ជ្រុងមួយនៃសំណួរ
តើខ្ញុំដឹងថា ខ្ញុំធំល្មមនឹងចាប់ផ្តើមតមអាហារបានដោយរបៀបណា ?
នៅថ្ងៃអាទិត្យតមអាហារ យើងតែងតែមិនបរិភោគ ឬផឹកសម្រាប់អាហារពីរពេល ។ យើងក៏បង់វិភាគទានរបស់យើងសម្រាប់អាហារពីរពេលនោះ ដើម្បីជួយដល់មនុស្សដែលត្រូវការវា ។ គេហៅវាថា « ដង្វាយតមអាហារ » ។ អំឡុងពេលយើងតមអាហារ យើងអាចចងចាំអំពីពរជ័យរបស់យើង អធិស្ឋានសម្រាប់អ្នកដទៃ ហើយមានអារម្មណ៍ខិតជិតព្រះវរបិតាសួគ៌ ។ អ្នកអាចចាប់ផ្តើមតមអាហារ នៅពេលអ្នកនឹងឪពុកម្តាយអ្នកមានអារម្មណ៍ថាអ្នកត្រៀមខ្លួនរួចរាល់ ។ ប្រសិនបើអ្នកពុំអាចតមអាហារបាន ដោយសារបញ្ហាសុខភាព នោះអ្នកអាចនៅតែអធិស្ឋាន ហើយទទួលអារម្មណ៍ពីព្រះវិញ្ញាណបរិសុទ្ធ ខណៈដែលអ្នកដទៃទៀតតមអាហារ ។
ខ្ញុំបានដឹងថាខ្ញុំធំល្មមដើម្បីចាប់ផ្តើមតមអាហារ នៅពេលខ្ញុំមានអារម្មណ៍ថា ខ្ញុំចង់ធ្វើវា ហើយព្រះវិញ្ញាណបរិសុទ្ធបានប្រាប់ខ្ញុំថា ខ្ញុំធ្វើរឿងត្រឹមត្រូវ ។ នៅពេលខ្ញុំចាប់ផ្តើមតមអាហារខ្ញុំបានធ្វើវាដោយសន្សឹមៗ ។ ដំបូងខ្ញុំតមអាហារក្នុងរយៈពេលតែអាហារមួយពេលប៉ុណ្ណោះ ។ ក្រោយមកខ្ញុំសាកល្បងព្យាយាមតមសម្រាប់រយៈពេលពីរពេល ។
អាន ឌី អាយុ ៩ ឆ្នាំ រដ្ឋនីវ៉ាដា ស.រ.អា.
អ្នកអាចអធិស្ឋានទៅព្រះវរបិតាសួគ៌ដើម្បីដឹងថាពេលណាអ្នកគួរតែចាប់ផ្តើមតមអាហារ ។ ខ្ញុំដឹងថាព្រះវរបិតាសួគ៌អាចឆ្លើយតបការអធិស្ឋានរបស់អ្នក ។
លៀម ភី អាយុ ៧ ឆ្នាំ រដ្ឋ យូថាហ៍ ស.រ.អា.
វាមិនជាថ្វីទេដើម្បីតមអាហារ នៅពេលអ្នកចង់ជួយផ្តល់ពរជ័យដល់អ្នកដទៃ ហើយទទួលអារម្មណ៍ពីព្រះវិញ្ញាណនោះ ។ វាគឺជាពេលមួយដ៏ប្រពៃដើម្បីតមអាហារ បន្ទាប់ពីអ្នកជ្រមុជទឹក ។
អេឌី អូ អាយុ ៩ ឆ្នាំ រដ្ឋ កាលីហ្វូញ៉ា ស.រ.អា.
ខ្ញុំនឹងដឹងថាខ្ញុំធំល្មម ដោយសារខ្ញុំនឹងទទួលអារម្មណ៍ពីព្រះវិញ្ញាណបរិសុទ្ធប្រាប់ខ្ញុំថា វាគឺជាពេលវេលាសមស្របដើម្បីតមអាហារហើយ ។ ហើយខ្ញុំនឹងសួរម្តាយ និងឪពុកខ្ញុំថា តើអារម្មណ៍នោះត្រឹមត្រូវឬទេ ។
ប្រូក្លីន អ័រ អាយុ ៧ ឆ្នាំ អូកលែន ប្រទេស នូវែលសេឡង់ ។
នៅពេលខ្ញុំទទួលបុណ្យជ្រមុជទឹក ខ្ញុំគិតថាខ្ញុំនឹងទទួលអារម្មណ៍ថា ត្រៀមខ្លួនរួចរាល់ដើម្បីចាប់ផ្តើមតមអាហារ ។ ខ្ញុំអាចអធិស្ឋានទៅកាន់ព្រះវរបិតាសួគ៌ទូលសូមជំនួយ ហើយទូលសួរទ្រង់ឲ្យដឹងពីពេលវេលា និងរបៀបដែលខ្ញុំគួរតែចាប់ផ្តើមតមអាហារ ។
ប្រែន ខេ អាយុ ៧ ឆ្នាំ រដ្ឋ វ៉ាស៊ីងតោន ស.រ.អា.