ការបញ្ចាំងពន្លឺរបស់អ្នក
ខ្ញុំចង់ប្រាប់ប្អូនៗអំពីក្មេងស្រីពីរនាក់ដែលខ្ញុំស្គាល់ ដែលបានបង្ហាញគំរូក្នុងការចែកចាយដំណឹងល្អ ។ ពេលកូនស្រីរបស់ខ្ញុំ នៀលលីជិតគ្រប់អាយុប្រាំបីឆ្នាំ ក្រុមគ្រួសាររបស់យើងរស់នៅស្វ៊ីស ។ នៀលលីមានចិត្តរីករាយដោយបានទទួលបុណ្យជ្រមុជទឹក ។ ពីមុនថ្ងៃខួបកំណើតរបស់នាង យើងបានធ្វើរាត្រីជួបជុំក្រុមគ្រួសារជាមួយមិត្តរបស់យើងឈ្មោះធីណា ។ អ្នកផ្សព្វផ្សាយសាសនាបានបង្រៀនធីណា ។ ប៉ុន្តែនាងពុំដឹងប្រាកដថា តើនាងចង់ជ្រមុជទឹកដែរឬអត់នោះទេ ។
បន្ទាប់ពីយើងបានបង្រៀនហើយយើងបានសូមឲ្យធីណាអធិស្ឋាន ។ ធីណាពុំសូវចេះនិយាយភាសាអង់គ្លេសច្រើនទេ ដូច្នេះនាងបានអធិស្ឋានជាភាសាចិន ។ យើងពុំយល់ពាក្យដែលនាងអធិស្ឋានឡើយ ប៉ុន្តែយើងមានអារម្មណ៍ពីព្រះវិញ្ញាណបរិសុទ្ធនៅពេលពេលនាងអធិស្ឋាន ។
ក្រោយមកនៅយប់នោះ នៀលលី បានសួរប្រសិនបើនាង និងធីណាអាចជ្រមុជទឹកនៅថ្ងៃជាមួយគ្នា ។ យើងពុំដឹងថាតើធីណាមានអារម្មណ៍យ៉ាងណាអំពីយោបល់នោះឡើយ ។ ប៉ុន្តែយើងទាំងអស់គ្នាបានសម្រេចចិត្តថា នៀលលី គួរតែទូរសព្ទទៅធីណា ហើយសួរនាងអំពីរឿងនោះ ។ យើងមានការភ្ញាក់ផ្អើលណាស់ ដែលធីណាបានយល់ព្រម !
នៀលលី និងធីណាបានទទួលបុណ្យជ្រមុជទឹកនៅចុងសប្តាហ៍នោះ ។ ក្រោយមក ធីណាបានប្រាប់ពួកយើងអំពីរឿងដ៏អស្ចារ្យមួយ ។ នាងបានរំឭកពួកយើងអំពីការអធិស្ឋានរបស់នាងនៅក្នុងរាត្រីជួបជុំគ្រួសាររបស់យើង ។ នៅក្នុងការអធិស្ឋានរបស់នាង នាងបានទូលសូមឲ្យព្រះវរបិតាសួគ៌ អនុញ្ញាតឲ្យនាងដឹងថាតើនាងគួរតែជ្រមុជទឹកដែរឬទេ ។ ក្រោយមកនៅពេល នៀលលី បានទូរសព្ទទៅនាយប់នោះ ធីណាបានដឹងថាព្រះវរបិតាសួគ៌បានស្តាប់ឮការអធិស្ឋានរបស់នាង ។
មិត្តភក្ដិរបស់យើង ចាសស្មីន គឺជាគំរូល្អដល់ពួកយើងផងដែរ ។ ចាសស្មីនមានអាយុ ១២ ឆ្នាំ ។ គ្រួសាររបស់នាងបានក្លាយជាកល្យាណមិត្តរបស់យើង នៅពេលយើងនៅក្នុងប្រទេសអាស៊ីបូព៌ា ។ នៅក្នុងប្រទេសរបស់នាង សមាជិកសាសនាចក្រពុំអាចនិយាយអំពីដំណឹងល្អជាមួយអ្នកដទៃឡើយ ។ ការធ្វើបែបនោះគឺប្រឆាំងនឹងច្បាប់ ។ ប៉ុន្តែចាសស្មីនបានសម្រេចចិត្តថា នាងអាចចែកចាយដំណឹងល្អដោយការធ្វើតាមអ្វីដែលព្រះយេស៊ូវបានធ្វើ ។ នាងបានបង្ហាញសេចក្តីស្រឡាញ់ និងចិត្តសប្បុរសដល់អ្នកដទៃ ។ គ្រប់កន្លែងដែលនាងទៅ ឬគ្រប់អ្វីទាំងអស់ដែលនាងធ្វើ នាងបានព្យាយាមប្រែក្លាយដូចជាព្រះយេស៊ូវ ។ នាងគឺជាគំរូដ៏ល្អបំផុតសម្រាប់អ្នកដទៃ ។
នៀលលី និងចាសស្មីន បង្ហាញពួកយើងអំពីរបៀបដែលពួកយើងអាចធ្វើជាគំរូអំពីព្រះយេស៊ូវគ្រីស្ទ ។ យើងអាចធ្វើកិច្ចការនេះបានមិនថាយើងមានអាយុប៉ុន្មាន ឬយើងរស់នៅទីណានោះឡើយ ។