O Lau Misiona i totonu o Lou Aiga
E alala le tusitala i Chihuahua, Mekisiko.
Na tumau pea le fesili a lau peresitene o le misiona ia te au—aisea ua faatagaina ai au e le Alii e nofo ma faauma lau misiona?
Ina ua ou tatalaina lou valaauga o le misiona, na ou tei i le vaai atu, ua tofia au i le Misiona a Mekisiko Veracruz. Na nonofo lo matou aiga i Veracruz ina ua ou fanau mai, ma o le toatele o lou aiga lautele e nonofo iina. E na o matou lava tagata o le Ekalesia i lo matou aiga, o lea na ou fiafia ai i le mafaufau atu i le avanoa e faasoa atu ai le talalelei i ou aiga.
Ae ui i lea, o le taimi na ou i ai iina, ou te lei auauna atu lava i se eria e latalata i ou aiga. Na ou tuuina atu o latou tuatusi i au soa ina ia mafai ona latou asiasi ia i latou.
I le sefululima masina o lau misiona, na amata ai ona i ai ni faafitauli i ou tulivae. Na faateleina le tiga o lou tulivae ma e i ai taimi na le mafai ai ona tatalia le tiga. Ina ua ou alu i le fomai, o lana faaiuga e faapea pau le fofo o le taotoga. O lona uiga o le a ou toe foi vave atu i le fale. Ou te le talitonu ua tupu lenei mea; ua toe tolu ou masina o totoe o lau misiona.
Na ou filifili e liliu atu i le Alii ma ole atu mo le faamafanafanaga ma, afai e mafai, o se vavega. O se tali i lau tatalo, na ou lagonaina ai le mafanafana i lou loto. Na faamalosiau mai le faletua o lau peresitene o le misiona ia te au faatasi ma se alofa faatina ia toe foi atu i le fale ia maua le malosi, ma na ou tusi atu i lou aiga e faailoa atu ia i latou e faapea o le a ou alu atu i le fale i le lua vaiaso.
Ina ua maea lena, na faia sou faatalanoaga e le peresitene o le misiona. Na ia tau mai ia te au e faapea na faafesootai atu o ia e lou tina ma tuuina atu ia te ia se isi filifiliga: E mafai ona sau o ia i Veracruz e tausi au i le fale o se fafine ma se tamaloa o lou aiga i le taimi o lou mai, ona o le a ou le toe faia ni gaoioiga faamisiona mo se taimi. Na tau mai e lau peresitene ia te au e faapea atonu e mafai ona avea o se filifiliga lelei ae peitai e tatau ona ia fesili atu mo se faatagaga.
Ina ua ou iloaina mulimuli ane e faapea ua tuuina mai le faatagaga, na ou lagonaina lou fatu ua osooso i le fiafia—e mafai ona ou nofo ma faauma lau misiona! Na ou faia se tatalo o le loto faafetai.
I le aso o le taotoga, na tau mai e lau peresitene o le misiona ia te au, “Sister Gómez, e manaomia lou sailia pe aisea ua faataga ai oe e le Alii e nofo i Veracruz.” Mai lena taimi e agai i luma, na ou naunau e saili le mafuaaga.
O lena lava aso, na tau mai ai e lou tina, lea na taunuu mai i Veracruz, ia te au, “O lou Mama Lita (le tina o lo’u tama) o loo sau i le falemai e vaai oe. O se avanoa lelei lenei e fesili ai ia te ia e uiga i ou tuaa.”
“Oka se manatu lelei!” Sa ou mafaufau ai. Ua le mafai ona ou faatali e fesili atu i ou aiga e uiga i ou tuaa. Na fesili mai Mama Lita ia te au po o le a le uiga o le avea ma faifeautalai. Na ou aoaoina o ia e uiga i le Toefuataiga ona talanoa atu lea ia te ia e uiga i le fuafuaga o le faaolataga, talu ai o lou tama matua—lona toalua—na maliu i ni nai tausaga i tua atu. Ona sau lea o se fesili na ou faamoemoe o le a ia faia mai: “Pe o le a mafai ona ou toe vaai i lau pele?”
O lana fesili na faatumuina ai au i le olioli, ma na ou tali atu, “Ioe, o le a e toe vaai i ai!” Na feemo fiafia ona mata. Na ofoofogia le faasoa atu o lena upumoni e faavavau ia te ia. Na toe oo mai nisi fesili, e faatatau uma lava i le fuafuaga o le faaolataga. I lou taimi, na ou faia atu ni fesili na ia te au e uiga i lou aiga ina ia mafai ai ona ou faatumuina lau gafa o le aiga. Na ou lagonaina le ala na faia ai e le Agaga o ia ina ia maua se malamalamaaga i le fuafuaga o le faaolataga.
Mulimuli ane, ao ou asiasi atu i le isi vaega o lou aiga, na ou talanoa atu i le tina o lou tina, lea na fesoasoani ia te au e saili isi igoa o le aiga. Na mafai foi ona ou faasoa atu le talalelei ia i latou uma lava na ma asia.
Na ou iloaina le mafuaaga na faatagaina ai au e le Atua ia muamua alu atu i Veracruz i lau misiona ma ona nofo ai lea iina ina ua uma lou taotoga. Na ou foi atu i lau misiona faatasi ma se fiafia tele mo talafaasolopito o aiga. Faafetai i le tausiga agaalofa a lou tina, na ou mafai ai ona faauma lau misiona.
Na maliu le tina o lou tama i se tausaga mulimuli ane, lea na ou faanoanoa ai lava. I le isi itu, na ou lagonaina le faafetai ma le fiafia ua mafai ona ou faia ana galuega o le malumalu i le tasi le tausaga mulimuli ane. Ina ua papatisoina au mo ia, na le mafai ona ou taofiofia ou loimata o le olioli. O le a iu lava ina mafai ona ia faatasi ma lana pele, lea na ia faaipoipo i ai i le silia ma le 60 tausaga.
E leai sou masalosalo e silafia e le Alii o tatou loto. Na Ia faatagaina au e nofo i Veracruz e aoao lou aiga ma folafola atu le tala fiafia na aumaia e lo tatou Faaola, o Iesu Keriso. Ou te iloaina e faapea i se aso o le a ou mafai ai ona toe vaai i ou matua matutua. O la tatou tiutetauave le faia o galuega a o tatou tuaa ina ia i ai se aso o le a tau mai ai e le Atua ia i tatou,“Sau ia ia te aʼu, oe ua faamanuiaina, ua i ai se nofoaga ua saunia mo oe i maota o loʼu Tamā.” (Enosa 1:27).