O Le A Le Mea O E Vaaia?
Pe a tatou suesue ma mafaufau loloto i faatusa i sauniga o le talalelei, e taulai atu o tatou mafaufau ia Iesu Keriso.
Ona o faatusa o loo siomia ai i tatou, e masani lava ona tatou le mafaufau tele i ai . Ae o le gauai atu ma le faaeteete i faatusa o le talalelei e mafai ona avea ma se ki i se malamalama sili atu.
E faaaoga e tusitusiga paia upu e pei o ituaiga, ata lafoia, faatusa, faailoga vaaia, faailo, faataoto, faamanatu, molimauina, po o le molimau e faamatala ai se mea e tatau ona faasino atu ai o tatou manatu i se isi mea (tagai Mose 6:63). Mo se faataitaiga, ina ua faalauiloa mai e Iesu le faamanatuga i le Talisuaga Mulimuli, na Ia tuuina atu i Ona soo le areto ua tofitofi latou te aai ai ma faapea atu, “O lo’u tino lenei ua foaiina atu mo outou: tou te faia le mea lenei e fai ma faamanatuga ia te au” (Luka 22:19). O lenei, e mautinoa lava o le areto e le o Lona tino moni lea; e pei ona Ia faapea mai, e avea ma faamanatu ia i tatou o Lona tino—ma sili atu. O le mea lena e matuai mamana ai lava faatusa—latou te fesootai atu e aunoa ma le gagana, ma faaosofia ai le tele o manatu e fesootai i le taimi lava lea e tasi, ma faaopoopoina ai le loloto ma le uiga.
O le mea moni, o sauniga e le na o ni faatusa lea o ni gaoioiga; latou te tauaveina le mana moni lava e faamanuia ai i tatou e ala i le pule o le perisitua. Ae o loo i ai foi faatusa e aoao ai i tatou e uiga i le Faaola ma a tatou feagaiga.E oo lava i le faatinoga o le taliaina ma le mauaina o se sauniga faaperisitua o se faailoga vaaia o le faatuatua ma le lotomaualalo o se tagata. O le tele lenei o faatusa e fesootai ma sauniga o le papatisoga, faamauga, ma le faamanatuga, faapea foi ma nisi o manatu e fesootai i ai.
Papatisoga
Vai: mulumuluina, faamamaina, faapaiaga mai le agasala
Laei papae: mama a’ia’i (“ona e leai se tagata e mafai ona faaolaina sei vagana ai ua tatā faasinasina onaofu … [ma] faamamaina … e ala i le toto o [Keriso]” [Alema 5:21]); e laugatasia (pe mauoa pe matitiva, e laei e tagata uma laei lava e tasi i le papatisoga, aua “ua tutusa tagata uma i le Atua” [2 Nifae 26:33])
Siitia le lima taumatau: aapa atu i le lagi, e molimauina i le lagi; o se faailoga foi lea o se tautoga (tagai Kenese 14:22; Tanielu 12:7)
Faatofuina: o le maliu, tanumia, ma le Toetu o Keriso (tagai Roma 6: 3–4); o lo tatou toefanauina faaleagaga ia Keriso (“fanau i le vai” [Ioane 3:5])
Faamauga
Faaeega o lima: o le pa’i atu faaletino o i latou o sui o le Atua, e tuuina atu ai faamanuiaga mai le Atua i isi
Mauaina o le meaalofa o le Agaga Paia: ua ta’ua o le “papatisoga i le afi” (tagai 2 Nifae 31:13); faamamaina ma le toe fanauina faaleagaga ia Keriso
Faamanatuga
O le tuuina o le falaoa ma le vai i luma o le faapotopotoga: o faatusa o le taulaga a Keriso, lea na faaiuina ai taulaga e ala i le faamaligiina o le toto (tagai Alema 34:13–14); o lenei ua tatou aumaia se “taulaga i le Alii … o le loto momomo ma le agaga salamo” (MF&F 59:8)
Tofitofiina o le falaoa: O le puapuagatia faaletino o Keriso mo i tatou, o Lona maliu faaletino, o Lona Toetu ina ia tatou toe ola ai
Tootuli e tatalo: lotomaualalo, gauai atu i le finagalo o le Atua; o se faailoga o le feagaiga tumau-faavavau (tagai MF&F 88:131)
Taumafa i le falaoa: manatuaina o le tino o Iesu Keriso (tagai Mataio 26:26–29), o le areto o le ola (“o lē sau ia te au, e le laina lava ia” [Ioane 6:35], “o lē ai i lenei areto e ola ia e faavavau” [Ioane 6:58])
Taumafaina o le vai (uaina na muai faaaogaina): o le toto o Keriso (na maligi i Ketesemane, i le taimi o Lona mafatiaga i lima o fitafita, ma luga o le satauro), e “faamamaina ai i tatou mai agasala uma lava” (1 Ioane 1:7) ma “ua i ai i le feagaiga a le Tamā mo le faamagaloina o a outou agasala,” (Moronae 10:33); toto e avea “o le autu o le ola po o le malosiaga taua o aano uma lava” (Taiala i Tusitusiga Paia “Toto”; scriptures.lds.org) ma o lena e togiola mo agasala e ala i le taulaga (tagai Levitiko 17:11); vai ola (tagai Ioane 4:14)