Fakamatala e Uepisaití Ki he Ngāue Tokoní, Tuí

ʻOku fakahoko ʻe he Kāingalotú e ngāue tokoní pea vahevahe ʻenau tuí ʻi he funga māmaní. ʻOku ʻasi e ngaahi lipooti ki he ngaahi ngāue peheé ʻi he uepisaiti ongoongo fakafonuá, ʻa ia ʻoku faʻa fakamatalaʻi fakanounou ʻi he newsroom.lds.org, ko e maʻuʻanga tokoni fakaʻofisiale ʻa e Siasí ki he maʻuʻanga ongoongó, ko e kau taki mohu fakakaukaú mo e kakaí.

ʻI he ʻēlia Pasifikí, ne ʻoatu ʻe he Kāingalotú ha vai, meʻatokoni, kili, meʻa sivi vai, senoleita (generator), mo e nāunau ki he meʻa fakatuʻupakeé ke tokoniʻi e kakai Tongá hili e fakaʻauha ʻa e Matangi Fakatalopiki ko ʻIení. ʻI Haʻamoá, ne kau atu e toʻu tupu ʻo e Siasí, ʻi ha polokalama ʻaho ʻe ua fakavahaʻa-Siasi ne ʻi ai ha poupou fakalaumālie, hiva, hulohulá, mo e sipotí.

ʻI Palāsilá, ne tokoni e kāingalotu ʻo e Siasí ʻi heʻenau tui ha sote Nima Fietokoni Māmongá ki hono fakamaʻa mo tufaki ha nāunau hili e hono maumauʻi ʻe ha tāfea e tukui koló mo ha ngaahi pisinisi ʻo tukuhausia ai ha niʻihi tokolahi. ʻI ha feituʻu kehe, ne tokoni e kāingalotú ki hono tufaki e ngaahi sea saliote ʻe 211 ʻi hono foaki ia ʻe he Tokoni ʻOfa Fakaetangata ʻa e Siasí ki ha niʻihi fakafoʻituitui ʻoku ʻi ai ʻenau fie maʻu makehe. ʻOku mei aʻu e foaki fakakātoa ko ʻeni ki Palāsilá ki ha ngaahi sea ʻe meimei 700.

ʻI ʻAfiliká, naʻe kau fakataha ha ngaahi kautaha fakafonua mo fakamāmani lahi mo e LDS Charities, ko e vaʻa tokoni ʻofa fakaetangata ʻo e Siasí, ki he fuofua feinga fakalotofonua ʻa Kana ke fakangata e mīselé mo e mīsele Siamané ʻi he fānaú mei he kei valevalé ki he taʻu 14. ʻI Naisīlia mo Kana, ne faitokonia ʻe ha ʻaho Nima Fietokoni ha toko lauiafe ʻi ha ngaahi kolo ʻe 100 ʻi ha tokoni ha kāingalotu ʻi he toʻu kehekehe ke langa ha hala fakakavakava, tō ʻakau, huo, vali ha ngaahi fale, mo fakamaʻa mo ngaohi ke fakaʻofoʻofa e tukuiʻapí. ʻI Simipapueé, ne loto fiemālie ha toʻu tupu ʻe toko 60 tupu ʻo e Siasí ke foaki ha toto. Pea ʻi Saute ʻAfilika, ne fili ai ʻa Nisipele Makanitā ko ha mēmipa ʻo e Siasí, pea ko ha faʻē ki ha toko ono, ko e pule kolo ʻo Kuinisitauní, ʻa ia ʻoku ʻi ai ha kakai ʻe toko 200,000.

ʻI ʻAmelika Lotolotó, ne ngāue ha toʻu tupu ʻe 500 tupu ʻo e Siasí ʻi Kuatemalá mo e puleʻangá ke tō ha ʻakau ʻe 1,944. ʻI Kosita Liká, ne hoko e ngaahi ʻapisiasi ʻo e Siasí ko ha feituʻu tānakiʻanga huʻakau pea ne tokoni ha kau ngāue tokoni ʻe toko 370 ʻa e Siasí ki hono tufaki ia ki he ngaahi falekoloa ne kau ki ha polokalama ke tokoniʻi ʻa kinautolu ʻoku faingataʻaʻiá.

Pea ʻi Kānata, naʻe ngāue fakataha e Kāingalotú mo e Kautaha Fetalanoaʻaki Faka-Kalisitiane-Siu ʻo Monituliō (Kiueki) ke teuteuʻi ha ngaahi ʻinitaviu fakavitiō kimuʻa e ngaahi fepōtalanoaʻaki fakapuleʻanga ki he tuʻunga ʻulungaanga mahuʻingá. Ko kinautolu ne ʻinitaviú ne nau poupouʻi e tukupā ʻa e koló ke fakaʻapaʻapaʻi, mahino, anga faʻa kātaki, mo e tauʻatāina fakalotú, ʻo fakamamafaʻi e kei mahuʻinga ko ia e tui fakalotú ʻi he moʻui ʻa ha kakai tokolahi ʻo Kiupekí.

Ke maʻu ha lisi ʻo e uepisaiti ʻo e ongoongo fakavahaʻa-puleʻangá ʻi ha ngaahi lea fakafonua kehekehe, vakai ki he mormonnewsroom.org/newsroom-country-sites.