រឹងប៉ឹង ពេញមួយសប្តាហ៍
យុវវ័យទាំងនេះចែកចាយអំពីរបៀបដែលព្រះអម្ចាស់ប្រទានពរដល់ពួកគេ នៅពេលពួកគេទទួលទានសាក្រាម៉ង់ ហើយចងចាំសេចក្តីសញ្ញារបស់ខ្លួនពេញមួយសប្តាហ៍ ។
វាជាយប់ថ្ងៃអាទិត្យ ។ នោះមានន័យថាថ្ងៃស្អែកគឺជាថ្ងៃចន្ទ — ត្រូវត្រឡប់ទៅធ្វើកិច្ចការសាលា ធ្វើការងារ ហាត់សមបាល់ឱប រៀនលេងព្យាណូ និងកិច្ចការផ្សេងៗទៀត ។ មានកិច្ចការជាក់លាក់ជាច្រើនដែលត្រូវធ្វើក្នុងសប្តាហ៍នេះ ! ប៉ុន្តែអ្នកអាចធ្វើកិច្ចការទាំងនោះបាន ។ អ្នកអាចសម្រេចកិច្ចការជាច្រើនដែលអ្នកគ្រោងចង់ធ្វើសប្តាហ៍នេះ ។
តើអ្នកចង់ដឹងថាធ្វើបែបណាដែរឬទេ ?
អ្នកមានភាពរឹងមាំខាងវិញ្ញាណជួយដល់អ្នក ។ ជារៀងរាល់ថ្ងៃអាទិត្យ អ្នកអាចទទួលទានសាក្រាម៉ង់ ហើយរំឭកសេចក្តីសញ្ញាដែលអ្នកបានចុះ ។ នៅពេលអ្នកធ្វើបែបនោះ អ្នកត្រូវបានសន្យាថា ប្រសិនបើអ្នកលើកដាក់មកលើខ្លួនអ្នកនូវព្រះនាមនៃព្រះយេស៊ូវគ្រីស្ទ ចងចាំទ្រង់ ហើយកាន់តាមព្រះបញ្ញត្តិទាំងឡាយរបស់ទ្រង់ នោះអ្នកនឹងមានព្រះវិញ្ញាណរបស់ទ្រង់គង់នៅជាមួយអ្នក ជាដរាប ( សូមមើល គ. និង ស. ២០:៧៧, ៧៩ ) ។ នោះមានន័យថា អ្នកអាចទទួលអារម្មណ៍ថាត្រូវបានពង្រឹងខាងវិញ្ញាណ ទោះបីអ្នកជួបនឹងរឿងអ្វីក៏ដោយក្នុងសប្តាហ៍នេះ ។
យើងបានសូមឲ្យយុវវ័យមួយចំនួនចែកចាយអំពីបទពិសោធន៍របស់ពួកគេជាមួយពិធីសាក្រាម៉ង់ និងរបៀបដែលពិធីនេះបានពង្រឹងដល់ពួកគេ នៅពេលពួកគេចងចាំសេចក្តីសញ្ញារបស់ខ្លួនពេញមួយសប្តាហ៍នោះ ។ សូមអានអំពីរឿងមួយចំនួនរបស់ពួកគេ ។ ប្រហែលជាអ្នកធ្លាប់ជួបនឹងរឿងស្រដៀងគ្នានេះផងដែរ !
