O lea Mataupu i luga o lea Mataupu
1 Nifae 3:7
Na poloaiina e le Alii Nifae e alu loa ma fai.
7 Ma sa oo ina fai atu aʼu, o Nifae, i loʼu tamā: O le a ou alu ma fai mea ua poloaiina e le Alii, aua ua ou iloa e lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou.
O le a ou alu
“E te faaalia lou faalagolago i le [Atua] pe a e faalogo ma le faamoemoe e aoao mai ai, ia salamo ona e alu lea ma faia soo se mea ua Ia poloai mai ai. Afai e lava lou faalagolago i le Atua e faalogologo ai i Lana savali i lauga uma, pese, ma tatalo i konafesi [taitasi], o le a e mauaina. Ma afai loa e te alu ma faia le mea ua Ia finagalo e te faia, o le a faatupulaia lou malosi e faalagolago ai ia te Ia ma o le a oo mai le taimi, o le a lofituina ai oe i le loto faafetai ina ua e iloa ua Ia faalagolagoina oe.“
Peresitene Henry B. Eyring, Fesoasoani Muamua i le Au Peresitene Sili, “Faalagolago i le Atua Ona E Alu ai Lea,” Liahona, Nov. 2010, 70.
Fai
“Sa ou faia lenei mea ma au tulafono: Pe a faatonuina ai e le Alii, ia faia loa
Aoaoga a Peresitene o le Ekalesia: Iosefa Samita (2007), 171.
Ua poloai mai le Alii
“O poloaiga uma a le Alii ua tuuina mai mo lo tatou atiina ae, alualu i luma, ma le tuputupu a’e.“
Elder Robert D. Hales (1932–2017) o le Korama a Aposetolo e Toasefululua, “Afai e te Fia Oo i le Ola, Ia e Tausi i Poloaiga,” Liahona, Iulai 1996, 42.
O le a Ia saunia se ala
I le Feagaiga Tuai, o le saunia o se ala o lona uiga o le faatuina o se auala lelei, ma ua lelei ona faailogaina (tagai i le Teuteronome 19:3) po o le faamamaina o se ala i le aveeseina o mea faalavefau (tagai i le Isaia 40:3).
Pe a tuuina mai e le Alii ia i tatou se poloaiga, o le a Ia saunia i taimi uma se ala mo i tatou pe afai ua tatou naunau e faatuatuaina o Ia ma usiusitai. Ae faapei o Nifae, e tatau ona tatou faatinoina le faatuatua muamua; ona tuuina mai lea e le ala o ia lava, aua o le Alii “e galue o ia e ala i le mana, e tusa ma le faatuatua o le fanauga a tagata,” (Moronae 10:7).
Faataunuu
”Afai e tusa lo outou faatuatua … e leai foi se mea tou te le mafaia.”