Saunia e Auauna Atu
“Aoao i lou talavou e tausi i poloaiga a le Atua” (Alema 37:35).
Sa ou ola ae i le aai o Minas, Iurukuei. Ina ua ono ou tausaga, sa papatisoina lo’u tina ma o’u tuafafine matutua i le Ekalesia. E lei auai lava lo’u tama i le Ekalesia, ae sa fiafia pea o ia matou te o i le lotu. Sa ia tausia foi lava le Upu o le Poto ma totogi le sefuluai.
Sa laitiiti tele le matou paranesi, ma e le’i i ai se matou fale o le ekalesia. Sa matou feiloai i se fale mautotogi. Sa i ai se tamai vai taele i fafo o le fale lea matou te faaaogaina mo papatisoga.
A o lalata mai lo’u aso fanau lona valu, sa ou fiafia lava i lou papatisoga. Ae i le aso o le papatisoga, sa timu ma maatiati le malulu. Sa fai mai lo’u tina atonu e le tatau ona ou papatiso i lena aso ona o le tau malulu. Ae o lo’u aso fanau lena, ma sa ou manao ina ia papatiso i lena aso.
Ou te manatua le faiga o lo’u ofu paepae ma le alu atu i totonu o le vai ina ia papatisoina. Sa ou iloaina o le a malulu le vai, ae ou te le’i lagonaina se malulu. Sa ou iloaina o loo ou faia le mea sa’o, ma sa ou maua se lagona mafanafana.
I se taimi puupuu mulimuli ane na fausia ai se falesa mo la matou paranesi. O le taimi lena sa mafai ona fesoasoani ia tagata o le Ekalesia e fausia falelotu. O la’u galuega o le aoina mai o fao ma faovili na pauu i le eleele ina ia mafai ona toe faaaoga. O se galuega faigofie, ae sa sili ona taua ia te au. Sa aoaoina au i le auala e auauna atu ai, ma na fesoasoani e saunia ai au mo le auaunaga i le Ekalesia i le lumanai. Ia manatua, e ui lava e te laitiiti, o mea o e faia i le taimi nei e taua.