Avea e Pei o Amona

O lenei tagata lauiloa mai le Tusi a Mamona e mafai ona aoaoina i tatou i le tele o mea e uiga i le galuega faafaifeautalai ma le faatoagaina mai i le taimi nei.

Men with sheep and goats.

Ata na tusia e Dan Burr

O Amona o se tagata toa i le Tusi a Mamona, lauiloa mo lana auaunaga lototoa lea na aofia ai le puipuia o lafu a Lamonae, o se tupu o sa Lamana (tagai Alema 17:25–39; 18:1–10).O le tala ia Amona, e pei o le tele o isi tala faatusipaia i le Tusi a Mamona, e mafai ona aoaoina ai i tatou i le tele o mea e uiga i le auala e uumau ai avanoa ma faatoilalo ai luitau tatou te feagai i lenei vaitaimi.

O Se Misiona Anoa

Na aoaoina e Suzanne E. Tarasevich o Millville, New Jersey, ISA, nisi o lesona mai ia Amona a o auauna atu faafaifeautalai faamisiona ma lona toalua, o Atofu.

“Ina ua taunuu mai i le matou pusameli le teutusi paepae lapoa, o loo i ai la maua valaauga o le misiona,” fai mai ai o ia, “na matua ma fiafia lava ma lou toalua. Na ma anapopogi ma tatalo e uiga i la maua valaauga. E le faapea ona sa ma popole e uiga i le nofoaga o le tofiga, ae na ma matuai mananao lava i se faamaoniga o le a ma maua ia tomai e faataunuu ai ma le anoa lo maua valaauga.

“Mulimuli ane i lena afiafi, faatasi ai ma fanau ma a latou fanau na potopoto mai, na matou tatalaina le teutusi ma faitauina la maua valaauga i le Misiona a Polani Warsaw. A o matou faia lena mea, na ma lagonaina le toafilemu i o ma’ua loto o lenei mea, e moni, o se tofiga ua faatatau lava ia i maua. Sa ma matuai fiafia lava.”

Ae peitai, i le taunuu atu ai i le misiona, sa tauivi Sister Tarasevich ina ia malamalama tonu lava po o le a le mea e mafai ona ia saofaga atu ai. “O lo’u toalua na vave lava ona tuuina i ai ni tiute lea na tuuina atu ai ia te ia ni avanoa luitauina, faaletaitai e fesoasoani ai i lona tuputupu ae,” o lana tala lea. “E ui ina leai se tasi o i maua na mafai ona tautala faaPolani, ae o lana auaunaga na foliga mai na sopo atu i le papupuni o gagana.” I le isi itu, na ia fai mai, “Sa masani ona ou tauivi ma lagona o le leai o se aoga ma le faaesea. Na ou masalomia le anoa o a’u taumafaiga faafaifeautalai.”

Faifeautalai Malolosi

Na iloa e Sister Tarasevich lona mafaufau e uiga i faifeautalai maoae i le Tusi a Mamona. “I le tele o tausaga a o avea au ma se faiaoga Peraimeri, e tele ina ou faaaogaina le mana musuia ma le malosi o tala e uiga ia Alema ma atalii o Mosaea e aoao ai fanau e uiga i le galuega faafaifeautalai. Soo se taimi lava ou te mafaufau ai i faifeautalai, o le ata o se Amona malosi ma le mamana e oso a’e i lo’u mafaufau, ma e mafai ona ou vaai atu faalemafaufau i faifeautalai talavou malolosi o la matou misiona o ni atalii faaonaponei a Mosaea. Ae sa ou mafaufau pe sa faaalia ai le le lava o le lotomaualalo o se tinamatua lauulu sinasina ina ia oo atu i lea ituaiga matafaioi.”

A o mafaufau o ia, na ia fai mai ai, na amata ona fesiligia lemu o ia e se leo mai totonu.

“O le a le tofiga muamua a Amona?”

