A Nooria
Aomata aikai a noora raoi te Tia Kamaiu ae e a tia n uti, ma ngkoe naba ko kona n riki bwa te tia kakoaua ibukin Kristo n oin am kawai.
E a Uti,iroun Greg K. Olsen, e tabu katotongana
N am iango e na aekakira te kakoaua ibukin te Tia Kamaiu ae e a tia n uti? Ibukiia tebubua aomata n ana tai Iesu, a aki riai n iangoia—ma a maiuakinna. Booki aika tabu a karakina tebwi ma uoua bwaai ni kakairi n te Nu Tetemanti ao tabeua riki n ana Boki Moomon ngke te Uea are e a tia n uti e kaoti nakoia aomata. Aomata aikai a kakoaua teuana te kakai ae moan te korakora inanon te rongorongo: Iesu Kristo e tokanikai iaon te mate ao n anganiira te konaa ibukira n tatabemaniira nako bwa ti na manga maiu riki. E kamiimi anne, e koaua?
Ngaia are tera ae nanonaki n riki bwa te tia kakoaua ibukin Kristo? Ti na tuoi tabeua mai buakon taai ni booki aika tabu ao n iangoia ti na kanga, e ngae n ae ti aki Nooria n rabwatana, ti kona n riki naba bwa a na tia kakoaua Iesu.
Maria te I Maketara.
Maria te I Maketara bon te moan tia kakoaua. Ni moaningabongin te Tabati imwin Taurakina, e roko n te ruanimate ma tabeman aine ni kabira rabwatan te Uea. Ngke e kunea Maria bwa akea kanoan te ruanimate, e tang. Temanna ae kawaria mai ibukina ao n titiraki, “Neiko, ko aera ngkai ko tang?” Iangoa miimina ngke e kunea bwa bon Iesu, ae e a uti man te mate. (Taraa Ioane 20:1–18.)
Uoman Reirei iaon te Kawai nako Emmauti
Te Kawai nako Emmauti, iroun Jon McNaughton
Kireoba ao temanna te reirei a nakonako iaon te kawai nako Emmauti ngke a kamaroroaki iroun te iruwa. A aki kinaa toaia ae boou, ma n tain aia katairiki ni kabane, e tatabeuta te kariki te iruwa. Ngkanne a kaureaki mataia, ao a kinaa bwa a tia ni mwamwananga ma te Tia Kamaiu ni moan aia tai. “Tiaki a bane nanora i nanora … ?” a titirakiniia i bon irouia, n iangoa te kariaia are a namakinna bwa ni koauana E a tia ni mena irarikiia. (Taraa Ruka 24:13–34.)
Abotoro ake Tengaun
Noori Baiu ma Waeu, by Harry Anderson
Uoman Abotoro ake a mwananga nako Emmauti ma Kristo a oki nako Ierutarem ao n tuangiia tengaun mai ibuakoia Abotoro n te bwai are a rinanona. Ngke a tabe n taetae, e kaoti te Tia Kamaiu nakoia, e taku, “Kam na tarai baiu ma waeu, bwa boni Ngai: kam na ringai, ao taraai; bwa akea irikon te tamnei ao riina, n aiaron aika kam noori irou.” (Taraa Ruka 24:36–41, 44–49.)
Te Abotoro Tooma
tamnein Tooma iroun Brian Call
Te Abotoro ae Toooma e aki kaoti ngke e moan kaoti te Tia Kamaiu nakoia Abotoro ake tabeman, ngaia are e aki kakoaua ae e a tia n uti Kristo. Teuana te wiiki imwiina, e a manga kaoti riki Kristo nakoia Abotoro. N te tai aei Tooma e mena ikekei, ao ibukina bwa e noora Kristo, e kakoaua bwa E a tia n uti. Te Tia Kamaiu e kauringa Tooma ni kaitara kakoaukin mwiin are ko na tii nooria: “Ko onimaki, ngkai ko norai: a a kabaia akana onomaki ngkana tuai n norai.” (Taraa Ioane 20:24–29.)
Abotoro ake Tengaun ma Temanna n Naman Tiberia
Te Kristo ae e a tia n Uti n naman Tiberia, iroun David Lindsley
N te bong teuana imwiin te Mangauti, tabeman Abotoro a nako n akawa n Naman Tiberia ma a aki bati n tekeraoi. N te ingabong are imwiina, e kaoti te Tia Kamaiu ao n reireiniia ni kabwaka aia karaun n iteran te booti are te atai. Ngke a karaoia, e tiraua konan aia karaun are a aikoa kona ni katikia! Imwiin aia baka n amwarake ni kabane, te Tia Kamaiu e reireia taekan kakawakin te ibuobuoki nakoia aomata, ni kangai, “Kakamwarakeia au tiibu.” Abotoro a na bae ni kabanei maiuia n tii karaoakin anne—n reireiniia aomata taekan Kristo—ao n tabeua keiti, a anga maiuia ibukin te mwakuri. (Taraa Ioane 21:1–22.)
Nibwaite i Amerika
Temanna te Tia Kawakin Tiibu,iroun Howard Lyon
N tain Taurakina, aban Amerika a bon urebekeaki man te maeiei, te ai, tabeua kabuanibwai aika karina, ao tenibong te bong n rootongitong ni kanikinaea maten te Tia Kamaiu. Imwiiina, e ruo mai karawa Kristo ao ni kawariia te uanao n aomata ae 2,500 ni bootaki irarikin te tembora i Bountiful. E kaoiia aomata bwa a na riing mwiin ikoakin baina ao waena ao rarikina, e kabwarabwara, ao ni kakabwaiaiia natiia Nibwaite temanna imwiin temanna. A mwaiti riki aomata n ikotaki n te bong are imwiina, ao e kawariia te Tia Kamaiu ao n reireiniia. N tokina reirei a katea ana Ekaretia Kristo, ao Nibwaite a karekea te kakoaua ae mwaakaroiroi bwa ngaiia ao Reimwanaite a na rairaki naba nakon te Uea. (Taraa 3 Nibwaai 11–18; taraa naba 3 Nibwaai 8–10; 4 Nibwaai 1.)
Te bwabetito Ngkekei ao Ngkai
E kaoti naba Kristo nakoia aika a mwaiti, n raonaki ma tabeman aine ake a roko nakon te ruanimate ni buoka Maria ni kabira rabwatan Kristo, te kurubu n te mwaiti ae riaon 500 mwaane, Iakobo, ao Bauro. (Taraa Mataio 28:9; Makuri 9:4–19; 1 I-Korinto 15:6–7; taraa naba 3 Nibwaai 19; 26:13.)
E na bae n aki reke ara tai n noora te Tia Kamaiu n aron are a nooria taan kakoaua aikai, ma ko kona n teimatoa n riki bwa te tia kakoaua ibukin Kristo. Ko kona n ukoukora te Tia Kamaiu n onoti, n aron are e karaoia Maria ngke e nako n te ruanimate, n reiakina riki rongorongona. Ke ko na kamwakura am onimaki Irouna man kawakinan tuua ao n iriiri aia reirei burabeti. Ke ko kona ni kinai ana kakabwaia te Tia Kamaiu inanon maium, n aron are a karaoia reirei ake uoman ake a nakonako nako Emmauti. N tain te Itita, iangoia bwa tera ae nanonaki n riki bwa te tia kakoaua ibukin Kristo. Aomata aikai bon taan kakoaua ake a bon noora te Kristo ae e a tia n uti—ma anne tiaki tii te kawai ae ko kona ni kakoaua inanon maium.