O Ata o le Faatuatua
Feinga Fanguna
Tongatapu, Toga
I le avea ai ma se vane laau, na tausia e Feinga lona toalua, le la fanau e toatolu, ma le isi toatolu o loo la tausia. Sa le faigofie pea mea uma, ae e ala mai i le faamuamuaina o le Atua, na lava lava mea e tausia ai i latou.
Christina Smith, le pue ata
Ina ua ‘faatoa uma ona ma faaipoipo ma lou toalua, o Anau, ou te vaneina ni nai mea laiti ma alu atu i le maketi e faatau atu. O nisi aso ou te foi mai ai ma se tupe, o isi aso e leai ai se mea e taulia.
Na ou faalogo i se tamaloa na foi mai Hawaii lea na aoaoina ai e se vaega o Maori mai Niu Sila o ia e vaneina laau. Ina ua ma feiloai, na ia fai mai, “E le o au o se faiaoga, o au o se tamaloa vane laau. Ae afai e te fia fesoasoani i le fausia o se alia (o se paopao Toga), e mafai ona ta o faatasi ma au.“ Na ou aoaoina le tele o mea e uiga i le vaneina o laau mai ia te ia.
I lou faamanuiaga faapeteriaka, ua folafolaina ai ia te au e faapea o le a faamanuiaina au e le Atua i galuega ou te faia i ou lima ma o le a ou faaaogaina lau taleni e fesoaoani ai i tagata. Ua faataunuuina nei folafolaga.
Ua ou malaga i Ausetalia, Niu Sila, Guam, Iapani, ma le Iunaite Setete e suitulaga ia Toga i faaaliga o le vaneina o laau ma faatufugaga.
I le avea ai ma vane-laau, na mafai ai ona ou tausia lou aiga. E toatolu le maua lava fanau ma lou toalua ma le isi toatolu o loo ma tausia. Ma te faia mea ma te mafaia e fesoasoani ai i fanau. Ma te taumafai e faaali atu ia i latou le fiafia e aumaia e le talalelei.
E i ai a matou puaa, povi, ma moa. E i ai a matou fai ma ulu. Matou te totoina manioka ma umala ia matou te faasoa atua i isi.
Ua faamanuiaina i matou i le tele o auala. E manatu o matou aiga matou te mauoa. Matou te le mauoa, ae ua matou maua mea uma matou te manaomia aua matou te faamuamuaina le Atua.
Matou te tausia poloaiga, o i le lotu, faia afiafi faaleaiga, faitau le Tusi a Mamona ma tatalo faatasi o se aiga, ma matou te totogiina la matou sefuluai. O le mea lena e aumaia ai faamanuiaga i lo matou aiga.