“Ia avea o se auauna, e vaaia le lafu, ma faapotopoto mai mamoe na faataapeapeina,” o lana tali lea.

“Ia, avea loa ma se Amona.”

Saunia e Auauna Atu

O nei mafaufauga na tuuina atu ai ia Sister Tarasevich se malamalamaaga. “Na faafuasei lava ona ou malamalama tonu i le natura o lo’u tofiga e tatau ona i ai,” o lana tala lea. “Sa ou iloaina e ui e le’i mafai ona ou mauaina ia tomai o le gagana e manaomia e talai ai, ae o aafiaga i le Aualofa i le tele o tausaga sa saunia ai au e auauna atu i isi—ina ia saili, maua, ma alofa ia i latou o e o lagonaina le faagaloina ma le le faaaofiaina.”

Na amata ona ia vaai atu i ana galuega faafaifeautalai e ala atu i se vaaiga fou. “Na amata ona ou malamalama i le tele o auala e mafai ona foia ai e mataupu faavae e faatotonugalemu ia Keriso ia tulaga o le le atoatoa o le gagana,” na ia fai mai ai. “Na amata ona ou iloa mea e mafai ona ou faia e tausia ai le lafu ma faapotopoto mai ai ia mamoe ua faataapeapeina.”

Ina ua mavae lena mea, na ia fai mai ai, “o le olaga i le avea ai ma se faifeau faamisiona matua na avea ma se vaitaimi matagofie o le aoaoina ma le auauna atu ao faamanuiaina i maua e vaai i le suia ma le faatamaoaigaina e le talalelei o olaga o i latou e taliaina.” E masani ona ia lagona le fia pese i le mea na te ta’ua o le pese a Amona: “Ae faauta, ua atoatoa lo’u olioli, ioe, ua tumu lo’u loto i le olioli, ma o le a ou olioli i lo’u Atua” (Alema 26:11).

Laveaiina o Mamoe

O Peggy Wallace Poll o Weber i Saute, Iuta, ISA, na maua ona malamalamaaga mai ia Amona ina ua tofia o ia e aoao atu e uiga i le laveai ma le toe faatoaagaina mai i se fonotaga faaleaoaoga a taitai perisitua ma ausilali a le siteki.

“I le faitau ai i le tala masani o Amona, sa ou matauina ai se mea fou,” o lana tala lea. “Manatua, o lo o auauna atu Amona i se misiona i totonu o sa Lamanā. Sa tuuina atu ia te ia se tofiga e vaavaai mamoe tautupu. O loo i ai isi auauna ia te ia, ma a o latou aumaia mamoe i Sevusa e faainu, na faataapeapeina e faomea le lafu. O se mea e matuai taufaafefe lava lenei i isi auauna. O le mea moni lava, o isi o e na faatagaina mamoe e faataapeapeina na fasiotia, ma na latou mautinoa lava o le a latou pagatia foi faapea. (Tagai Alema 17:25–30 .)

“Ae na vaaia e Amona se avanoa,” o le tala lea a Sister Poll. “Na ia ta’u atu i isi auauna ina ia lototetele aua o loo i ai sana fuafuaga. Faitau le Alema 17:31–33, ma o le a e vaai manino ai i le faataunuuga:

1. Matau i se vave e mafai ai, o loo misi ia mamoe.

2. ‘[Faanatinati] atu ma le televave.’

3. Faapotopoto faatasi ia mamoe.

4. Toe aumai i latou ma le saogalemu i le lafu mamoe.

5. Ia siomia i latou, faasaogalemu i latou, ma fafaga i latou i le alofa.”

Fai mai Sister Poll sa faagaeetia lava ia i auala e mafai ona faaaogaina ai lenei tala i le faatoaagaina mai: “E mafai ona vaai atu i le tala ia Amona o se faatusa o taitai o le Ekalesia i le taimi nei, o loo laveaiina tagata o le ekalesia o e ua faataapeapeina. O loo i ai ni uunaiga se tele i le lalolagi, e pei o le au faomea, e mafai ona tutulieseina tagata mai le afioga lelei a le talalelei. E tatau ona tatou mataala ma gaoioi vave pe a se se tasi o Ana agaga faapelepele mai le lafu.”