ការចងចាំព្រះអង្គសង្គ្រោះជានិច្ចជួយខ្ញុំឲ្យមានភាពក្លាហាននៅក្នុងការប្រឈមមុខនឹងការសាកល្បងលំបាកៗ ។ កាលរៀននៅវិទ្យាល័យបានពាក់កណ្ដាលឆ្នាំ គ្រួសារខ្ញុំបានប្តូរទីលំនៅទៅសហរដ្ឋវិញ ប៉ុន្តែខ្ញុំបន្តនៅប្រទេសអូស្ត្រាលីតែម្នាក់ឯង ដើម្បីរៀនបញ្ចប់ថ្នាក់នោះសិន ។ បន្ទាប់ពីខ្ញុំទៅលេងពួកគេអំឡុងពេលវិស្សមកាល ខ្ញុំបានជិះយន្តហោះត្រឡប់មកប្រទេសអូស្ត្រាលីវិញ ហើយខ្ញុំមានអារម្មណ៍ថាឯកោខ្លាំងណាស់ ។ ប៉ុន្តែភ្លាមនោះខ្ញុំបានដឹងថា ខ្ញុំពុំនៅឯកោឡើយ ខ្ញុំពុំធ្លាប់នៅឯកោ ឬនឹងនៅឯកោឡើយ ដោយសារព្រះវិញ្ញាណរបស់ព្រះអង្គសង្គ្រោះនឹងគង់នៅជាមួយខ្ញុំជាដរាប នៅពេលខ្ញុំព្យាយាមធ្វើតាមទ្រង់ ។ នោះគឺជាការលួងលោមដ៏អស្ចារ្យបំផុត ដែលខ្ញុំបានទទួលនាគ្រានោះ ។
ស្សារ៉ុន អេស អាយុ ១៩ ឆ្នាំ ទីក្រុងស៊ីឌនី ប្រទេសអូស្ត្រាលី
ពេលខ្ញុំស្តាប់ឮការអធិស្ឋានសាក្រាម៉ង់ ខ្ញុំរំឭកខ្លួនខ្ញុំថា ប្រសិនបើខ្ញុំធ្វើនូវចំណែករបស់ខ្ញុំក្នុងសេចក្តីសញ្ញាបុណ្យជ្រមុជទឹក នោះខ្ញុំអាចឲ្យព្រះវិញ្ញាណគង់នៅជាមួយខ្ញុំ ។ ពេលវេលាពេញមួយសប្តាហ៍នោះ កាន់តែងាយស្រួល នៅពេលខ្ញុំរក្សាឲ្យព្រះវិញ្ញាណគង់នៅក្បែរ ។ ឧទាហរណ៍ សិស្សជាច្រើននៅសាលារៀនខ្ញុំនិយាយពាក្យអសុរស ហើយនិយាយតាមរបៀបមួយដែលពុំសមរម្យ ។ ការចងចាំអំពីសេចក្តីសញ្ញារបស់ខ្ញុំ ជួយខ្ញុំកុំឲ្យខ្វល់នឹងអ្វីដែលខ្ញុំស្តាប់ឮ ហើយវាថែមទាំងមានឥទ្ធិពលទៅលើយុវវ័យទាំងនោះឲ្យឈប់និយាយអសុរសបែបនោះទៀត ។
ជេកុប ប៊ី អាយុ ១៤ ឆ្នាំ រដ្ឋ ខូឡូរ៉ាដូ ស.រ.អា.
នៅសាលារៀនមានក្មេងស្រីពិការម្នាក់ ។ សិស្សជាច្រើនបានយកការណ៍នោះជាការដោះសារបន្ថែមដើម្បីសើចចំអកដាក់នាង ។ មានតែមិត្តខ្ញុំ និង ខ្ញុំប៉ុណ្ណោះដែលព្យាយាមជួយនាង ។ ថ្ងៃខ្លះ វាហាក់បីដូចជាសិស្សនៅក្នុងថ្នាក់ទាំងមូលបានរួមគ្នាទាស់នឹងនាង ។ វាលំបាកណាស់ក្នុងការដឹងអំពីរបៀបដែលត្រូវប្រតិកម្មចំពោះរឿងនោះ ។ ខ្ញុំគ្រាន់តែចង់ដើរចេញ ប៉ុន្ដែខ្ញុំបានជ្រើសដើម្បីចងចាំថា នាងគឺជាបុត្ររបស់ព្រះ ហើយខ្ញុំគិតអំពីរបៀបដែលព្រះយេស៊ូវនឹងប្រព្រឹត្តដល់នាង ។ ខ្ញុំទទួលអារម្មណ៍ពីឥទ្ធិពលដ៏ស្ងប់នៃព្រះវិញ្ញាណបរិសុទ្ធ ។ ខ្ញុំចាំថា ខ្ញុំអាចធ្វើឲ្យមានការផ្លាស់ប្តូរបាន ។ ការធ្វើតាមគំរូរបស់ព្រះអង្គសង្គ្រោះបានជួយខ្ញុំយ៉ាងច្រើន ហើយខ្ញុំបានដឹងថា អ្វីៗគ្រប់យ៉ាងនឹងគ្មានបញ្ហាអ្វីឡើយ ។
នៅក្នុងសេចក្តីសញ្ញានៃពិធីបុណ្យជ្រមុជទឹករបស់ខ្ញុំ ខ្ញុំត្រូវបានសន្យាថា មានព្រះវិញ្ញាណបរិសុទ្ធគង់នៅជាមួយខ្ញុំ ប្រសិនបើខ្ញុំធ្វើដូចអ្វីដែលព្រះអង្គសង្គ្រោះបានធ្វើ ។ ខ្ញុំមានអំណរគុណចំពោះអារម្មណ៍ដែលលួងលោម និងភាពរឹងមាំមកពីព្រះវិញ្ញាណបរិសុទ្ធ ។
អាឡិចស៊ី អិល អាយុ ១៣ ឆ្នាំ រដ្ឋ ខាន់សាស ស.រ.អា.
