdoon Rilo̧mo̧o̧r eaar niknik im kadedeikļo̧k jerbal eo an ioon laļ in kōn tūriamo̧—barāinwōt kajjitōkin Jemān bwe en joļo̧k an ro jet bōd ro raar debwāāle E. Kōn waanjon̄ak eo an ewāppen, jemaron̄ jelm̧ae melejon̄ ko im apan̄ ko ad make kōn tūriamo̧, im kōn jipan̄ in An jemaron̄ barāinwōt niknik n̄an jem̧ļo̧kin.
Elōn̄ Rikamo̧o̧l Ro kōn Jerkakpeje eo An
Pija
Mary at the tomb
Woman, Why Weepest Thou? jān Mark R. Pugh
“Ij tōmake elōn̄ rikam̧ool ro kōn Jerkakpeje eo an Rilo̧mo̧o̧r ro imenene ko im naan in kam̧ool ko aer jej loi ilo Kalim̧m̧ur Ekāāl—Piter im ro m̧ōttan Jon̄oulruo ro im eo ejitenbōro, Meri Magdalini ilubwilijin ro jet. Ij tōmak naan in kam̧ool ko loi ilo Bok in Mormon— an Rijilōk Nipai im jarlepiju eo ilo āneen Bun̄peļo̧k, ilubwilijin ro jet. Im ij tōmak naan in kam̧ool eo an Josep Smith im Sidney Rigdon ro, ālkin elōn̄ bar naan in kam̧ool ko, rekar kwaļo̧k kam̧ool eo eļap ilo epepen in ilo raan ko āliktata “bwe E emour! Bwe kōm̧ ar lo E.’ Kōn mej ko mejān ilo an reitoreitak, ij jutak āinwōt juon ri kam̧ool bwe Jisōs ri Nazeret ej Ripinmuur eo eaar jerkakpeje, im ij kam̧ool kōn aolep men ko rej jebartok jān m̧ool in Jerkakpeje eo An. Jemaron̄ ke bōk kam̧ool im kaeņōm̧m̧an jān ejja kam̧ool in wōt.”
Elder D. Todd Christofferson jān Doulul eo an Jon̄oulruo Rijilōk ro, “Erom juon Rikam̧ool an Kraist,” Liahona, May 2014, 114.
Am Make Ļūn̄ūri ilo Buruōm: Men̄e jaar jab pād ilubwiljin ro raar lo Ānbwinin Ripinmuur eo ewāppen im em̧ōj an jerkakpeje, jej maron̄ wōt jutak āinwōt rikam̧ool n̄an E rainin. Jen mije E aolep iien ilo mour ko ad, jekdoon iien eo kab ia eo jej pād ie. Kajjojo iien jej aje ļo̧k buruōd im peid n̄an jerbal n̄an ro jet; kwaļo̧k meanwōd, jouj, im kautiej n̄an aolep; dāpij m̧ool eo; im kwaļo̧k naan in kam̧ool kōn gospel eo an, jej jutak āinwōt rikam̧ool ro rem̧ool an Jisōs Kraist.
Jej Jab Aikuj Etetal Make Iaad ilo Iaļ In
Pija
Christ walking along the shores
Kōmeļeļe jān Walk with Me, jān Greg Olsen, emaron̄ jab kape
“Juon iaan kaenōm̧m̧an ko reļļap ilo Ijtō in ej bwe kōnke Jisōs eaar etetal ilo juon iien eo eaitok, eajimakeke, jej jab aikuj kōm̧m̧an āindein. Iaļ eo an ejimakeke eaar kōm̧m̧an bwe en wōr m̧ōttad ilo iaļ ko āinwōt ļo̧k ial eo An—tūriamo̧ im kea eo an Jemed Ilan̄, jemjerā in lōke eo an in Nejin Ejitōn bōro, menin letok eo ekwojarjar an Jetōb Kwojarjar, enjeļ ro ilo Ilan̄, ro uwaan baam̧le ko ilo ijoko turājet in nuknuk ran̄ōl, rikanaan ro im rijiļōk ro, rūkaki ro, ritōl ro, im ro mōttad. Aolep rein im elōn̄ļo̧k em̧ōj leļo̧k n̄an er āinwōt ro mōttad ilo iaļ in ad ilo mour in kōn Pinmuur eo an Jisōs Kraist im Jepļaaktok eo an gospel eo An. Anjo̧ jān ijo eutiej ilo Calvary ej m̧ool eo bwe jejāmin make iaad ak atajinemjen, men̄e jet iien jemaron̄ en̄jake bwe jej make iaad. …
“… Jen jutak kōn Jisōs Kraist ‘ilo aolep iien im ilo aolep men, im ilo aolep jikin bwe [jen] maron̄ pād ilo, aaet m̧ae mej,’ aaet em̧ool en̄in wāween an kar jutak kōn kōj m̧ae mej im ekar kōm̧m̧an menin make iaan.”
Elder Jeffrey R. Holland jān Doulul eo an Jon̄oulruo Rijilōk ro, “None Were with Him,” Liaona, Māe. 2009, 88.
Am Make Ļūn̄ūri ilo Buruōm: Ijtō In, keememej Iaļ eo an Rilo̧mo̧o̧r Āliktata, im Ejimakeke. Eaar wūjļepļo̧k men otemjej bwe kwe im kajjojo armej ilo laļ in remaron̄ erreo im bōk mour indeeo. Ekkatak jān waanjon̄ak ko An rewāppen. Likūt E ilo ļōmņak ko am im ilo buruōm. Im aolep iien kwon keememej bwe kojjab make iaam. Kōnke Eaar niknik ilo Iaļ eo āliktata ilo an kar make iaan im kadedeikļo̧k, Eban katajinemjen eok. Iakwe eo an n̄an kōj ejjeļo̧k jem̧ļo̧kiņ, im E ej pojak n̄an letok aeņōm̧m̧an, kaeņōm̧m̧an, im kōjatdikdik ilo ami wōnm̧aanļo̧k wōt ilo iaļ in am make. Menin letok eo an Pinmuur eo ej mour indeeo, im em̧ōj letok n̄an kōj.