Aumaia o le Peraimeri i le Fale
E Avea i Tatou ma Tagata o le Ekalesia e ala i le Papatisoga ma le Faamauga o Papatisoga
E alala le tusitala i Iuta, ISA.
Aoao atili e uiga i le autu o le Peraimeri o lenei masina!
Na sau Mariela i le fale mai le aoga ma se faanonou i ona mata. “O le a se mea ua tupu?” Na fesili atu ai tina a o ia totoina ni fugalaau i le togalaau.
“Na folafola mai Sonia o le a ma taaalo, ae na te lei faia,” na fai mai ai Mariela. Sa ia faapau i lalo i le palapala i talaane o Tina.
“Ou te matua faamalie atu,” o le tala a Tina. “E taua le tausia o folafolaga. O le vaiaso a sau pe a e papatiso ma faamauina le papatisoga, o le a e faia ni folafolaga taua tele, e ta’ua o feagaiga.”
“E mo’i?” Sa fesili mai ai Mariela. Sa naunau o ia e papatiso.
Sa tuu e tina ni fugalaau samasama i le eleele. “Ua e folafola atu e usitai i poloaiga. Ua e folafola atu foi e tauaveina le suafa o Iesu Keriso i ou luga. O le a le mea ua folafola mai e le Tama Faalelagi pe afai e te faia nei mea?”
Sa mafaufau Mariela i mea sa ia aoaoina i le Peraimeri. “O le a ou maua le Agaga Paia e faatasi ma au.”
“E sao lena,” na fai mai ai Tina. “O le a avea foi oe ma se tagata o le Ekalesia a Iesu. E faapefea ona e tausia lau folafolaga e usitai i poloaiga?”
“E mafai ona ou agalelei, ma e mafai ona ou ta’u le mea sao,” o le tala lea a Mariela. “O le a le uiga o le tauave o le suafa o Iesu i ou luga?”
“O lona uiga e te taumafai ia faapei o Ia ma faia mea e finagalo o Ia e te faia,” o le tala lea a Tina. “O le a se mea e mafai ona e faia e avea ai faapei o Iesu?”
Sa faataamilomilo e Mariela se fugalaau viole i le va o ona tamatamailima. “E mafai ona ma nonofo faatasi ma le teine fou i le aoga. Ma e mafai ona ou taumafai e agalelei ia Sonia, “o lana tala lea.
“O ni manatu lelei tele na,” o le tala a Tina. “Ma pe a e ai ma inu i le faamanatuga, e mafai ona e manatuaina au folafolaga.”
Sa ataata Mariela. “Ou te iloa se isi folafolaga—e fui fugalaau ina ia mafai ona tatou maua se togalaau matagofie!”