Andrei ao te Taeka Ae Buakaka
E maeka te tia korokaraki i Utah, USA.
“N na kataia n rairananou, (N na kataia) ni karaoa ae raoiroi riki, (N na kataia) n tataro” (Children’s Songbook, 98).
“Ko taku bwa ko raoiroi riki nakoia aomata ni kabane bukina bwa ko aki tuea,” e taku Nikolai n tain te motirawa ae uarereke.
“Anne e aki koaua,” e taku Andrei.
“Ngkanne bukin tera ko aki konaa n atonga teuana te taetae buaka? Ti Teuana? Taekinakin te taetae buaka e aki konaa n tiringko. Ni kabane aomata a taetae buaka.”
Andrei e kakui tabon angana. “I bon aki tangiria ni karaoia.”
Andrei e ataia bwa te taetae buaka e bure ao e kanakoa te Tamnei ae Raoiroi. Andrei e tangira raonakina iroun te Tamnei ae Raoiroi. Mangaia are e aki taetae buaka.
Andrei e boou n te reirei, ao ngkai moa, Nikolai ti ngaia n te kiraati onoua ae e tangiria ni kan riki bwa raraona. Ma Nikolai e reitinako ni kairoroa nakon te taetae buaka ni katoa bong. Ao ni katoa bong Andrei e a kua n taekina ae aki. Irarikina, Andrei e maaku bwa Nikolai e na katoka raraonakina, ao ngkanne e na tiku n ti ngaia.
“Ti atonga teuana te taetae buaka,” e taku Nikolai imwin te reirei. “Ngkanne N na katikuko n ti ngkoe.”
Tokina Andrei e a rangin ni kua ni kumeaki bwa e na atonga teuana te taetae buaka—teuana are bon akea naba buakakana.
Nikolai e kaenga n atuuna. “E tamaroa, ngkoe ngkai temanna raoraora.”
Imwin anne, raoraon Nikolai tabeman a taetae nakon Andrei naba. A amwarake ma ngaia ao a butiboro ma ngaia n tain te motirawa ae uarereke. Ma raraonakin ana kurubu Nikolai bon kanga ti tebo ma e kakamaaku. Mwaitin ana tai Andrei n memena irarikiia, ao e na mwaiti ana tai n taetae ao ni mwakuri n ai aroia. Ao a bane n taetae buaka. N ae mwaiti A ngare ibon irouiia ao kamatauningaia imarenaia. A taekini bwaai aika aki raoiroi ibukin aia tia reirei. A un ao ni karaoi katei aika buakaka. Andrei e moanna n namakinna ma te karaurau te un n tainako ao e kunei riki bukin te taetae buaka.
Teuana te tairiki ngke Tinau ao Tamau a otinako, Andrei ao mwanena ae ikawai riki Katya a kauntaekaa te tamnei ae a na kaotia. Imwain ae e na iangoia Andrei, e taekina te taetae buaka.
E kubanako Katya. “N na tuanga Tinara.”
Andrei e biri nakon ana ruu ni matu ao karebetaua te mataroa. Tera ae riki iroumi ni kabane? Bukin tera a karaoia bwa e na un n taai nako? Ngke a okira mwengaia ana karo, Andrei e kauka ana mataroa teutana ao e ongo ana taeka Katya e taku, “Tinau, Andrei e taetae buaka nakoiu.”
“Tera?” Tinau e bwanaa ni miimi. “Andrei e aki kona n taetae buaka.”
Andrei e kaina te mataaroa ao e bwaka nakon ana kainiwene. E iangoia bwa e kanga ni bitaki man te tai are e moana iai te taetae buaka. E a nangi maan te tai imwiin are e a tia n namakina iai te Tamnei ae Raoiroi.
Andrei e katorobubua irarikin ana kainiwene ao n tataro. “Tamau are i Karawa ae tangiraki, I kabwara au bure I a tia ni buakaka ao un. I a kabwara au bure I a moana au taetae buaka. N na karaoa ae raoiroi.”
Ngke e tataro Andrei, e kaonaki nanona n te namakin n tangira. Man te moan tai are e moana iai te taetae buaka, e rangi n namakina te kukurei. E ataia bwa e tangiria te Atua, ao e kona n namakina te Tamnei ae Raoiiroi. E namakina kabwaraan ana bure ao e ataia bwa e kona ni bitaki ao n tamaroa riki.
Imwiin ana tataro, e tuanga Tinana te koaua ao e kabwara ana bure nakon Katya. Andrei e namakina te tamaroa imwin anne. Ko namakina ae tamaroa ngkana ko raira nanom.
Te bong are imwian n te reirei, Andrei e aki katawanou ma ana kurubu Nikolai. Irarikin anne e tekateka irarikiia ataei ae e aki kinaia. E na kona ni maan, ma Andrei e ataia ae e na kuneia raoraona aika raraoi ao a kukurei ao aki taetae buaka. Kaanga n ai arona.