Na ia sii maia se saunoaga mai ia Peresitene Gordon B. Hinckley (1910–2008), e faapea “Ou te faamoemoe lava, ou te tatalo foi, o i tatou taitoatasi … o le a faia se faaiuga e saili i latou o loo manaomia le fesoasoani, o e o i ai i tulaga atuatuvale ma faigata, ma siitia i latou i le agaga alofa i totonu o le li’o o le Ekalesia, lea o le a mafana ai i lima malolosi ma loto alolofa i latou, faamafanafanaina ai, lagolagoina ai, ma tuu atu ai i latou i le ala o le fiafia ma ni olaga faamanuiaina.”¹

Faamatalaga

1. Gordon B. Hinckley, “Aapa Atu ma se Lima Laveai,” Liahona, Ian. 1997, 103.

Saili Le Tasi Lea Ua Leiloa

Final official portrait of Elder L. Tom Perry of the Quorum of the Twelve Apostles, 2004. Passed away 30 May 2015.

“E taua tele mo i tatou taitoatasi ona mafaufau loloto i lagona e oo i ai pe a leiloa, ma le uiga o le avea ma se leoleo mamoe ‘faaleagaga’ o lē na te tuua le 99 ae sue le tasi o loo leiloa. O ni leoleo mamoe faapena atonu e manaomia le tomai ma le fesoasoani a le au saili ma laveai, ae o loo latou i ai, faitauina faatasi, ma feaei atu i ona tafatafa e laveai mai i latou o e e matua taua i le silafaga a le Atua, aua o i latou o Ana fanau.”

Elder L. Tom Perry o le Korama a Aposetolo e Toasefululua, “Aumai Agaga ia te Au,” Liahona, Me 2009, 109.

E Mafai Foi ona Aoao i Tatou e Amoleka

O Amoleka o le isi toa maoae mai le Tusi a Mamona. Ua ia faaalia le mea e mafai ona avea ai tagata pe a latou toe foi mai i le ala o le amiotonu.

E mauoa ma lauiloa, ae na faailoa mai e Amoleka na ia molimauina mea lilo ma le mana o le Atua ae sa faamaaaina lona loto. “Sa valaauina au i le tele o taimi ae sa ou le fia faalogo; o lea sa ou iloa e uiga i nei mea, peitai sa ou le fia iloaina,” o lana tala lea (Alema 10:6; tagai foi i fuaiupu 4–5).

Ae na auina mai e le Alii se agelu e tau atu i a Amoleka e talia Alema, le perofeta, i totonu o lona fale. Na fafaga e Amoleka Alema, ma na faamanuiaina ma aoaoina e Alema ia Amoleka ma lona aiga. Ona faatasi atu lea o Amoleka ia Alema i le talaiga, ma avea ai o se molimau mamana lona lua o upumoni o le talalelei.(Tagai Alema 10:7–12.)

Na avea Amoleka ma soa a Alema i le valaau atu i tagata ia salamo, ma sa ia folafola atu le talalelei ma le malosi ma le pule lea na taufaiofo ai tagata (tagai Alema 11:46). Na saisaitia ma lafoina i le falepuipui, ae na sosola ese faavavega Alema ma Amoleka, faatu le Ekalesia i Saitoma, ona aoao atu lea o le talalelei i le laueelele atoa (tagai Alema 14; 15; 31).

E pei lava o Amoleka, e toatele tagata i le Ekalesia i aso nei o e, pe a latou toe toaaga mai, o le a iloa o le a faamanuiaina i latou e le Alii ma e mafai ona avea i latou ma ni molimau mamana o le upu moni.