ដំណឹងល្អឯក
ព្រឹកថ្ងៃអាទិត្យដ៏ភ្លឺចែងចាំងនោះ
ដកស្រង់ចេញពីសុន្ទរកថានៅក្នុងសន្និសីទទូទៅខែ តុលា ឆ្នាំ ២០០៦ ។
នៅថ្ងៃនោះ ព្រះអម្ចាស់ដែលមានព្រះជន្មរស់ឡើងវិញបានផ្តាច់ចំណងនៃសេចក្តីស្លាប់ ។ ទ្រង់បានយាងចេញពីផ្នូរ ហើយបង្ហាញព្រះកាយដោយជោគជ័យរុងរឿង ជាព្រះអង្គសង្គ្រោះនៃគ្រប់ពូជមនុស្ស ។
យើងស្គាល់អំពីការរស់ឡើងវិញ — វាជាការផ្គុំគ្នាឡើងវិញនូវវិញ្ញាណ និងរូបកាយនៅក្នុងទម្រង់មួយដ៏ល្អឥតខ្ចោះ ។ …
តើអ្នកអាចស្រមៃគិតអំពីរឿងនោះបានទេ ? តើជីវិតយើងនឹងទៅជាយ៉ាងណា ? គ្មានជំងឺ គ្មានការឈឺចាប់ គ្មានជាប់បន្ទុកដោយសារតែជំងឺដែលជារឿយៗរំខានយើងនៅក្នុងជីវិតរមែងស្លាប់នេះ ។
ការរស់ឡើងវិញគឺជាខ្លឹមនៃជំនឿរបស់យើងក្នុងនាមជាគ្រិស្តសាសនិក ។…
… ពេលព្រះអង្គសង្គ្រោះមានព្រះជន្មរស់ពីផ្នូរវិញ … ទ្រង់បានធ្វើកិច្ចការមួយចំនួនដែលគ្មាននរណាម្នាក់ទៀតអាចធ្វើបានឡើយ ។ ទ្រង់បានផ្តាច់ចំណងនៃសេចក្តីស្លាប់ ពុំមែនសម្រាប់អង្គទ្រង់ផ្ទាល់នោះទេ ប៉ុន្តែសម្រាប់មនុស្សទាំងអស់ដែលធ្លាប់រស់នៅ — ទាំងមនុស្សសុចរិត និងមនុស្សទុច្ចរិត ។ …
… ទ្រង់បានធ្វើឲ្យអំណោយនោះកើតមានសម្រាប់មនុស្សទាំងអស់ ។ ហើយដោយទង្វើដ៏ខ្ពង់ខ្ពស់នោះ ទ្រង់បានបន្ធូរបន្ថយការបំផ្លិចបំផ្លាញ យកចេញនូវសេចក្តីទុក្ខព្រួយដែលអុកឡុករំខានដល់ព្រលឹងនៃអស់អ្នកដែលបាត់បង់មនុស្សជាទីស្រឡាញ់ដ៏មានតម្លៃ ។
ខ្ញុំគិតអំពីភាពងងឹតនាថ្ងៃសុក្រនោះ ដែលព្រះគ្រីស្ទត្រូវបានលើកឡើងឆ្កាងលើឈើឆ្កាង ។ …
… ផែនដីរញ្ជួយ ហើយចាប់ផ្តើមងងឹតឡើង ។ …
មនុស្សអាក្រក់ទាំងនោះដែលបានចង់ធ្វើគុតទ្រង់បានរីករាយ ។ …
នៅថ្ងៃនោះ វាំងននក្នុងព្រះវិហារក៏រហែកចំពាក់កណ្តាល ។
ទាំងម៉ារា ជាអ្នកស្រុកម៉ាក់ដាឡា និង ម៉ារា ជាម្តាយរបស់ព្រះយេស៊ូវបានពោរពេញដោយទុក្ខសោកសៅ ។… បុរសដ៏អស្ចារ្យម្នាក់ ដែលពួកគេបានស្រឡាញ់ និងគោរពត្រូវបានព្យួរដោយគ្មានជីវិតនៅលើឈើឆ្កាង ។…
