O Motugaafa e Sefulu mo Matua o le Autalavou Matutua

Saunia e Wendy Ulrich

Fomai o le Mafaufau ua Laiseneina

E alala le tusitala i Iuta, ISA.

E ui lava i luitau o le lalolagi o aso nei, e mafai e matua ona faaauau ona faamanuia a latou fanau talavou matutua e ala i le tuuina atu o le lagolago ma le taitaiga amiotonu.

Ata

A father and son standing together outdoors. The son has his arm on his father's shoulders.

Ina ua ma fesoasoani ma lo’u toalua i le ma fanau e see atu i fale o le kolisi po o le ulu atu i le maota autu o aoaoga mo faifeautalai, sa matou lagonaina se tuufaatasiga o le faanoanoa ma le faasaolotoina e mafaufau o i latou—ma i maua—ua iu lava ina “uma.” Na vave ona ma iloaina, e ui i lea, faatasi ai ma le mauaina o tomai fou ma le saolotoga, na feagai le ma fanau ma ni luitau faaopoopo. A o mou ese atu lo ma puleaina o o latou olaga, o la latou manaomia o le lagolagosua—se isi ituaiga o lagolago—na faateleina moni lava.

Luitau o Aso Nei

O nisi nei o luitau o loo feagai ma talavou matutua i le lalolagi o aso nei, faatasi ai ma ni fesili o na luitau ua saoasaoa tele mo matua.

Umi atu le olaga nofofua. O faiga a le lalolagi o le amataina o le aiga i se taimi mulimuli ane i le olaga ua tuua ai talavou matutua ma le lagona e pei o ni talavou faavavau. O isi ua faapopoleina, ma mafaufau pe o le a faaipoipo ea i se taimi ma pe o le a maua ea ni fanau. I le avea ai ma matua, pe mafai faapefea ona sili ona tatou fesoasoani ia i latou ina ia i ai se vaaiga e faavavau?

Le mautonu i mea tau tupe. O le toatele o talavou matutua o le taimi nei e le mafai ona tutusa ma o latou matua i mea tau tupe. E mafai ona faigata ia i latou ona maua se galuega—e tusa lava pe o i ai se faailoga i le kolisi—po o le tausia o se aiga. I le avea ai ma matua, e tatau ea ona tatou aapa atu i mea tau tupe, po o le mafaufau faapea o le a tuputupu ae ai a tatou fanau mai le fuafuaina o a latou lava tupe?

Filifiliga lofituina. Atonu o autalavou matutua o taimi nei ua sili atu le tele o filifiliga tau galuega. Ae o nisi taimi e foliga mai o na filifiliga uma e mafai ona lofituina. E mafai faapefea ona fesoasoani matua i fanau matutua e sailiili i avanoa ae filifili foi se galuega faamalieina?

O le ola faatasi ma matua. Pe ua faaipoipoo pe leai, ua faatupulaia le aofai o le autalavou matutua i le va o le 18 ma le 34 tausaga o loo nonofo ma matua. Pe a nonofo faatasi fanau matutua ma o latou matua, e faapefea ona soalaupule lelei e matua mataupu e pei o ai e totogiina meaai ma le auala e aoai ai fanau a fanau?

Fesootaiga faalelotu. I le taimi nei, o talavou matutua o faatuatuaga uma lava ua tau le fiafia e faifaimea faatasi ma se ekalesia nai lo talavou matutua o le tasi le tupulaga talu ai. E mafai faapefea e i tatou o matua ona uunaia a tatou fanau matutua ina ia tumau le toaaga i le Ekalesia? E mafai faapefea ona tatou lagolagoina i latou faaleagaga e tusa lava pe ua latou filifili e o ese mai gaoioiga a le Ekalesia?

Taiala mo Matua

E tusa lava pe atonu ua sili atu a tatou fanau matutua ia i tatou i ni tomai po o mea ua ausia, latou te manaomia pea ma ua tatau i ai le lagolago a matua e faatautaia ai le lalolagi. O taiala nei e 10 e mafaufau i ai.

