E Talitonu Mamona i le Atua
E alala le tusitala i Chihuahua, Mekisiko.
I se malae vaalele e mamaoese mai le aiga, sa ou maua ai se avanoa e faasoa atu ai le talalelei i se tagata ese.
Ata na tusia e Steven Keele
Sa ou malaga mai Mekisiko i Montana, ISA, ma sa i ai se malologa i Denver, Colorado. Sa ou savali faataamilo i le malae vaalele, ma vaavaai atu mai faamalama tetele i vaalele o tulaueleele ma felelei ese. Sa ou popole aua ou te lei lele lava muamua. Sa foliga mai na matuai tele lava le malae vaalele.
Sa ou tilotilo atu i la’u pepa malaga ma iloa ai toe lua itula aluese le matou faigamalaga. Sa ou filifili e sue se nofoaga e nofo ai i lalo ma faitau seia oo ina ou alu i le vaalele. Sa ou lagonaina le fefe a o ou vaavaai atu mo se nofoaga e nofo ai. Sa toetoe lava a faaaogaina ia nofoa uma. Sa ou filifili e nofo i autafa o se tamaitai matua lea sa foliga mai sa na o ia. E na o ia lava le tagata e lei foliga taufaafefe ia te au.
Na mavae atu se itula pe a faatoa ou filifili e talanoa ia te ia. Sa ou faailoa atu au; na foliga mai o ia o se tagata matuai lelei lava ma naunau e talanoa ia te au e uiga i mea ua ausia e le tama a lana tama. Sa itiiti se mea na ia fesili mai ai ia te au e uiga ia te au lava ia, ma sa ou tau atu ia te ia mea uma e uiga i lo’u olaga i Mekisiko. Ona faafuasei lea ona oo mai se naunautaiga ia te au e faasoa atu le talalelei ia te ia. Sa ia fesili mai ia te au e uiga i la’u lotu, ma sa ou fai atu o a’u o se tagata o Le Ekalesia a Iesu Keriso o le Au Paia o Aso e Gata Ai.
Sa ia fai mai na te le’i faalogo muamua lava i ai.
Sa ou ataata ma fai atu, “E ta’ua foi matou o ni Mamona.”
Na vave lava ona suia ona uiga faaalia. Na suia ona foliga vaaia ma le ala sa ia talanoa mai ai ia te au. Sa foliga mai ua ia le iloa le tala e fai. Sa ou maua se lagona ua oo le ma talanoaga i se faaiuga, ae sa ou taumafai e talanoa atu pea ia te ia. Sa ou fesili ia te ia e uiga i lana tapuaiga. Sa ia fai mai e aunoa ma le faatuai, “O au e Katoliko.”
Ona ia fai mai lea, “Ou te le malamalama. O oe o se teine lelei tele. E te foliga mama. Aisea, la, e te manao ai e avea ma se Mamona?”
Sa ou tei i lenei tala, ma sa ou le iloa pe faapefea ona tali atu i ai. Sa ou faia se tatalo le leoa, ma talosaga atu i le Tama Faalelagi e fesoasoani mai ia te au e faamalamalama atu le taua ia te au o le avea ma se tagata o le Au Paia o Aso e Gata Ai. Sa ou tau atu ia te ia sa ou fiafia i le avea ai ma se tagata o le Ekalesia, ma ona o aoaoga o le talalelei, ua mafai ai ona avea au ma se tagata sili atu ona lelei, ma vaai atu i mea i se vaaiga mamao.
Sa te’i o ia ma fai mai, “E le talitonu Mamona i le Atua.”
Sa ou taumafai e aua le ata i lenei tala; nai lo o lena, sa ou ataata ma iloa ai o lo’u avanoa lenei e faasoa atu ai le upumoni ia te ia. Sa ou faamatala atu nisi o o tatou talitonuga autu. Sa ou aoaoina o ia e uiga i le ata o le faaolataga ma le taua o aiga. Sa foliga mai na te le talitonu lava, o lea sa ou filifili ai loa e tuuina atu la’u molimau ia te ia. O iina i se malaevaalele tele, sa faamanuiaina au i le lototele e faasoa atu lau molimau e uiga ia Iosefa Samita, e uiga i le perofeta soifua ma aposetolo, ma e uiga i le fiafia sa ou lagonaina e uiga i le talalelei ma le Tusi a Mamona.
Sa ou tilotilo i le uati. Ua oo i le taimi e pu’e ai la’u vaalele.
O lena aoauli na faamalosia ai la’u molimau i se auala ou te lei lagonaina muamua. Sa ou fiafia sa ou faasoaina atu la’u molimau ia te ia ma faafetai foi sa mafai ona ou fesoasoani atu ina ia suia lona mafaufau e uiga i tagata o le Ekalesia. Ua mafai nei ona sili atu lou mautinoa pe a fesili mai se tagata ia te au e uiga i le Ekalesia.