E Ota Star
E maeka te tia korokaraki i Colorado, USA.
“E tamaroa te mena irarikimi kain te Buraimwarii” (Children’s Songbook, 254).
Star e kaeta kunnikaina. E teimatoa ni mweengabuaka ni kabongana te kunnikai nakon te taromauri. N ana aro are mai imwaina aine a kabongana te kawaerake mwarairai ke ae e kororo n nakon te Taromauri. Ma ai tiaki n ana ekaretia ae boou. Ngaia ma tinana a tibwa bwabetitoaki inanon ana Ekaretia Iesu Kristo Ibukiia aika a Itiaki ni Boong Aika Kaitira.
Star e katinakoa te ang ngke e tiroia n te kiraati. E ingainga nanona n nako n taromauri n te moan tai bwa kain te aro ae tauaki mwiina, ma e nakonnano naba. Mai imwaina, e tiku irarikin tinana ni karokoa e bwara te taromauri. Ma n te tai aei e nang nakon te Buraimwarii.
Star e bobotika n noora tamneina Ma ngkana e aki mweengaraoi ibuakoia ataei? Ao ngkana a ribaia ataei ake tabeman?
“Star? Ko tauraoi?” E wewete tinana.
Star e ruorikaaki n te kaintantamwarake. “E raoiroi taraau?” e titiraki.
E wiingare tinana. “Ko tara ni botonnaine.”
Star e karaoa ubuna. “Bon anne ae kona taekinna. Bon ngkoe tinau.”
“Eti anne. I bon riai n taekina anne. Ibukina bwa e bon koaua.”
Star e moangare. Tinana n tainako iai ana nga ni kakukureia natina. Ma bon iai naba te nakonnano irouna. Ma ngkana arona bwa akea ataei aika a tangiria ni kan taetae nakoina? Iai raraona n ana reirei, ma tiaki kain ana aro ae kainna ngkai. E tangiria ni kan reke raraona temanna bwa e na airi ma ngaia n nakon te taromauri.
“I a uringa te bwai ae N na riai ni karaoia,” e tuanga tinana.
E biri n oki nako eta ao e katorobubua irarikin ana kainiwene. “Tamara are i Karawa, taiaoka buokai ni karekeia raraou. I kakoaua bwa te bwai are a reireinai mitinare a bon koaua, ma I a maaku.”
Star e tiku ni katorobubua ao ni kakauongo. Imwiin tabeua te tai ao e namakina te raunnano, ao e aki manga nako nanona.
N te taromauri Star ao Tinana a tekateka irarikiia kain te utu ae teniman aia ataeinnaine aika a uarereke. Kaaro aikai a kaotii araia nakon Tinana ao a maroro imwain waakin te taromauri. Star e buokiia ataeinnaine ni karana tamnein Iesu.
Bitiobi Andrews e karekea kawaina ni kainetiia. “Titita Cunningham! Star! E kakukurei noorakimi n te bong aei.” E moangare ni butimwaai nakoia ao e taubai ma ngaiia. Star e a mwaninga aroia ae tamaroa kaain te aro. Tao e na bon kona n reke raraona.
Imwiin te bootaki n toa Star e a kaea te Buraimwarii. E taraia ataei ake tabeman ma te nakon nnano ngke e tekateka. A maroroo imarenaia n tatabeman ao taraan ae a aki nooria. Star e bwara nanona. Tao e na manga bon tiku n tii ngaia.
Imwiina te ataeinnaine ae bon roron Star e rinnako n te ruu. “E tara naba n nako nanona,” e iango Star. “I kona n taetae nakoina.”
Star e karina te ang, ao e nakon te ataeinnaine arei. “Mauri, arau bon Star. I boou n te tabo aei. Ko kukurei n tekateka irarikiu?” Star e taua ikeikena. E na kukurei te ataeinnaine arei n riki bwa raoraona?
E bitaki moan te ataeinnaine nakon te moangare. “I kukurei. Ngai naba I boou ikai. Au utu a tibwa mwaing n nakomai mai Ontario.”
“Ngai ma tinau ti bwabetitoaki uoua te wiiki n nako,” e taku Star. “I aki ataia bwa tera ae N na karaoia.”
E a bubura riki moangaren Sarah. “Ti a bon kaai n nooria ngaira uoman.”
Star ao Sarah a uaia n tekateka n aia kiraati. N tabetai Star e itaramata ma Sarah ao a wiingare. Sarah e moangare nakoina. Star e rau nanona ao e kukurei. E ataia bwa Tamana are i Karawa e a tia ni kaeka ana tataro ao e buokia ni karekea raraona.
N te kiraati te tia reirei e tuanga Star ao Sarah bwa a na kaoti araia.
E teirake Star. “Arau bon Star Cunningham. Ngai ma tinau ti a tibwa bwabetitoaki uoua te wiiki n nako.” E toki teutana, ao e oti te moangare ni moana ao e taraa raraona ae boou. “Ao aio raraou ae arana Sarah.”