Na Ou Mulimuli i le Uunaiga Muamua
Kenny Quispitupac
Lima, Peru
Ata na tusia e Simone Shin
I se tasi aso Sa ina ua foi mai i le fale mai le lotu, na toeitiiti uma le aoauli atoa o ou moe.
Na pogisa i le taimi na ou ala ai i luga. Na ou amataina lau fuafuaga faalevaiaso i se tatalo e fesili atu pe faapefea ona sili atu lau auaunaga i le Alii. Na ou lagonaina le uunaiga e alu e asiasi i aiga. Ua ta le 8 i le afiafi, o lea na ou faapea ifo ai ia te au lava o le a ou alu i le aso Lua e sosoo ai, ae na faateleina le malosi o le uunaiga e alu i lena lava po.
Na faamanatu mai ai ia te au le fautuaga na ou faalogo o tuuina mai e Elder Ronald A. Rasband o le Korama a Aposetolo e Toasefululua i le nofoaga autu e aoao ai faifeautalai i Lima, Peru, ao ou faiaoga ai iina: “Mulimuli i le uunaiga muamua.” Na vave lava ona ou valaau i lau soa o faiaoga o aiga, ae e lei tali mai o ia. Na ou filifili e alu pea.
Na ou tuua le fale ma vaaia se ositaulaga talavou i lau uarota o savali i lalo o le auala. Na ou agai atu ia te ia ma fesili atu pe mafai ona ia sau ma te o. Sa ioe mai o ia. I le aiga muamua, na tatala mai ai e le uso le faitotoa. Na ou tau atu ia te ia na ou lagonaina lou manaomia ona vaai ia te ia. Na ia ataata mai ma tau mai ia i maua o le a faia sona taotoga i le aso e sosoo ai ma o le a faafetaia se faamanuiaga. Na ou tuuina atu ia te ia se faamanuiaga, ma na ma tuua loa mo le ma asiasiga e sosoo ai.
Na ta le 8:40 i le afiafi ae ma taunuu i le fale o le aiga e sosoo ai. Na latou tetei i le vaaia o i maua aua ua fai si tuleva o le afiafi. Na ma ulufale atu i le fale ma iloa ai na mai le tama. Na ou ofo atu e tuuina atu ia te ia se faamanuiaga.
Ao ma foi atu i le fale, na ou faasoa atu i lau soa talavou le Moronae 7:13: “O mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua.”
Na ou tau atu ia te ia e faapea o le mea lea na faatoa tupu e le o se mea na tupu faafuasei aua na ou mauaina se uunaiga. Na ia fai mai e talitonu i ai o ia aua ae ou te lei oo atu ia te ia, na ia tatalo ia iloa pe faapefea ona iloaina le Agaga.
Ou te le iloaina pe o le uunaiga e alu e asiasi i aiga sa sili atu ona aoga mo au aiga pe mo lenei ositaulaga talavou, ae ou te faafetai na ou faalogo. Ou te iloaina o faamanuiaga silisili e oo mai ao tatou mulimuli i le uunaiga muamua a le Agaga.