Katauraoi ibukin te Tembora ni Katoa Bong
Ngke ruaiwa au ririki, iai au tia reirei n te Moanrinan ae arana Titita Kohler. I rangin ni mamaama, ao e rangin n ataa te katei ngaia ae i tangiria n airiiri ma ngaia. N te bong teuana e anganiira te mwakoro ni beeba. Ti bane ni korea te bwai ae ti tangiria ni karaoia ngkana ti a kara riki. I korea: “Naako nakon te kaoreti ao mare n te tembora.” I kanim au beeba iaon mataroan au kabwate. N te tairiki, te ota man tauran te kawai e ota nako nanon au winto. I tarai mwakorokoron au beeba. E kauringai bwa N na nakon te tembora.
N taai akekei, ti 12 tembora n te aonaaba. I tangiria ni kawari tembora ni kabane.
N te tai are a iangoa aia motirawa tinau ma tamau, aki toki ni kairiia ara utu nakon te tembora. Ti maeka i Oregon, USA. Te kabanea ni kaan n tembora bon 600 te maire (965 km) i Cardston, Alberta, Canada. Akea ana bwai ni kamwaitoro ara kaa. Tariu ao mwaneu a tekateka i bukin te kaa. Ti na katinei ara kunnikai aika mwaimwai itinanikun wintoon te kaa. Imwiina ti katikua iaon roroara ni kamwaitoroira iai.
Bon te bwai ae kamiimi ngke ti noora te tembora. I aki rangin n ataia bwa tera ae karaoaki ikekei, ma aki toki ni kukurei au karo ngkana a otinako. I ataia bwa e rangin ni kakawaki te tembora. I ataia bwa bon ana auti te Uea. (Inanon te tamnei, ngai anne kunnikaina n te karinano mainaina.)
Imwiin koron 12 au ririki, I nako ni karaoi bwabetito n te tembora inanon tabeua tembora. Ngke I kaitibo ma kainabau n te tai ae na roko, I kunea bwa e tangira naba te tembora! Ti mareaki n te Manti Utah Tembora.
Ko kona ni katauraoi ibukin te tembora ni katoa bong. Naako nakon te tembora ngkana ko kona. Riing oona. Ngkai tibuu te teinimwaane Jarret bon te 11 ana ririki. E mwakuri n rongorongon te utu ni katoa Tabati ma tamana. E a tia ni kuneia ae raka iaon 200 araia aia bakatibu. Ngke e koro 12 ana ririki, e kona n ibuobuoki ni karaoi bwabetito n te tembora ibukiia bakatibu aikai!
Ngkana kam mena inanon te tembora, ko kona n nakonako n te tabo are e nakonako iai Iesu. Bon Ana auti. Au kantaninga bwa ko tataro ni katoabong bwa e na buokiko te Tama are i Karawa ni katauraoiko n rin inanon te tembora ao n namakina Ana tangira.