Booki Aika Mwanuokinaki Taekaia, Kakoaua aika Uringaki
E maeka te tia korokaraki i Cagayan, Philippines.
A bane n taraai aomata ni kabane. I kona ni kamanoa te Ekaretia ma ti au koaua ae bebete?
Teuana te ririki ao iai au kouru bwa N na katamaroa au reirei n te tamnei. N na uoti bokin te Ekaretia, booki aika uarereke, booki ni kairi, ao booki aika tabu n taabo ni kabane, n raonaki ma te nako n te reirei, bukina bwa e korakora nanou ni kani karekei ana taeka te Atua. Ma e karako au kekeiaki ngke I rangin n tabe ni kamatebwai imwain rokon te ukeuke ae uarereke.
N te bong teuana ara tia reirei e kaira te marooro are e a kateirakeia iai ataei aika tiaki-Katorika n te ruu bwa ana teirake. Ti ngai n te kiraati ae kaain Aika Itiaki ni Boong Aika Kaitira. Onoman ataein te reirei tabeman aika teirake naba.
Ngkanne ti titirakinaki: Tera ami ekaretia ae kam nako mai iai? Antai ae kunea (ami ekaretia)? E kanga ni kateaki ami aro?
Ngai te kabanea ni kaeka. E nako nanou ngke I ataia ae I aki uoti au boki n te Ekaretia, ma I katai n uring bwaai aika I a tia n reiakin. E roko uringakin te kibu man te Baibara:
“Ko na onimakina te Uea n nanom ni kabanea; ao tai mwiokoa oin am ataibwai.
“Ko na ataia n nakonakom ni kabane, ao E na kaeti kawaim” (Taekan Rabakau 3:5–6).
I tei i matan te kiraati ma te onimaki ao ni mwaninga maakuu. I taekinna bwa ngai kaain Ana Ekaretia Iesu Kristo ibukia Aika Itiaki ni Boong Aika Kaitira. I tibwaua karakinan te ataeinimwaane, Iotebwa Timiti, ae noora te Atua. I namakina namakinan te tangira ae korakora inanou, ao rannimata a waanako mai matau. I tibwauaia bwa e a tia te Ekaretia ni baireaki n Eberi 6, 1830, ao I kakoaua ae e a tia ni weteaki ana burabeti te Atua ao te nakoanibonga e a tia ni kaokaki. I kakoaua bwa a kakoauai bwaai aikai ni kabane.
Te tai ae maan ni kamatebwaiakan te euangkerio e a tia ni uaana. E a tia ni buokai ni kamanoa au onimaki ao n tibwaua te euangkerio. I kakatonga, tabeua wiiki imwiina, ngke aman raoraou n au reirei a irai nakon te taromauri.
E buokai n reireinai te atatai anne kakawakin te koaua. Te moan tai I mimi bwa bukin tera e aki kauringai te Uea bwa n na uoti au boki n te bong anne. A tia ni buokai ni kaekai raoi titiraki ake a tia n tabekaki. Ma ngkanne I kunea bwa ti na aki kainnanoia ni kamatenanoi bwaai ni kabane ibukin te Ekaretia ke n onimakin kiibu—ti riai ni kamatebwai, maiuakinna, ao n tibwaua te euangkerio, oimankina te Tamnei ae Raoiroi. N na kona n aki karekei au boki, ma iai au koaua.