Saili po o a mea e mananao ma fiafia i ai lau fanau. Nai lo le ta’u atu i lau fanau talavou matutua auala e maua ai mea e te manatu latou te manaomia, fesili atu e uiga i o latou tulaga faatauaina, sini ma miti. Atonu latou te talosagaina oe e fesoasoani ia i latou e fuafua se ala e oo atu ai iina. Afai latou te faia, faatagaina a latou miti e taialaina a outou talanoaga. Suesue tulaga e lelei ma leaga ai, tatalo mo le taitaiga, ma faaauau le talanoaga. Afai latou te le iloa mea latou te manaomia, uunaia i latou e feiloai ma se faufautua taiala, fai ni suega o matata e fiafia i ai, po o le saili le poto masani sili atu e ala i galuega ma le volenitia.
Suesue ma le agaga tatalo Mataupu Faavae ma Feagaiga 121: 34–46. O nei fuaiupu e matagofie le aoga i tina ma tama. Latou te aoaoina mataupu faavae sao e uiga i le auala e saunia ai le taitaiga amiotonu i a tatou fanau matutua.
Faaalu lou taimi i fesootaiga ma le toatele o talavou matutua. Atonu e te iloa ai o fanau a isi tagata e fia iloa foi pe na faapefea ona e ola i le va o lou 20 ma le 30 tausaga. E fia iloa e talavou matutua pe na faapefea e tagata e matutua atu ona faapaleni le feteenaiga o mea e faamuamua, filifili galuega, po o le iloa le taimi latou te mauaina ai o latou taitoalua. Pe a e fegalegaleai ma nei talavou matutua, o le a e malamalama atili e uiga i luitau o loo feagai ma lo latou tupulaga.
Faailoa atu a latou meaalofa. O le fesoasoani i talavou matutua ia iloa a latou taleni ma mea e fiafia i ai e mafai ona fesoasoani ia i latou e vaai faalemafaufau ai i se lumanai faamanuiaina. Faailoa atu e seasea lava ona fiafia tagata i se mea seia vagana ua lava so latou faaaluina o se taumafaiga e maua ai le poto masani. E oo lava ia i latou o loo i ai le tele o taleni masani e tatau ona faaalu se taimi e atiina ae ai ina ia faamanuiaina.
Faatuatuaina i latou i a latou faaiuga. E le faapea o le talitonu o le a latou faia lava i taimi uma filifiliga e atoatoa ona lelei. O lona uiga o le faatuatuaina e mafai ona latou manumalo mai measese, ma o le Atua e loto faamagalo, ma o le olaga e mafai ona matuai taua lava e tusa lava pe e aofia ai le manumalo mai le toilalo po o le onosaia o tofotofoga. O fanau laiti e mafai ona aafia tumau i se puapuaga, ae o talavou matutua e tuputupu ae mai le faatoilaloina o faafitauli nai lo le aloese mai ai. Tuu atu le lagolago faalelagona ma le aoga, uunaia ni malologa pupuu mai le popolevale, ma tatalo faatasi ma i latou ma mo i latou, ma ia i ai sina uiga malie.
Faaviivii atu ia i latou mo a latou taumafaiga. O le faaviivii atu i talavou matutua mo le galue malosi ma le manumalo mai measese o le a fesoasoani ia i latou ina ia umi ai ona tumau i galuega, taliaina nisi galuega faigata, ma maua le fiafiaga sili atu i la latou galuega. O se fuafaatatau na faasoa mai e Peresitene Thomas S. Monson e faapea, “O le galue mo se mea o le a manumalo ai, nai lo o le manaonao i ai.¹
Saili mo Musumusuga. O a tatou tatalo ma le faatuatua e fesoasoani ia i tatou e tatala ai o tatou loto ina ia tuu atu i le Atua e suia i tatou. O se tasi tamaitai ou te masani ai sa lagona le popole ona o ata i le TV o loo matamata ai lana fanau matutua. Sa ia lagonaina o ata o loo faataitaia ai le le faaaloalo ma le femisaa’i, e ui lava ina sa faapea e talafeagai le vaitausaga . I le le manao ai e faalavelave, sa ia tatalo ma anapogi pea lava pea e uiga i le mea e fai pe tautala atu ai. I se tasi taeao sa valaau mai le toalua o lana tama tama mo se fautuaga e uiga i le auala e pulea ai le le faaaloalo ma le tauaimisa o lana fanau. Sa faasoa atu e la’u uo ona manatu e uiga i ata o le TV, o se faatosinaga e le i mataituina lava e le toalua o lana tama tama. Na talanoaina e matua talavou le mataupu ma le la fanau. Sa ioeina ni suiga, ma faaleleia atili le siosiomaga i le aiga.
Talanoa e uiga i tupe. Filifili ma le faautauta lou lava tulaga ma le matutua o tamaiti taitasi, ma le agaga tatalo po o le a le fesoasoani tau tupe, pe a i ai, e tuuina atu i lau fanau. Atonu latou te manaomia tau lava o lau fesoasoani i le fatuina o se paketi. Afai e te tuuina atu ia te i latou le fesoasoani tau tupe, ia faamanino mai le amataga pe e te manao i le tupe e toe totogi po o le faaaogaina i se ala faapitoa. Ona tuu atu lea ma le agaga fiafia ia te i latou le tiutetauave e pulea a latou tupe ma aoao mai mea sese, e aofia ai le leai o se tupe taeao pe afai e sili atu le tupe e faaaoga nei.
Ia lotomaualalo. Pe a e lagona lou lava sese i tulaga faamatua, taumafai e faateleina lou lotomaualalo nai lo lou faalumaina. Faatoese ma le agamalu, tau atu le mea o le a e faia e faaleleia ai, ona agai lea i luma ma le mautinoa. Ia tuu atu i lau fanau ia malamalama mai le matauina o oe e faapea o mea sese e mafai ona toe faasa’o, o le faatoesega e le o se faailoga o le vaivai, ma o le faamagalo atu i isi ma i tatou lava e aumai ai le filemu.
Fuaina le manuia moni. Pe a tatou taulai tele atu i le faamasinoina o i tatou e isi mo filifiliga a a tatou fanau (pe mo le lelei pe leaga), o le a uma lo tatou faamoemoe, ma e masani lava ona le maua ai le Agaga. Ia manatua o lo tatou faamanuiaina i le avea ai ma matua e le faamatalaina i le lelei o loo ola ai a tatou fanau i o tatou tulaga faatauaina, ae o le auala o loo tatou ola ai pea lava pea ma le le faalogologo tiga

A o tatou mafaufau ma le agaga tatalo i manaoga ma uiga faaletagata o a tatou fanau matutua talavou taitasi, e mafai e le Agaga ona fesoasoani ia i tatou e taialaina ai e aunoa ma le faitio, lagolago e aunoa ma le faamalosia, ma tuu atu le saolotoga e aunoa ma le lafoaia. A o tatou faia faapea, o le a oo ina talitonuina e a tatou fanau talavou matutua faapea ua tatou i ai uma lava ma le Alii i le latou itu.