O Se Faamanuiaga o le Faamafanafanaga
Sarah Bieber
Calgary, Alberta, Kanata
Ata na tusia e Allen Garns
Ina ua manino lava o lou tama o le a maliu i le kanesa, na fai mai lou tina ma le lotovaivai, “Ou te manatu o le a tatou le mauaina la tatou vavega.” I le taimi lena, na ou lagona ai e faapea o le a maua e lo matou aiga ni vavega, e tusa lava pe afai o le faasaoina o le ola o lou tama e le aofia ai.
Na oo mai se tasi o vavega i se tasi o taeao ina ua fesili mai lau uo o Beth ia te au po o a au fuafuaga mo le aso. Na ou tau atu ia te ia na ou fuafua e faaalu le aoauli e faatasi ai ma lou tama i le falemai, ae na faaletonu lau fuafuaga ona o le tausi tama. Na ofo mai Beth ma le agalelei e vaai lau fanau ina ia mafai ona ou faaaluina se taimi faatasi ma lou tama. Na ia ofo mai foi e aveina atu le meaai o le po mo lou aiga. Sa ou matuai fiafia lava.
Ina ua ou taunuu atu i le falemai, na leai se malosi o lou tama e pupula ai ona mata pe taumafaina se meaai. Ae e lei leva lava ae ona mauaina se faateleina maoae o le malosi. Sa ia matuai mataala lava mo le sili atu ma le tolu itula, ma na ma talanoa ma na oo lava ina savavali faataamilo i le falemai mo ni nai taimi. E leai ni isi asiasiga na o mai i le taimi lea. Na faamanuiaina au i le mauaina o lenei taimi e faatasi ai na o au lava ma ia.
Na ma talie ma na ma fetagisi faatasi i lena aso. Na faasoa mai e lou tama ia te au ona lagona e uiga i le tuua o lenei olaga i le lalolagi ma le mea e sili ona taua ia te ia—o lana molimau i le talalelei a Iesu Keriso. O lena aoauli o se tasi o manatuaga e sili ona pele o lo’u olaga. Na ia maliu i le tolu aso mulimuli ane.
Faatoa ou iloaina ina ua mavae se vaiaso o lona falelauasiga e faapea o le taimi mulimuli na ou talanoa ai ma lou tama o le aoauli lea na tausi ai e Beth lau fanau. Faatasi ai ma loimata na tafe ifo i ou foliga, na ou auina atu ai se imeli ia Beth e faafetai atu ai ia te ia mo lana auaunaga ma faamatala atu le taua tele ia te au.
Na tali mai Beth, “E i ai sau molimau e faapea e finagalo le Atua e faasafua mai ia i tatou faamanuiaga o le faamafanafanaga ma le alofa tunoa—ae maise lava pe a tatou feagai ai ma se mea faigata. Sa ou tatalo mo le faamafanafanaga mo oe ma lou aiga i lenei taimi.”
Na ou ootia i le uunaia ai e le Atua o Beth ia avea ma se faamanuiaga na ia tatalo ai ia ou mauaina. Ou te iloaina e tuuina mai e le Atua ia i tatou faamanuiaga o le faamafanafanaga i taimi faigata i o tatou olaga.