ʻEletā Hugo E. Martinez
Kōlomu Hono Ua ʻo e Kau Fitungofulú
ʻI he 1982, ne fakatou ako fakafaitoʻo ʻa ʻEletā Hiuko E. Mātini mo hono uaifí, ko Sisitā Nūlia ʻAlavelesi ti Mātiní ʻi Misisipi, USA, ʻi he taimi ne hoko mai ha tukituki taʻe-ʻamanekina ʻi honau matapā ʻi muʻá.
Naʻe tuʻu ai ha ongo faifekau Māmonga.
“Naʻá ma fakaʻatā homa ʻapí kiate kinautolu, ka naʻe ʻikai ke ma ʻilo ha meʻa fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne malimali ʻa ʻEletā Mātini mo pehē, “Ne ʻikai ke mau ʻilo ha meʻa ki he Kuaea ʻa e Tāpanekale Māmongá.”
Neongo ia, ne ongo moʻoni ki he ongomeʻa mali kei talavoú ni e ngaahi lēsoni ʻo e ongoongoleleí ne vahevahe ʻe he ongo faifekaú. Naʻe vave ʻena tali e fakaafe ʻa e ongo faifekaú ke papitaisó.
“Pea kuo teʻeki ke ma toe sio ki mui.”
ʻI he ʻaho 5 ʻo ʻEpeleli 2014, naʻe uiuiʻi ʻa ʻEletā Mātini ki he Kōlomu hono Ua ʻo e Kau Fitungofulú, pea hoko ko e fuofua Taki Māʻolunga mei e ʻOtu Kalipiané. ʻOku mahino pē ʻa ʻene ongoʻi “faingataʻaʻia” ʻi heʻene ngāue foʻou.
ʻOkú ne pehē, “Ka ne hoko mai ha ongo fakaʻofoʻofa ʻo e melinó pea fakahaaʻi mai ʻoku pule ʻa e ʻEikí.”
Naʻe silaʻi ʻa Hiuko mo Nulia Mātini ʻi he Temipale Sōlekí ʻi he ʻaho 3 ʻo ʻOkatopa, 1983, hili ha taʻu mo ha māhina ʻe taha hona papitaisó. ʻOku na hoko ko ha mātuʻa ki ha fānau ʻe toko nima pea ʻi ai ha makapuna fefine ʻe toko nima.
Naʻe fāʻeleʻi ʻa ʻEletā Mātini ʻi he ʻaho 10 ʻo Sānuali 1957, ʻi he Maiakesi, Pueto Liko, kia Hiuko E. Mātini –Sanitini mo Talia Molālesi-ʻAlamo ti Mātini. Lolotonga ʻene kei talavoú, naʻá ne fili ke muimui ʻi he hala fakapalofesinale ʻa ʻene tangataʻeikí ke hoko ko ha toketā. Naʻe maʻu hono mataʻitohi fakafaitoʻo mei he ʻUnivēsiti ʻo Pueto Likó (1981), mo fakakakato ʻene ako ʻi he ʻUnivēsiti ʻo Misisipí (1984). Naʻá ne ngāue fakafaitoʻo kae ʻoua kuó ne maʻu vāhenga mālōlō ʻi he 2004.
Hili ha taimi nounou mei hono papitaisó, naʻe ui ia ke hoko ko ha faiako Lautohi faka-Sāpate ʻa e toʻu tupú. Naʻá ne hoko kimui ko ha pīsope, tokoni ʻi he kau palesitenisī fakasiteikí, palesiteni fakavahefonua, mo ha tokoni ʻi he kau palesitenisī ʻo e Misiona Seni Huani Pueto Likó. Naʻá ne tokangaʻi foki e Misiona Kuatemala Kuatemala Siti Lotolotó pea hoko ko ha Fitungofulu Fakaʻēlia ʻi hono uiuiʻi ia ko ha Taki Māʻolungá.