ការដឹងថាខ្ញុំបានចុះសេចក្តីសញ្ញាដើម្បីលើកដាក់មកលើខ្លួនខ្ញុំនូវព្រះនាមនៃព្រះគ្រីស្ទ វាផ្តល់នូវការយល់ដឹងដល់ខ្ញុំអំពីកាតព្វកិច្ចដើម្បីធ្វើតាមទ្រង់ ប៉ុន្តែវាពុំងាយស្រួលរហូតនោះឡើយ ។ នាគ្រាមួយនៅក្នុងសកម្មភាពក្រុម ខ្ញុំបានឃើញក្មេងម្នាក់ដែលគ្មាននរណានិយាយជាមួយឡើយ ។ ខ្ញុំមានអារម្មណ៍ថា ខ្ញុំគួរតែទៅនិយាយរកគាត់ ។ ដំបូង ខ្ញុំពុំចង់ធ្វើឡើយ ។ ខ្ញុំពុំសូវពូកែក្នុងការរួសរាយរាប់អានមិត្តភក្តិឡើយ ។ ប៉ុន្តែដោយការចងចាំអំពីអ្វីដែលព្រះគ្រីស្ទបានធ្វើ នោះខ្ញុំបានរកឃើញភាពរឹងប៉ឹងដើម្បីរាប់អានមិត្តភក្តិថ្មី ។ នៅពេលខ្ញុំនិយាយរកគាត់ ខ្ញុំមានអារម្មណ៍ពីព្រះវិញ្ញាណបំផុសគំនិតខ្ញុំ ឲ្យសួរសំណួរគាត់ ហើយមានភាពរីករាយ ។
អ៊ីវ៉ាន អេ អាយុ ១៦ ឆ្នាំ រដ្ឋយូថាហ៍ ស.រ.អា.
អំឡុងពេលពិធីសាក្រាម៉ង់ ខ្ញុំធ្លាប់គិតអំពីកិច្ចការនានាដូចជាកិច្ចការដែលខ្ញុំត្រូវធ្វើនៅក្នុងសប្តាហ៍បន្ទាប់ កិច្ចការនៅសាលា ឬគិតអំពីមិត្តភក្តិរបស់ខ្ញុំ ។ ប៉ុន្តែក្រោយមកតាមរយៈថ្នាក់សាលាថ្ងៃអាទិត្យ និងសារលិខិតមកពីព្យាការីរបស់យើង ខ្ញុំបានចាប់ផ្តើមយល់អំពីអត្ថន័យនៃពិធីសាក្រាម៉ង់ ។ ឥឡូវនេះខ្ញុំគិតអំពីដង្វាយធួនរបស់ព្រះយេស៊ូវគ្រីស្ទ ថាទ្រង់បានថ្វាយព្រះជន្មទ្រង់សម្រាប់ពួកយើង បានបង់ថ្លៃសម្រាប់អំពើបាបរបស់យើង ហើយបានរងទុក្ខចំពោះរឿងគ្រប់យ៉ាង ។ ការណ៍នេះផ្តល់ការជំរុញទឹកចិត្តខ្ញុំរៀងរាល់ថ្ងៃឲ្យខ្ញុំនិយាយថា ខ្ញុំអាចព្យាយាមប្រែក្លាយដូចជាទ្រង់ ហើយបង្ហាញសេចក្តីស្រឡាញ់ដូចដែលទ្រង់បានបង្ហាញដល់អ្នកដទៃ ។ ខ្ញុំអាចចែកចាយដំណឹងល្អជាមួយអ្នកដទៃ ។ ខ្ញុំអាចធ្វើកិច្ចការនានាដើម្បីឲ្យបានកាន់តែសក្តិសមដើម្បីចូលទៅក្នុងព្រះវិហារបរិសុទ្ធ ហើយទទួលទានសាក្រាម៉ង់ ។
អាឡេសសាន់ត្រា ប៊ី អាយុ ១៧ ឆ្នាំ ទីក្រុងសាន់ទីអាហ្គោ ប្រទេសឈីលី
ពិធីសាក្រាម៉ង់គឺជាការលើកស្ទួយខាងវិញ្ញាណសម្រាប់មួយសប្តាហ៍ទាំងមូល ។ ពិធីនេះរំឭកខ្ញុំអំពីសេចក្តីសញ្ញាដែលខ្ញុំបានចុះជាមួយព្រះវរបិតាសួគ៌ខ្ញុំ ដែលគង់នៅស្ថានសួគ៌ ហើយពិធីនេះដឹកនាំខ្ញុំពេញមួយសប្តាហ៍ទាំងមូល ។ វាធ្វើឲ្យខ្ញុំគិតអំពីការពលិកម្មរបស់ព្រះយេស៊ូវគ្រីស្ទសម្រាប់ពួកយើង ហើយរៀបចំខ្លួនខាងវិញ្ញាណសម្រាប់សប្តាហ៍ក្រោយទៀត ។
មានគ្រាមួយខ្ញុំមានការតានតឹងក្នុងចិត្ត និងមានការលំបាកជាខ្លាំង ប៉ុន្តែនៅពេលខ្ញុំទទួលទានសាក្រាម៉ង់ ហើយអានទំនុកតម្កើងសាក្រាម៉ង់ នោះខ្ញុំពោរពេញដោយព្រះវិញ្ញាណ ។ ខ្ញុំបានភ្លេចពីភាពតានតឹងផ្លូវចិត្តរបស់ខ្ញុំ ហើយផ្តោតលើព្រះអង្គសង្គ្រោះវិញ ។
ប្រែដ ប៊ី អាយុ ១៧ ឆ្នាំ រដ្ឋខូឡូរ៉ាដូ ស.រ.អា.