… ពួកសាវកត្រូវបានគេតាមសម្លាប់ ។ ព្រះយេស៊ូវជាព្រះអង្គសង្គ្រោះរបស់ពួកគេ — ជាអ្នកដែលដើរលើទឹក ប្រោសមនុស្សស្លាប់ឲ្យរស់ឡើងវិញ — គឺស្ថិតនៅក្នុងកណ្ដាប់ដៃនៃមនុស្សទុច្ចរិតតែអង្គឯង ។
វាជាថ្ងៃសុក្រដែលពោរពេញដោយក្តីរន្ធត់ លេបត្របាក់ដោយក្តីសោកសៅ ។…
ខ្ញុំគិតថា ក្នុងចំណោមថ្ងៃទាំងឡាយចាប់តំាងពីពេលនៃការចាប់ផ្តើមជាប្រវត្តិសាស្ត្រពិភពលោកមក មានតែថ្ងៃសុក្រនោះទេដែលជាពេលដ៏អាប់អួរបំផុត ។
[ ប៉ុន្តែ ] ភាពអស់សង្ឃឹមក៏មិននៅយូរប៉ុន្មានដែរ ពីព្រោះនៅថ្ងៃអាទិត្យ ព្រះអម្ចាស់បានមានព្រះជន្មរស់ឡើងវិញ ស្រាយចំណងទំាងឡាយនៃសេចក្តីស្លាប់ ។ ទ្រង់បានយាងចេញពីផ្នូរ ហើយបង្ហាញព្រះកាយដោយជោគជ័យរុងរឿង ជាព្រះអង្គសង្គ្រោះនៃគ្រប់ពូជមនុស្ស ។
ហើយតែមួយរំពេចប៉ុណ្ណោះ កែវភ្នែកទំាងឡាយដែលធ្លាប់ពោរពេញដោយទឹកភ្នែកហូរឥតល្ហែនោះនឹងត្រូវបានស្ងួត ។ បបូរមាត់ដែលធ្លាប់ខ្សឹបការអធិស្ឋាននៃការរសាប់រសល់ចិត្ត និងទុក្ខព្រួយ ឥឡូវនេះពោរពេញដោយការសរសើរតម្កើងដ៏អស្ចារ្យ សម្រាប់ព្រះយេស៊ូវគ្រីស្ទជាព្រះរាជបុត្រានៃព្រះដ៏មានព្រះជន្មរស់បានឈរនៅខាងមុខពួកគេ ជា … ភស្តុតាងថា សេចក្តីស្លាប់គឺគ្រាន់តែជាការចាប់ផ្តើមនៃដំណើរថ្មី និងការរស់នៅដ៏អស្ចារ្យតែប៉ុណ្ណោះ ។
យើងម្នាក់ៗនឹងមានថ្ងៃសុក្រផ្ទាល់ខ្លួនរបស់យើង — ជាថ្ងៃទាំងឡាយដែលសាកលលោក ហាក់ដូចជាធ្លាក់រលំចុះ ហើយបំណែកនៃពិភពរបស់យើងត្រូវបានបែកខ្ចាត់ខ្ចាយជាចំណែកៗ ។…
ប៉ុន្តែខ្ញុំសូមថ្លែងទីបន្ទាល់ដល់បងប្អូននៅក្នុងព្រះនាមនៃព្រះមួយអង្គដែលយកឈ្នះលើសេចក្តីស្លាប់ថា — ថ្ងៃអាទិត្យនឹងមកដល់ ។ នៅក្នុងភាពងងឹតងងល់នៃការសោកសៅរបស់យើង នោះថ្ងៃអាទិត្យនឹងមកដល់ ។
… មិនថាយើងមានភាពសោកសៅបែបណាទេ ថ្ងៃអាទិត្យនឹងមកដល់ ។ នៅក្នុងជីវិតនេះ ឬជីវិតក្រោយ ថ្ងៃអាទិត្យនឹងមកដល់ ។
