Fesiitaiga o Paipa i Seevae Palapala
E alala le tusitala i Iuta, ISA.
Ou te lei manao e toe sii se isi paipa faapasī se tasi.
Ata na tusia e Jake Parker
“Faafetai, Epikopo Rowley. O le a matou fiafia e fesoasoani.” Na ave e Uso Hulet, o lo matou fautua o le korama a tiakono, le laupapa kilipa mai le lima o le epikopo ma faasilasila atu, “o loo ia te au se lisi e saini mo tagata volenitia i le faatoaga a le Ekalesia. Ou te talitonu o le a fiafia le Alii pe afai o i tatou uma o le a fesoasoani atu i le vaiaso a sau.”
“O le a le ituaiga o fesoasoani?” Sa fesili at ma le faaeteete. O lenei manatu o le faatoaga o le Ekalesia e lei foliga mai o le a matua malie lava.
“Pau lava la tatou galuega atofaina o lenei vaiaso o le fesiitaiga o paipa faapasī.”
Fesiitai paipa! Na faatumulia au e upu i le popole. Na liliu atu o’u manatu i ni nai masina talu ai ina ua viga mai lou tina e sue sau galuega o le taumafanafana. I lo matou taulaga laitiiti, o lona uiga o le mea lava e tasi—fesiitai paipa. Ma o lea, sa ma fesiitaia ai paipa ma lo’u tausoga o Scott, i le taumafanafana atoa.
I le aso muamua o le ma galuega o le taumafanafana, sa ma tutu ai ma pupulatoa atu i le salafa tele o laau ninii fai salaki lanumeamata. O le 40-futu- le uumi (12 m) o paipa sa sosoo faatasi i se laina sa’o na foliga mai e faasoloatoa atu mo le fia maila. Ina ua maea se aoaoga puupuu, na ma motusiaina ma Scott le ma paipa muamua. Sa sii i luga e Scott lana pito, ma na pasi mai le vai malulu ma susu uma ou seevae tenisi. Sa ma tau siia i luga le paipa i le palapala pipii ma toe faapipii i le isi paipa agai i luga. A o ma toe savavali i tua mo le isi paipa, na amata ona mamafa tele atu ou seevae maseesee a o piipii i ai faaputuga ua matuai mafiafia o palapala. Mulimuli ane, o le palapala, vai, ma o ma lava afu na susu pala ai o ma lavalava ma agaga.
Na toe foi atu o’u mafaufauga i le volenitia i le faatoaga a le Ekalesia. “Ia, ou—te le manatu e mafai ona ou sau,” lau memumemu atu. “E tatau ona ou alu i la’u lava galuega i taeao uma.”
“E le afaina,” le faamautinoa mai a Uso Hulet. “E masani ona matou o i le faatoaga a le Ekalesia i aoauli.” Na pasi faataamilo e Uso Hulet le lisi e saini “Ina ua faauuina outou taitasi i le perisitua, na tuuina atu ia te outou le mana e galulue ai i le suafa o le Atua. Ma a o tatou auauna atu ia te Ia e ala i le auauna atu i isi, ua tatou galulue i Lona suafa. Ma le isi, faatasi ai ma i tatou uma lava e fesoasoani, o le a le foliga faigata lava le galuega.”
Na pasi mai le lisi ia te au. Sa ou le talitonu, o le taimi lenei, ua saini uma tagata e o i aso uma o lenei vaiaso. Pe latou te lei iloa le matuai faigata tele o lenei mea? Sa ou lagonaina le mamafatu o le uunaiga amiotonu a le tupulaga ia te au. Ma le le manatu i ai, sa ou saini loa ma pasi atu i luma.
O le aoauli o le aso Gafua, sa ou nofo ai i lo’u potu e malolo mai le galuega o le taeao ae ou faalogoina Uso Hulet o faaee mai lana pu i fafo. Sa ou le mautonu mo se taimi a e ou te lei toe sui i lo’u ofu faigaluega uu, ma le susu.
E lei umi ae matou taunuu i le faatoaga a le Ekalesia. O tagata uma sei vagana ai au na tamomoe atu agai i le fanua. Sa ou faatautau atu i tua, ifo i lalo, kikiki maa, ae na faateia au i se lima i luga o lo’u tauau. “Faafetai mo lou faatasi mai ma i matou,” o le uunai mai a Uso Hulet. “Ou te iloa na e galue malosi i le taeao nei.” Sa ma savavali faatasi ma le leleoa mo ni nai minute. Ona ia toe tamoe ai lea i luma e faatulaga le vaega.
Sa ou vaai atu ia te ia ma mafaufau e uiga i le mea na ia fai mai ai ia te au. Sa ou galue malosi i lena taeao. Sa ou vaivai lava ma uu, ma sa ou manao e alu i le fale. Ae o le a faapefea Uso Hulet? Sa ia galue malosi foi i lena taeao. E faapena foi isi tagata uma lava, mo lena tulaga. Ma pe aisea ua latou foliga fiafia ai i le i ai iinei?
Sa ou mauaina atu isi, ma sa amata la matou galuega. I le taimi muamua, sa ou taumafai e faafiafia a’u lava ia e ala i le mafaufau i le taulaga tamalii sa ou faia. E lei umi ae iu o’u mafaufauga faaletagata, ma sa ou matauina le vave o lo matou galuega i le fesoasoani o tagata uma. Sa matou talie ma talanoa, ma na faafuasei lava ona ou iloaina sa ou mauaina moni lava le fiafia! I ni nai itula puupuu lava na matou faamaeaina ai la matou galuega.
A o matou tietie atu i le fale, sa ou iloaina o le mea sa ou manatu o le a avea ma se taulaga le gafatia na foliga laitiiti. O le mea moni, ona o le fesoasoani o tagata uma, na foliga mai e le o se osigataulaga lava.
Na taofi le taavale a Uso Hulet i luma o lo’u fale ma toe tilotilo mai i tua ia te au. “Faafetai atu mo lau fesoasoani i le aso. O lou galue malosi sa faigofie ai mo isi o i matou.” Sa ataata o ia ma faaivi mai lona mata.
Sa ou ataata atu foi. “Faafetai, ae o i tatou uma lava na fesoasoani faatasi o le mea lena na faigofie ai.” Sa ou oso i fafo o le taavale ma tapuni le faitotoa.
Sa sui le kia o le taavale e Uso Hulet ma amata ona alu ese atu. “Toe feiloai taeao, a ea?” sa ia valaau mai ai i le faamalama sa matala.
“Ioe. Toe feiloai taeao,” sa ou fai atu ai.