សម្រាប់ខ្ញុំ ការលើកដាក់មកលើខ្លួនខ្ញុំនូវព្រះនាមព្រះយេស៊ូវគ្រីស្ទ មានន័យថាចងចាំថា ព្រះវិញ្ញាណរបស់ទ្រង់អាចគង់នៅជាមួយពួកយើងជានិច្ច ហើយថាយើងត្រូវតែជ្រើសរើសធ្វើអ្វីដែលត្រូវ ។ មានគ្រាមួយនៅក្នុងពិធីជប់លៀងថ្ងៃខួបកំណើត មិត្តភក្តិរបស់ខ្ញុំបានផឹកគ្រឿងស្រវឹង ហើយពួកគេបានឲ្យខ្ញុំផឹកគ្រឿងស្រវឹងនោះផងដែរ ។ ខ្ញុំបានបដិសេធពុំផឹកវាឡើយ ។ ក្រោយមកមានមិត្តភក្តិម្នាក់របស់ខ្ញុំដែលជាសមាជិកនៅសាសនាចក្រ បានមកហើយប្រាប់ពួកគេថា យើងពុំផឹកគ្រឿងស្រវឹងឡើយ ដោយសារវាជាច្បាប់ហាមឃាត់ក្នុងសាសនារបស់យើង ។ ការចងចាំព្រះអង្គសង្គ្រោះជានិច្ចនាំឲ្យមានព្រះវិញ្ញាណគង់នៅជិតខ្ញុំជានិច្ច ហើយរារាំងរឿងអាក្រក់ឲ្យចេញឆ្ងាយពីខ្ញុំ ។
ម៉ៃហ្គែល ស៊ី អាយុ ១៦ ឆ្នាំ ទីក្រុងប៉ារ៉ាណា ប្រទេសប្រេស៊ីល ។
ការទទួលទានសាក្រាម៉ង់ផ្តល់អារម្មណ៍ និងគំនិតសុខសាន្តដល់ខ្ញុំ ដែលនាំឲ្យខ្ញុំអាចទប់ទល់នឹងរឿងរ៉ាវដែលកើតឡើងក្នុងជីវិតខ្ញុំ ។ កាលពីខែមិថុនាឆ្នាំមុន ខ្ញុំមានគ្រាដ៏លំបាកក្នុងជីវិតខ្ញុំ ។ មិត្តភក្ដិស្និទ្ធស្នាលរបស់ខ្ញុំម្នាក់បានប្តូរទីលំនៅទៅរស់នៅឆ្ងាយ ខ្ញុំមានការលំបាកនឹងជំងឺបាក់ទឹកចិត្ត ហើយខ្ញុំមានគំនិតពុំប្រាកដប្រជាអំពីរូបកាយនេះឡើយ ។ ថ្ងៃអាទិត្យមួយ ខ្ញុំកំពុងទទួលទានសាក្រាម៉ង់ ស្រាប់តែអារម្មណ៍នៃភាពសុខសាន្តដ៏ខ្លាំងបានកើតមានក្នុងចិត្តខ្ញុំ ។ ខ្ញុំមានអារម្មណ៍ថា ពិតជារីករាយណាស់ ។
អូលីវៀ ធី អាយុ ១៤ ឆ្នាំ រដ្ឋវើរជីញ៉ា ស.រ.អា.