Bwanaaia Aika Itiaki ni Boong aika Kaitira
Kamaiuaki inanon te Ruu
Kamataata n te korotamnei iroun Allen Garns
E aki toki ni mwakuri kainnabau n taian Tabati, ao e katukai ma aman natiu mwaane nakon te taromauri. Teuana te Tabati ae onoti n te bootaki n toa, natiu ake uoman a un. Ngkana temanna iai nanona n te boki, tarina e na tangiria naba. I kataa te tinaeki, taore, ao te kara, ma aki mwakuri. I rangin n un irouia au ataeinimwaane aika uoman aikai, ae aki kona n tekateka n aki karongoa inanon teuana te aoa.
I kaotinakoa te taore ae uarereke man au baeki ao n angan are teuana ana ririki. N te tai ae waekoa e roko te takarua mairoun are teniua ana ririki, Tyson, ngke e orea tarina are uarereke riki, ni kataia n anaa te taore. I rangi ni maama ngke I uoutia uoman ataei aika takarua, n tang nako tinanikun te ruu.
E waekoa n on moau ma rannimata aika korakora. Bukin tera e na rangin ni kaangaanga te bwai aei? I karaoa te bwai ae tangiria Tamau are i Karawa bwa n na karaoia ni uotiia au utu nakon te taromauri, ngaia anne? Ma I aki kona ni manga karaoia. E kakua ao e kamarakinano bwa ana un au ataeinimwaane inanon te bootaki n toa ni katoa wiiki. I aki tangiria ni kan oki.
I tekateka ma iango aikai ti ibukin 15 te teekan, ao imwiina te aine ae I aki kinaa e otinako man te ruu n rimwiiai. Arana bon Titita Beus. E aki toki n tekateka n ti ngaia, ngkai kainabana kaain te bitiobiriki ao natina a ikawai. E taku, “Ko aki toki n roroko n ti ngkoe! I kona n noria bwa ko kekeiaki ni karaoia. E kona Tyson n tekateka ma ngai?” I aki kona n iangoa kaekaana! I ti katoutoua atuu ngke e anaia ni baina ao ni kairia, ngkai e rau ao e kukurei, n oki nakon te umwantabu.
I kaoi ranni matau, I ana natiu, ao n nakonako n oki nakon te umwantabu ma te kukurei ni karokoa banen te bootaki.
Te Tabati are imwiina ngke ti nakonako nakon te bootaki n toa, Tyson e kakaea raoraona ae boou. Ni katoa tairiki ao e na tataro, “Ko rabwa, Tamau are i Karawa, ibukin Titita Beus. I rangin n tangiria!”
E a raka iaon teniua te ririki, ao Tyson e teimatoa ni kakaea Titita Beus inanon te umwantabu. N te ririki ae nako ao e weteaki bwa ana tia reirei n te Moanrinan Tyson. E bon rangin ni kukurei.
I rangin ni kakaitau ibukin Titita Beus ao nanona n tangira ao ni buokiia tabeman. I ataia bwa ti kona ni kakabwaiai maiuia tabeman ngkana ti beku n te kawai are karaoia te Tia Kamaiu.