E Manaomia e Tagata Uma se Uo
Tim Overton
Arisona, ISA
Ata na tusia e Allen Garns
Na ou agai atu i faitotoa o le lotu ma le manatu manino e tasi i lou mafaufau: “Afai ou te le mauaina se uo i le lotu i le aso, ou te le toe sau lava. “ Na ou auai i le lotu ma se uo i ni nai taimi muamua, ae o le taimi muamua lenei ua ou auai o se tagata sailiili na o au ma mo au lava. Na ou lagonaina lou manaomia ona auai i le Ekalesia, ae na i ai ni nai matau ma ni popolega.
Ina ua ou ulufale atu i le lotu, na faafeiloai au e se talavou matua faatasi ma se ataata lapoa ma se faatalofa agalelei lava. Sa ia faailoa mai o ia o Dane McCartney. Na ou vaai muamua ia Dane, ina ua ia taumafai atu mo le au soka a le kolisi na ou taalo ai foi. Na mou atu lou popole ina ua ia valaaulia au e nofo faatasi ma ia i le taimi o sauniga a le Ekalesia. Sa ia valaaulia foi a’u matou te fai ’aiga faatasi ma lona aiga mulimuli ane. Ou te lei maua lava se avanoa e lagona ai le tuuatoatasi i lena aso. Na aapa mai Dane ma lona aiga ia te au ma fesoasoani e taliina le tele o au fesili. Sa ou auai i le Ekalesia i ni nai vaiaso mulimuli ane.
Pe ana faapea na ona faauo mai lava o Dane ia te au i lena aso, masalo ou te tuua lava le lotu i le mavae ai o le sauniga faamanatuga ma le toe sau, ma mafaufau e faapea na ou taumafai ae o lena lotu e le mo au. Ao mautinoa lava le taua o le faauo, o le avea ma se uo e aofia ai le sili atu nai lo na ona agalelei. O le alofa ma le lagolago o le au McCartney sa taua i lou liua.
Ua 14 tausaga talu ai. Talu mai lena taimi na ou auauna atu i se misiona faafaifeautalai, faaipoipo i le malumalu, ma ua faamanuiaina i se fanau aulelei e toalima. Na ou auauna atu foi o se epikopo ma se peresitene o le siteki. Ua ou fefautuaai faatasi ma tagata o e na le toe o mai i le lotu ona sa latou lagonaina le tuuatoatasi ma leai ni uo i le lotu. E nutimomoia lou loto mo i latou. Ou te moomoo maimau pe ana aapa atu se tasi ia i latou e pei ona faia e le au McMartney ia te au.
Ou te faafetai i lo’u Tama Faalelagi ona sa faauoina au e Dane i lena aso. Ou te faamoemoe o le a tatou lototetele uma lava e avea ma ni uo ia i latou o e ua sailiili i le Ekalesia, e fou mai i ai, pe ua toe foi mai i ai.