John S. Tanner
Tokoni ʻUluaki ʻi he Kau Palesitenisī Lahi ʻo e Lautohi Fakasāpaté
Talu mei heʻene kei siʻí, ne fiefia ʻa Sione Sia Tena ʻi he akó.
Ne toe fakaaʻu atu ʻa ʻene loto vēkeveké ki heʻene akó, ngāue maʻuʻanga moʻuí, mo hono ngaahi faingamālie lahi ke akoʻi e ongoongoleleí: ko e ʻuluaki faifekau ʻi he Misiona Palāsila Sauté pea hoko ko ha pīsope, palesiteni fakasiteiki, aleaʻanga māʻolunga, faiako ʻi he Tokāteline ʻo e Ongoongoleleí, palesiteni ʻo e Misiona Palāsila Sao Paulo Sauté (ʻa ia ʻoku fakaʻosi ʻi he faʻahitaʻu māfana ko ʻení), pea ko ʻeni ko e tokoni ʻuluaki ʻi he kau palesitenisī lahi ʻo e Lautohi faka-Sāpaté.
ʻOku pehē ʻe Palesiteni Tena, “ʻI hono fakahoko lelei e [faiako], ʻoku ʻi ai ʻa e Laumālie Māʻoniʻoní pea ʻokú ke ongoʻi e fiefia ʻo e akó; ʻokú ke ongoʻi ʻokú ke ʻi ha potu toputapu.
Fāʻeleʻi ʻi Sōleki Siti, ʻIutā, ʻi he ʻaho 27 ʻo Siulai 1950, kia Viliami Kote Tena ko e Siʻí. pea kia ʻAtilia Sia Tena, ne tupu hake ʻa Palesiteni Tena ʻi Pasatina, Kalefōnia, USA, ko e fika nima ʻo ha fānau ʻe toko 13. Naʻe fakatupu ʻe heʻene ongomātuʻá ha ʻātakai lelei ʻo e akó ʻi ʻapi, ʻo kau ai ha ʻelito mālohi e ongoongoleleí. ʻOkú ne pehē, “ ʻOku ʻikai ke u manatuʻi hano ako ha meʻa ʻi he lotú ne teʻeki ke u ʻosi ako ʻi ʻapí.” Naʻá ne fakatupulaki ha ʻofa ʻi ha ngaahi tohi naʻe lehilehiʻi hangē ko ia naʻá ne feinga ke maʻu ha mataʻitohi ʻi he lea faka-Pilitāniá (English) mei he ʻUnivēsiti Pilikihami ʻIongí mo hono mataʻitohi toketā ʻi he lea faka-Pilitāniá mei he ʻUnivēsiti ʻo Kalefōniá, Pekilií.
Lolotonga ʻene ʻi BYU naʻá ne fetaulaki mo Sūsana Uainitā. Ne fakatupulaki ʻe he ongomeʻá ni ha feohi fakakaumeʻa mālohi ʻo na langa ai ha vā feʻofaʻaki. Naʻá na mali ʻi he Temipale Sōlekí ʻi he 1974. Naʻá na ohi hake ha fānau ʻe toko nima.
Naʻe kamata e ngāue maʻuʻanga moʻui fakaako ʻa Palesiteni Tená ko ha tokoni palōfesa ʻi he ʻUnivēsiti ʻo e Siteiti ko Folōlitá. Naʻá ne hoko ko ha mēmipa ʻo e kau faiako ʻi BYU ʻi he 1982; kuó ne ngāue ai pē ko ha tokoni, kaungā ngāue mo ha palōfesa ʻi he lea faka-Pilitāniá, pea ko e sea ʻo e potungāué mo e tokoni fakaako ki he palesitení.
ʻOkú ne pehē, ko e konga mahuʻinga taha ʻo hono akoʻi e ongoongoleleí mei ha faʻahinga meʻa naʻá ne ako ʻi heʻene ngāue maʻuʻanga moʻuí: kuo pau ke ʻoua naʻa hoko e faiakó mei he ilifiá pe loto vilitaki, ka mei ha feituʻu ʻo e ʻofá—mei he ʻofa faka-Kalaisí, ʻa e ʻofa haohaoa ʻa Kalaisí.