Bwanaaia Aika Itiaki ni Boong aika Kaitira
E a tia!
Kamataata n te tamnei iroun Allen Garns
N tain au intawiu ngke I bitiobi ni bwakantaain te Taabati teuana, I kukurei n tekateka ma raraou ni maroroakini tabeua kaangaanga are e kaitarai. Imwiin ongoraau n ana kaangaanga tabeua te miniti, I namakinna bwa e riai n teimatoa n reitanako warekan koroboki aika a tabu. I kauringaki naba bwa, ngkai ngai ana bitiobi, ngai naba I riai n teimatoa riki ni kamatebwai ni koroboki aika a tabu, are bon te bwai ae kataia ni kakaraoia. Ngaia are I taku bwa ti na bon “bukintaeka imarenara” n ara kekeiaki ni kateimatoa riki te kamatebwai.
Ni katoabong ngkana e bane ara wareware ni koroboki aika tabu, ti na tekiti imarenara n te taeka ae E a tia! N ataia bwa iai temanna ae tataninga ni kan ongo ngkana e a tia are temanna ni kabwanina ana wareware ibukin te bong anne bon te kaunganano imarenara ni kauoman. Ngkana temanna iroura e mwaninga, karekean te tekiti bon te kauring. Ngkana are temanna e aki tekiti, e bon aki uringnga ni karaoia. Ti karaoa te kakaewenako aei n aki karika temanna bwa e na namakina te bure.
Ti waakina aio onoua te namwakaina n nako, ao I aki uringa te bong are ti aki iai wareware ni koroboki aika a tabu. Te ataeinimwaane aei e teirake n tain te bootaki n aki mamatam ao ni kaotikoaua uoua te namwakaina n nako n tibwaua ana koaua n tamaroan warekan koroboki aika a tabu ni katoabong are e riki nakoina ao ana utu.
I kakatonga iroun te tari aei ao ana iraorao, n raonaki ma ana tekiti ni katoabong. I a tia n noora aron kabonganaan rabakau aika a boou, ngkana e kabonganaaki raoi, ni kona ni katamaroai maiura. I kakaitau naba ibukin koroboki aika a tabu ao aron ana kakoaua ibukin Kristo. I ataia bwa ana karea ni kamaiu te Tia Kamaiu e karekea nakoira n tatabemaniira bwa ti na kona ni manga oki ni maiu ma Ngaia n te bong teuana.