នៅលើវេទិកា
កន្ត្រក និងដបទឹក
រូបថតរបស់ស៊ីស្ទើរ អូកាហ្សាឃី ទទួលបានសិទ្ធិអនុញ្ញាតជាផ្លូវការពីបណ្ណាល័យប្រវត្តិសាស្ត្រសាសនាចក្រ រូបភាពផ្សេងទៀតមកពី Getty Images
ព្រះបានប្រទានអំណោយទាន ភាពចម្រុះគ្នា ភាពផ្សេងៗគ្នាជាច្រើនដល់ពួកយើង ប៉ុន្តែរឿងចាំបាច់នោះគឺជាអ្វីដែលយើងស្គាល់អំពីគ្នា — គឺថាយើងទាំងអស់គ្នាគឺជាកូនរបស់ព្រះ ។
ការអញ្ជើញរបស់យើងក្នុងនាមជាសមាជិកសាសនាចក្រគឺ ឲ្យយើងទាំងអស់គ្នារៀនពីគ្នាទៅវិញទៅមក ដើម្បីឲ្យយើងទាំងអស់គ្នាអាចស្រឡាញ់គ្នា ហើយរីកចម្រើនជាមួយគ្នា ។
គោលលិទ្ធទាំងឡាយនៃដំណឹងល្អគឺពិតជាសំខាន់ណាស់ ។ វាចាំបាច់ ប៉ុន្តែការបង្ហាញវាចេញគឺជាជម្រើស ។ ខ្ញុំសូមចែកចាយពីគំរូសាមញ្ញមួយដើម្បីបង្ហាញពីភាពខុសគ្នារវាងគោលលទ្ធិសាសនាចក្រ និងការបង្ហាញវប្បធម៌ ។ នេះគឺជាដបទឹកផ្លែប៉ែសមកពីយូថាហ៍ ដែលបានរៀបចំដោយមេផ្ទះម្នាក់នៅយូថាហ៍ដើម្បីផ្តល់ជាអាហារដល់គ្រួសារគាត់អំឡុងពេលរដូវធ្លាក់ព្រិល ។ អ្នករស់នៅរដ្ឋហាវ៉ៃពុំយកផ្លែឈើមកច្រកក្នុងដបឡើយ ។ ពួកគេបេះផ្លែឈើគ្រប់គ្រាន់ល្មមសម្រាប់បរិភោគពីរបីថ្ងៃ ហើយដាក់វាទុកក្នុងកន្ត្រកដូចនេះ សម្រាប់គ្រួសាររបស់ពួកគេ ។ កន្ត្រកនេះមានផ្លែស្វាយ ចេក ម្នាស់ និងល្ហុង … មេផ្ទះនៅប៉ូលីណេសៀនម្នាក់បានបេះវាដើម្បីផ្តល់អាហារដល់គ្រួសារគាត់នៅក្នុងអាកាសធាតុមួយដែលផ្លែឈើទុំពេញមួយឆ្នាំ ។
កន្ត្រក និងដបទឹកគឺជាប្រដាប់ដាក់របស់ខុសគ្នា ប៉ុន្តែអ្វីដែលនៅក្នុងនោះគឺវាដូចគ្នា ៖ គឺផ្លែឈើសម្រាប់គ្រួសារ ។ តើដបនោះត្រូវ ហើយកន្ត្រកនោះខុសឬ ? អត់ទេ ទាំងដបទាំងកន្ត្រកគឺត្រូវទាំងអស់ ។ វាជាវត្ថុប្រើប្រាស់សមរម្យទៅតាមវប្បធម៌ និងតម្រូវការរបស់មនុស្ស ។ ហើយទាំងដប និងកន្ត្រកអាចដាក់អ្វីសមរម្យតាមដែលវាដាក់បាន ដែលក្នុងករណីនេះគឺជាផ្លែឈើ ។
