Mataupu Faavae a Faiaoga Asiasi

Faamasani ia te Ia ma Lona Aiga

O le faiaoga asiasi e faatatau i le faamasani ma le alofa faamaoni i tamaitai taitoatasi ina ia mafai ai ona tatou fesoasoani e faamalosia lona faatuatua ma tuuina atu le auaunaga.

relief society sisters taking a selfie

O Rita Jeppeson ma lana faiaoga asiasi na avea ma uo lelei ao latou feiloai ma faasoa talanoaga o le talalelei. Ae o a la asiasiga na aofia ai foi le taaalo faatasi i ni taaloga e faaaoga ai upu, lea e fesoasoani i le mafaufau matua a Rita ina ia tumau le mataalia. Aua sa aoao e lana faiaoga asiasi le mea e manaomia ma fiafia i ai Rita, la te gauai atu uma i asiasiga taitasi. … E tele naua mea e mafai ona faia e uso i le taimi o se asiasiga, e pei o le savalivali faatasi po o le fesoasoani i se uso i ana galuega.O Lusi Maki Samita, le tina o le perofeta o Iosefa Samita, sa faaalia ona lagona i le 1842 e faatatau i auala e tatau ai i tamaitai o le Au Paia o Aso e Gata Ai i le faatoa faavaeina lea o le Aualofa ona lagonaina mo le tasi ma le isi. Sa ia saunoa, “E tatau ona tatou faapelepele i le tasi ma le isi, leoleoina le tasi ma le isi, faamafanafanaina le tasi ma le isi ma faateleina le aoaoina, ina ia mafai ona tatou nonofo faatasi i le lagi.”¹ E moni lava lenei mea seia oo mai i le aso.

Na saunoa Elder Jeffrey R. Holland o le Korama a Aposetolo e Toasefululua, “Ia avea ma suivaaia o le Atua i Ana fanau. … Ae, matou te faamoemoe … o le a outou atiaeina se amioga o le popole faamaoni mo le au paia ina ia aoaoina i le talalelei, leoleoina ma le tausiaina o le tasi ma le isi, talanoaina o manaoga faaleagaga ma faaletino i soo se auala e fesoasoani atu ai.”²

Na poloaiina e le Alii le fanauga a Isaraelu e ala mai ia Mose e faapea ”o le tagata ese o loo aumau ia te outou ia tusa lava ia ia te outou ma le tagata o le eleele e te alofa atu ia te ia e pei o oe lava ia te oe” (Levitiko 19:34). Atonu o tamaitai tatou e te faiaoga asiasi i ai o ni tagata “ese” ao tatou amataina la tatou auaunaga, ae peitai ao tatou faamasani ia te ia ma lona aiga, o le a faateleina lo tatou manao ia “tauave avega a le tasi, ina ia māmā” ma ia faia ia “fili faatasi o [tatou] loto i le lotogatasi ma le alofa o le tasi i le isi” (Mosaea 18:8, 21).

Relief Society seal

Faatuatua, Aiga, Toomaga

Faamatalaga

1. Lusi Maki Samita, i O Afafine i Lo’u Malo: O Le Talafaasolopito ma le Galuega a le Aualofa (2011), 25.

2. Jeffrey R. Holland, “Sui Vaaia i le Ekalesia,” Liahona, Nov. 2016, 62.

Mafaufau I le Mea Lenei

I totonu o aiga o tamaitai o loo lua asia, o a ni mea o le a tutupu e tatau ona lua iloaina ma manatuaina?

Auaunaga

Nai lo le saunia o se savali faapitoa, o le a folasia atu e lenei itulau se mataupu faavae e ese mai i masina taitasi e fesoasoani ia i tatou ia sili atu ona mataalia le auauna atu i le tasi ma le isi. Ao e tatalo ma saili le uunaiga, o le a e silafia le savali faaleagaga ma le auaunaga e manaomia e uso taitoatasi.