O Le Misiona Paia a Iesu Keriso: Fautua

Ia suesue ma le agaga tatalo lenei anomea ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te tausia e ala i faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

Ata

Jesus Christ depicted leaning on a rock in the Garden of Gethsemane. The image depicts the Atonement of Christ.

E Le o Lo’u Loto, A o Lou Finagalo, Ia Faia, saunia e Harry Anderson

O Iesu Keriso o lo tatou Fautua i le Tama. O le upu fautua e afua mai i le upu Latina o lona uiga “o se tasi o loo augani mo se isi.”¹ O le Faaola o loo augani mo i tatou, e faaaoga ai le malamalama, faamasinotonu, ma le alofa mutimutivale. O le iloaina o lenei mea e mafai ona faatumuina ai i tatou i le alofa ma le agaga faafetai mo Lana Togiola.

“Faalogo ia [Iesu Keriso] o lē o le fautua i le Tamā, o lē o loo fautuaina la outou tagi i ona luma—

“Ua fetalai atu: Le Tamā e, faauta i mafatiaga ma le oti o lē na lē faia e ia se agasala, o lē na e fiafia tele i ai; faauta i le toto o lou Atalii na faamaligiina, le toto o ia o lē na e tuu atu ina ia faamamaluina oe;

“O le mea lea, Tama e, ia faasaoina ai ou uso nei o e talitonu i lou igoa, ina ia latou o mai ia te au ma maua le ola faavavau” (MF&F 45:3–5).

O Keriso o lo tatou Fautua, na saunoa ai Elder D. Todd Christofferson o le Korama a Aposetolo e Toasefululua: “E taua tele lena mea ia te au, i le mafai e au i soo se taimi ma i soo se tulaga, ona faaalatalata atu i le nofoalii o le alofa tunoa e ala i le tatalo, ma o le a faafofoga mai lo’u Tama Faalelagi i la’u olega, ma o lo’u Fautua, o lē ua aunoa ma se agasala, o le na faamasaaina lona toto, o le a Ia aioi atu mo au.”²

Tusitusiga Paia Faaopoopo

Mosaea 15:8–9; Moronae 7:28; Mataupu Faavae ma Feagaiga 29:5; 110:4

Mai Tusitusiga Paia

I le talafaasolopito atoa o le Ekalesia a le Alii, sa mulimuli soo tamaitai o Iesu Keriso i Lana faataitaiga. O Eseta sa faamaoni ma lototoa. Na auina atu e lona tausoga o Moretekai ia te ia se kopi o le tusi o le tulafono a le tupu o le a faaumatia tagata Iutaia, ma sa ia poloaiina ai o ia “e alu atu o ia i le tupu, e aioi atu ia te ia ma faatoga atu ia te ia mo lona nuu.” Sa ia faaopoopo atu: “E iloa foi e ai po ua fai oe ma masiofo ona o se aso faapenei?” (Eseta 4:8,14.)

E ui lava i tulaga matautia, na malie i ai Eseta: “E faapena foi ona ou alu atu i luma o le tupu o le mea e le tusa ma le tulafono: afai ou te oti ai oti ai pea ia” (Eseta 4:16).

Ona talanoa atu lea o Eseta ma le lotomaualalo i le tupu ma “faapau foi i lalo o ona vae, ma tagi … ia faaliliueseina tusi … ia fano sa Iuta.”Sa ia faaopoopo atu, “Ou te mafaia faapefea ona ou vaai atu i le leaga o le a oo i lou nuu?” (tagai Eseta 8:3, 5–6). Na faamaluluina le finagalo o le tupu, ma sa ia tali leleia lana talosaga.³