ខ្ញុំសូមថ្លែងទីបន្ទាល់ទៅកាន់អ្នកថា ការរស់ឡើងវិញពុំមែនជារឿងប្រឌិតឡើយ ។ យើងមានទីបន្ទាល់ផ្ទាល់ខ្លួនអំពីអ្នកទាំងឡាយដែលបានឃើញទ្រង់ ។ មនុស្សរាប់ពាន់នាក់នៅក្នុងពិភពលោកចាស់ និងពិភពលោកថ្មីបានធ្វើជាសាក្សីអំពីព្រះអង្គសង្គ្រោះដែលមានព្រះជន្មរស់ឡើងវិញ ។ ពួកគេស្ទាបស្នាមរបួសនៅព្រះហស្ដ ព្រះបាទា និងចំហៀងទ្រង់ ។…
បន្ទាប់ពីការមានព្រះជន្មរស់ឡើងវិញ ពួកសិស្សបានប្រែជាស្រស់ស្រាយ ។ ពួកគេធ្វើដំណើរទូទាំងពិភពលោក… ប្រកាសដោយអង់អាចថា ព្រះយេស៊ូវគឺជាព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់បានមានព្រះជន្មរស់ឡើងវិញហើយ ។
ពួកគេជាច្រើន … បានស្លាប់ដោយការធ្វើឃាតដោយសារសាសនា ទីបន្ទាល់អំពីការរស់ឡើងវិញរបស់ព្រះគ្រីស្ទនៅលើបបូរមាត់របស់ពួកគេ នៅពេលពួកគេត្រូវបានគេសម្លាប់ ។
ការមានព្រះជន្មរស់ឡើងវិញបានផ្លាស់ប្តូរជីវិតមនុស្សដែលបានឃើញការណ៍នោះ ។ តើវាពុំផ្លាស់ប្តូរជីវិតរបស់យើងទេឬ ?
យើងទាំងអស់គ្នានឹងក្រោកឡើងពីផ្នូរ ។
ពីព្រោះតែព្រះជន្ម និងការបូជាដ៏អស់កល្បជានិច្ចរបស់ព្រះអង្គសង្គ្រោះនៃពិភពលោកនេះ នោះយើងនឹងបានរួបរួមជាមួយនឹងអស់អ្នកដែលយើងស្រឡាញ់វិញ ។
… នៅថ្ងៃនោះយើងនឹងរីករាយ ព្រោះព្រះមែស៊ីយកឈ្នះលើអ្វីៗទាំងអស់ ដើម្បីឲ្យយើងអាចរស់នៅជារៀងរហូត ។
ដោយសារពិធីបរិសុទ្ធពិសិដ្ឋនានាដែលយើងទទួលនៅក្នុងព្រះវិហារបរិសុទ្ធ នោះការចេញដំណើររបស់យើងពីជីវិតរមែងស្លាប់ដ៏ខ្លីនេះ ពុំអាចបំបែកទំនាក់ទំនងដែលធ្លាប់បានចងភ្ជាប់គ្នាដោយខ្សែដែលធ្វើមកពីខ្សែអស់កល្បជានិច្ចទៀតបានឡើយ ។
វាជាទីបន្ទាល់ដ៏ឱឡារិករបស់ខ្ញុំថា សេចក្ដីស្លាប់ពុំបញ្ចប់អ្វីៗដែលមាននោះទេ ។…
សូមឲ្យយើងយល់ ហើយរស់នៅក្នុងអំណរគុណសម្រាប់អំណោយដែលពុំអាចកាត់ថ្លៃបាន ដែលកើតមានចំពោះយើងក្នុងនាមជាបុត្រា និងបុត្រីរបស់ព្រះវរបិតាសួគ៌ដែលពេញដោយក្តីស្រឡាញ់ និងសម្រាប់ការសន្យានូវថ្ងៃដ៏ភ្លឺចែងចាំងនោះ នៅពេលយើងទាំងអស់គ្នានឹងក្រោកឡើងដោយជ័យជម្នះពីផ្នូរ ។
… មិនថាថ្ងៃសុក្ររបស់យើងមានភាពងងឹតខ្លាំងប៉ុណ្ណានោះទេ ថ្ងៃអាទិត្យនឹងមកដល់ ។