Iango Ibukin Bootakin te Utu n te Tairiki
Te Rongorongo aei iai inanona taeka ao waaki ni kakukurei ake a kona ni kabonganaaki ibukin bootakin te utu n te tairiki. Aikai uoua katooto.
“A Nooria,” iteraniba 58: Tera ae nanonaki n riki bwa ana tia kakoaua Kristo? Imwiin warekan taeka inanon te utu, ko kona ni maroroakin kawai aika ko kona n riki iai bwa ana tia kakoaua Kristo n riki ngkana ko tuai n Nooria. Ko na bae n iangoi iango bwa ko na kanga n riki ni kaan riki ma te Tia Kamaiu n aron karekean taai ni beku ibukiia taan birinako n am kaomiunitii, reiakina maiun te Tia Kamaiu n tain te kamatebwai ni booki aika tabu, tararuaia ataei ibukiia taanga bwa aonga n reke aia tai n nakon te tembora, ke ni buokiia raoraom ni koaua. Ko kona naba ni mataku n te witeo ae kona ni kuneaki n te mormon.org/easter ao n iangoa kakawakin Kristo ao Mangautina ni maiura.
“Katauraoi ibukin te Tembora ni Katoa Bong,” iteraniba 69: Titita Joy D. Jones e kauringiira n aron kakawakin karaoakin te tembora bwa e na moanibwai ni maiura, ao karaoan rongorongon am utu bwa e na buokiira ni katauraoira n rin. Ko na iangoa karekean “rongorongon am utu ke n te tembora” ibukin te bootaki n utu n te tairiki. Ko kona n reiakinna bwa ko na kanga ni karin aara ao n ukoukori ibukin aia rekooti utu ke ni maroroakin otenanti n te tembora aika kakawaki ao n tarai tamnein tembora ni kabuta te aonaaba. Ngkana ko maeka irarikin te tembora, ko kona n nako rarikin te tembora ao ni maroroakinna bwa a kanga tembora ni uotira ni kaniira riki ma Tamara are i Karawa ao ni buokiira n namakina Ana tangira.