ឥឡូវ តើផ្លែឈើជាអ្វី ? ប៉ុល ប្រាប់យើងថា « ផលផ្លែនៃព្រះវិញ្ញាណនោះគឺសេចក្តីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត [ និង ] ដឹងខ្នាត » [ កាឡាទី ៥:២២–២៣ ] ។ នៅក្នុងភាពជាបងប្អូនស្រីនៃសមាគមសង្គ្រោះ នៅក្នុងភាពជាបងប្អូនប្រុសនៃកូរ៉ុមបព្វជិតភាព នៅក្នុងគារវភាពក្នុងការមកជួបជុំគ្នាដើម្បីទទួលទានសាក្រាម៉ង់ ផលផ្លែនៃព្រះវិញ្ញាណបង្រួបបង្រួមយើងនៅក្នុងសេចក្តីស្រឡាញ់ អំណរ និងភាពសុខសាន្ត មិនថាសមាគមសង្គ្រោះនៅទីក្រុង តៃវ៉ាន់ ឬ តុងហ្គា មិនថាកូរ៉ុមបព្វជិតភាពនៅរដ្ឋ ម៉នថាណា ឬម៉ិកស៊ិក ហើយមិនថាការប្រជុំសាក្រាម៉ង់នៅប្រទេសហ្វីជី ឬនៅហ្វីលីពីនឡើយ ។
… ពេលខ្ញុំត្រូវបានហៅឲ្យបម្រើជាប្រធានសមាគមសង្គ្រោះទូទៅ ប្រធាន [ ហ្គរដុន ប៊ី ] ហ៊ិងគ្លី បានទូន្មានខ្ញុំដូច្នេះ ៖ « អ្នកនាំគុណភាពដ៏វិសេសដល់គណៈប្រធាននេះ ។ អ្នកនឹងត្រូវបានទទួលស្គាល់ថាជា មនុស្សម្នាក់តំណាងឲ្យអស់អ្នកដែលនៅក្រៅព្រំដែននៃសហរដ្ឋ និងកាណាដា ។… ពួកគេនឹងឃើញអ្នកថា ជាតំណាងឲ្យភាពរួមគ្នាតែមួយរបស់ពួកគេជាមួយសាសនាចក្រ » ។ លោកបានផ្តល់ការប្រសិទ្ធពរឲ្យខ្ញុំថា អណ្តាតខ្ញុំនឹងបានធូរពេលខ្ញុំនិយាយទៅកាន់មនុស្ស ។៤
… [ ពេលខ្ញុំនិយាយនៅលើទឹកដីផ្សេងៗ ] ខ្ញុំអាចមានអារម្មណ៍ពីព្រះវិញ្ញាណនាំពាក្យខ្ញុំទៅកាន់ដួងចិត្តពួកគេ ហើយខ្ញុំអាចទទួលអារម្មណ៍នៃ « ផលផ្លែនៃព្រះវិញ្ញាណ » ត្រឡប់មកកាន់ខ្ញុំវិញជាសេចក្តីស្រឡាញ់ អំណរ និងសេចក្តីជំនឿរបស់ពួកគេ ។ ខ្ញុំអាចទទួលអារម្មណ៍ពីព្រះវិញ្ញាណក្នុងការធ្វើឲ្យយើងក្លាយជាតែមួយ ។
បងប្អូនប្រុសស្រី ទោះបីជាផ្លែឈើរបស់បងប្អូនជាផ្លែប៉ែស ឬល្ហុងក្តី ទោះបីជាបងប្អូនយកវាដាក់ក្នុងដប ឬក្នុងកន្ត្រកក្តី យើងសូមអរគុណចំពោះការផ្តល់សេចក្តីស្រឡាញ់ឲ្យពួកគេ ។ ព្រះវរបិតាគង់នៅស្ថានសួគ៌អើយ សូមឲ្យយើងក្លាយជាតែមួយ ហើយសូមឲ្យយើងក្លាយជារបស់ផងទ្រង់ ៥ ខ្ញុំសូមអធិស្ឋានក្នុងព្រះនាមពិសិដ្ឋ ព្រះយេស៊ូវគ្រីស្ទ អាម៉ែន ។