Fakatokangaʻi e Fakalakalaka ʻa e Ngaahi Temipalé, Hikinimaʻi ha Kau ʻŌfisa Foʻou he Konifelenisi Lahí
Ne pehē ʻe Palesiteni Tōmasi S. Monisoni ʻi heʻene lea fakaava e Konifelenisi Lahi Fakataʻu hono 184 ʻa e Siasí kuo, “laka taʻe tūkua atu ki muʻa e ngāue ʻa e Siasí.”
ʻI heʻene manatu ki hono fakatapui e Temipale Kilipati ʻAlesoná ʻi Māʻasi 2, 2014, hanganaki atu ki hono fakatapui ʻo e Temipale ʻa e Footi Lotateila Folōlitá, pea ʻamanaki ke ʻosi hono langa mo fakatapui ʻo ha ngaahi temipale ʻi he ngaahi feituʻu lahi ʻo e māmaníʻi he taʻu 2014 mo e 2015, ne pehē ʻe Palesiteni Monisoni ko e taimi ʻe ʻosi ai hono langa e ngaahi temipale kuo fanongonongó, ʻe ʻi ai ha ngaahi temipale ʻe 170 ʻa e Siasí ʻe ngāue ʻi he funga māmaní.
Naʻá ne pehē, “Neongo ʻoku lolotonga tukutaha ʻetau tokangá ki hono fakakakato e ngaahi temipale kuo ʻosi fanongonongó pea he ʻikai toe fanongonongo ha temipale foʻou ia he kahaʻu vavé ni maí ka te mau kei hokohoko atu pē he ngāue ke fakapapauʻi e ngaahi fie maʻú mo kumi ha tuʻuʻanga ki he ngaahi temipale ke langá. ʻE toki fanongonongo atu leva ia he ngaahi konifelenisi lahi ka hoko maí. Ko ha kakai langa temipale kitautolu ʻoku tau ō maʻu pē ki he temipalé.”
Lolotonga e konifelenisí, ne hikinimaʻi ha mēmipa foʻou ʻo e kau Palesitenisī ʻo e Kau Fitungofulú, kau Taki Māʻolunga foʻou ʻe toko fā, kau palesitenisī lahi foʻou ʻo e Lautohi Faka-Sāpaté, pea mo ha kau Fitungofulu Fakaʻēlia ʻe toko 42.
Naʻe uiuiʻi ʻa ʻEletā Lini G. Lōpini ki he kau Palesitenisī ʻo e Kau Fitungofulú.
Naʻe hikinimaʻi ʻa ʻEletā Jörg Klebingat ʻo Kievi, ʻIukuleiní, mo ʻEletā Sī Hong (Sam) Wong ʻo Hongo Kongo, Siainá, ke ngāue ʻi he Kōlomu ʻUluaki ʻo e kau Fitungofulú. Naʻe hikinimaʻi ʻa ʻEletā Leli S. Kesa ʻo Mitiuei, ʻIutaá, pea mo ʻEletā Hiuko E. Mātini ʻo ʻAlesipiō, Pueto Likó, ko e ongo mēmipa ʻo e Kōlomu Hono Ua ʻo e Kau Fitungofulú.
Naʻe hikinimaʻi ʻa ʻEletā Teti R. Kalisitā, ʻa ia ne ngāue ʻi he kau Palesitenisī ʻo e Kau Fitungofulú pea ko ha mēmipa ʻo e Kōlomu Hono Ua ʻo e Kau Fitungofulú, ko e palesiteni lahi ʻo e Lautohi faka-Sāpaté, pea hoko ʻa Sione S. Tena mo Tēvini G. Tulani ko e tokoni ʻuluaki mo e ua.
Vakai ki ha lisi kakato ʻo e ngaahi hikinimaʻi mo e tukuangé ʻi he peesi 26–27, pea maʻu ʻa e piokālafi ʻo ʻEletā Lōpiní, kau Fitungofulu ne toki ui foʻoú, mo e kau palesitenisī lahi ʻo e Lautohi faka-Sāpaté ʻo kamata he peesi 141.
ʻI he uike ʻe taha kimuʻa he konifelenisi lahí, ne fakahoko ʻi he Senitā Konifelenisí e fuofua fakataha lahi ʻa e houʻeiki fafiné—maʻá e houʻeiki fafine kotoa pē, kau finemuí, mo e fānau fefine taʻu ʻe valu mo motuʻa angé. ʻOku fetongi ʻe he fakatahá ni e fakataha lahi kimuʻa ʻa e Fineʻofá mo e kau Finemuí. ʻE lava ke maʻu e ngaahi pōpoaki kotoa mei he fakataha ʻa e houʻeiki fafiné ʻi he peesi 116–28.
Kimuʻa foki he konifelenisi lahí, ne toe fokotuʻutuʻu e poate lahi ʻa e Kau Finemuí, ʻo fuofua ui ai e kau fafine mei he ngaahi feituʻu mavahe mei Sōleki Siti, ʻo kau ai ʻa Pelū; Saute ʻAfilika; Siapani; Palāsila; mo Pulukilini, Niu ʻIoke, USA. Lau e ngaahi piokālafí mo vakai ki he ngaahi tā ʻi he lds.org/callings/young-women.
ʻI he fakaʻosinga e konifelenisi lahí, ne pehē ʻe Palesiteni Monisoni, “ʻNaʻe ʻomi ʻe he Fakamoʻuí ha pōpoaki ki he māmaní ʻo e ʻofa mo e failelei ki he kakai kotoa pē.” “ʻOfa ke tau muimui maʻu pē ki Heʻene sīpingá.” Naʻá ne fakapapauʻi ki he kāingalotu ʻo e Siasí mo e niʻihi kehé ʻoku fanongo maí “ʻoku tokaimaʻananga mai e Tamai Hēvaní kiate kitautolu. Te ne tataki mo tāpuakiʻi kitautolu ʻi heʻetau tui mo falala kiate Iá.”